Birimmi Kitaaba 8
8
1Maha ihoo, at iyyummi anuuna iicu
iyyummi beetisa ikkita'n.
An googonne kiinninne exxaa keese suunqumta'n
ayyi manchim eese gadam hee'ukkoyyo.
2Iyyummi minem keese aagisam hee'ummo;
atim eese eekke'enne iitti bikkina
losissam hee'llitto.
Oroomaa'n mishinne xee'u
er woyi'n diqaasam agisam hee'ummo.
3Ixxi qeddi anginne bakkisookko;
makki anginnem qaaphphookko.
4Ki'nnuwwi Yerusaalee'm baajaammuwwa,
iitti ixxi gaginnem ki'eebe'i afeebe'e
mikmikaa'llakka'a ki'isansitakkambee'isa
hadara yoommo.
Iitti Mazmuu'l Bikkina
Idaayyichcho Beshshuwwa
5Is iitti mancho bakke'lla'a
udma'i uulliinsi waattamote tute ayyette?
Idaayyichcho
Eraa kiyyumma keese siitto'i xuu'lla'ahim qatto'i
appi'l yakkam haqqichchi lugumiinsi baqaa'ummo.
6Hundi amma'n iittinne ki wodanonne
eese koobo'isa koobe;
ki angannem koobeo'isa xale'i eese amade.
Iitti lehi'nnoo'i qoxxaalla;
to'achchim waammi'nnoo'i mogaalla;
ixxek gii'l laban Waa'i laba'nnisa.
7Wo'i lophphimmi iittika giira bi'iseena xanooyyo;
dirisam ihukkaare aanshaa masseena xanooyyo.
Manni ixxena hee'oo amaxxi hundinnem
iitto bitaa'eena yakuta'n
manni ixxonne naacamookko.
Idaayyichchona Abbaayyuwwi
8Anuunam fissitoo'n yo'i gootto'i aayya niina yo'o;
eebaqqanchina xa'mmakkota'n
ka niyyaayyana neese maha issineena xannam hee'nnummo?
9Ise qash ikko'ita'n
egerimmina kin bi'l godo'o banxam hee'nnummo.
Ise ooxxi gooc ikko'oota'n
Liibaanoos uulli haqqi saanqinne baxamaakkoo
xufa banxam hee'nnummo.
Idaayyichcho
10Oono'o, an qashatte;
i anuunim qoto'akka'a egerakkam beyyisa;
an i iitti manchinne maqire ihoommi ammane
ixxi xummaa liiranchaa siidookko.
Idaayyichchona Beshshuwwi
11Salamoonina Ba'aalhaamoonanne
woyi'n kaashshi beyyi hee'ukko.
Ee woyi'n beyyom baxaanina kera'a uwwukko;
oo baxaan annannichchim mat mat kum bira
ixxena eebbam hee'llo'o.
Idaayyichcho
12Iina i gaqqi woyi'n kaashshi beyyi yookko;
Salamoona, at mat kum bira
woyi'n kaashshi beyyi baxaanim
lam xibbi bira massitakkeena xantakkamo.
Idaayyichchi
13Taa i idaayyichche, duubbi kaashshi beyyonnette ikkaa
i besh kiikka sagara macceesseena
hassam bikkina
hino'o, iina ki sagara macceesise.
Idaayyichcho
14I iitti mancho, qaqqissaa i beyyo waare;
enji mutoo duunnuwwanne
chubbi chubboo kukkussichcho te'im
gaallichchi wotara kobi'lle.
Currently Selected:
Birimmi Kitaaba 8: KeesKita
Highlight
Copy
Compare
Share
Want to have your highlights saved across all your devices? Sign up or sign in
