1 KORINTI 10

Pertenget kerna berhala-berhala

1O senina-senina, ateku gelah iingetndu kerna kai si enggo jadi nai man nini-nininta asum ia ngikutken Musa. Kerina ia nai ipinpin binangun embun janah terkelin ia kerina ngepari Lawit Merah. #Kel 13:21-22; 14:22-29 2I bas embun dingen i bas lawit e kerina ia tempa-tempa iperidiken jadi pengikut-pengikut Musa. 3Kerina ia man pangan pertendin si seri, dingen minem inemen pertendin si seri. #Kel 16:35 4Kerina ia minem i bas batu pertendin nari, e me batu si nemani ia; batu e Kristus kap. #Kel 17:6; Bil 20:11 5Tapi amin bage gia, nterem nge ia si la ngena ate Dibata, janah perban si e nge maka merapen bangkena i gurun pasir. #Bil 14:29-30

6Kerina si enda jadi usihen man banta, mpersingeti kita gelah ola jahat sura-suranta bagi si ilakoken nininta nai. #Bil 11:4 7Bage pe gelah ola sisembah berhala-berhala bagi si ilakoken piga-piga nininta nai. I bas Pustaka Si Badia lit tersurat, “Bangsa e kundul guna man-minem, jenari tedis ia landek murjah-urjah.” #Kel 32:6 8Ola kita erlua-lua bagi si ilakoken piga-piga nini-nininta nai, seh maka i bas sada wari lit dua puluh telu ribu kalak ia radas mate. #Bil 25:1-18 9Ola sicubai Tuhan bagi si ibahan piga-piga nininta nai, seh maka mate ia itagut nipe. #Bil 21:5-6 10Ola kita jungut-jungut, bagi si ibahan piga-piga nininta nai, seh maka ikernepken Malekat Kematen ia. #Bil 16:41-49

11Kerina si jadi man bana e jadi pelajaren, janah kerina si enda isuratken gelah jadi pertenget man banta. Sabap genduari kita nggeluh i bas paksa pendungi jaman. 12Kalak si erpengakap maka ia nteguh pertedisna, ulin me ia metenget gelah ola ia guling. 13Kerina percuban si reh man bandu e bali nge biakna ras percuban si biasa seh man manusia si deban. Tapi Dibata setia nge i bas padanNa. Labo ipelepasNa kam icubai lebih asa gegehndu. Asum kam ngenanami percuban, iberekenNa nge gegeh man bandu gelah ngasup kam nggengkenca, janah radu ras si e iberekenNa pe dalan pulah.

14E maka o senina-senina si kukelengi, kiamkenlah, ola kal sembah berhala-berhala. 15Aku ngerana man bandu bagi man kalak si pentar. Timbanglah kai si kukataken man bandu. 16Asum siinem lau anggur tare calung si enggo ipasu-pasu alu ngataken bujur man Dibata, ma kin e nuduhken maka kita dat bagin i bas dareh Kristus? Janah asum sicepik-cepik roti guna ipan ras-ras, ma kin e nuduhken maka kita dat bagin i bas kula Kristus? #Mat 26:27-28; Mrk 14:22-24; Luk 22:19-20 17Erkiteken sada nge roti e, e maka kerina kita, aminna pe nterem, sada kula nge, sabap kerina kita dat bagin i bas roti si sada e.

18Perdiatekenlah kalak Israel secara manusia; kalak si man pangan si enggo ipersembahken i babo batar-batar ikut i bas persadan ras si man sembahen e. #Im 7:6 19Adi bage, kai kin si kumaksud? Enggo kin berhalan pangan si ipersembahken man berhala e? Lit kin si tuhuna berhala e? 20Tentu lang! Dage si kumaksud e me kai si ipersembahken i babo batar-batar persembahen berhala, labo ipersembahken man Dibata, tapi man setan-setan nge. Janah ateku min ola kam ersada ras setan e. #Ul 32:17 21La banci kam minem tare calung Tuhan jenari minem ka tare calung setan. La banci kam man i bas meja Tuhan jenari man ka i bas meja setan-setan. 22Ntah ateta kin maka mecimberu Tuhan e? Ntah kin siakap maka gegehen kita asangken Tuhan e? #Ul 32:21

23Lit kalak ngatakenca, “Kai pe banci ilakoken.” Tuhu, tapi labo kerina erguna. “Kai pe banci ilakoken,” tapi labo kerina pehuliken. #1Kor 6:12 24Ola ise pe ngukuri untung man bana saja, tapi inget pe ngukuri untung kalak si deban.

25Kerina daging si idayaken i tiga banci ipanndu alu la pada nungkun-nungkun i bas pusuh peratenndu. 26Sabap i bas Pustaka Si Badia lit tersurat, “Doni enda ras kerina isina Tuhan empuna.” #Msm 24:1

27Adi sekalak si la tek man Jesus Kristus ndilo kam man ras-ras, janah tetap ukurndu ndahisa, panlah kai si idangkenna man bandu alu la pada nungkun-nungkun pusuhndu. 28Tapi adi lit kalak si ngatakenca man bandu, “Pangan enda enggo ipersembahken man berhala,” ola pan pangan e erkiteken kalak si ngatakenca man bandu e dingen erkite-kiteken penggejapen i bas pusuh si la tetap. – 29Labo penggejapenndu, tapi penggejapen kalak si ngatakenca man bandu e.

Banci jadi lit kam ngataken, “Engkai maka penggejapen kalak si deban jadi hakim nandangi kebebasenku? 30Adi ngataken bujur nge aku man Dibata kerna pangan e, ngkai maka ipandang kalak aku, sedangken kukataken nge bujur man Dibata kerna pangan e?”

31Dage kerina si ilakokenndu, subuk man ntah minem, bahanlah si e kerina tama kemulian man Dibata. 32Ola ibahanndu kitik ukur kalak, subuk kalak Jahudi ntah kalak perbegu ntah pe perpulungen Dibata. 33Bagi aku, kupala-palai erbahan si ngena ate kalak kerina i bas kerina si kubahan. Labo keuntungenku si kudarami, tapi keuntungen kalak si nterem, gelah ia terkelin.

Currently Selected:

1 KORINTI 10: BTX

Highlight

Copy

Compare