Yohaannis Kaalta 9

1Ee lasage onti asse'amaanchi ixxi xurumbulla fugukko. Anim iimaniinsi uullanne ubaakkoo boollaankichcho moo'ummo. Ee boollaankichchinam tungi bee'i baalle fooqaa'aanchi uwwamukko. 2#Qoc 19:28 Ixxim ee tungi bee'i baalle fooqaa'ukkaare shokki aphphoo ammane firoohaanni'nnoo'i wiriir firukko. Ixxeensim firu wiriir eelliinchoo hafachchaa tuunsiisukko. 3#Doy 10:12 Ee lasage odim ee wiriiriinsi qawwaawwi firaa uullanne dillukko. Ee qawwaawwinam ginxa yakkam daquuchchaanni'nnoo'i malaayyi uwwamukko. 4#Hiz 9:4 Ixxuwwim xale'i Waa'ik koobo'i miinenne bee'i manniinsi bagaan hix ihukkaare te'im uulliinsi mutaa li'oo ayyi luwwam ihukkaare te'im ihu haqqam ihukkaare hawwoddambee'isa kuramukko. 5Oo qawwaawwim manna shitambee'isa barche'e issitamisina malaayyi uwwamukkok onti aganinatte. Ixxuwwim barche'e issitamok ginxa yakkam daquuchchi mat mancho qasoo ammane barche'e issoo'isa. 6#Iyb 3:21; Erm 8:3 Ee doollenne manni leho hasookko. Ihukkaarem siideena xanooyyo. Ixxuwwim leteena mixxamo. Ihukkaarem leh ixxuwwiinsi gibookko.

7 # Iyo 2:4 Oo qawwaawwim orina mareena gudu farado laboohan hee'ukko. Ixxuwwi horoorennem worqiinsi baxamaakkoo kaachchi mare'e laboo luwwi hee'ukko. Ixxuwwi illi kollim manni illi kollo laboohan hee'ukko. 8#Iyo 1:6 Ixxuwwi horoo'l saraatim meenti horoo'l saraata laboohan hee'ukko. Odim ixxuwwi inqim hobbi inqe laboohan hee'ukko. 9#Iyo 2:5 Ixxuwwim biqenne xaara laboo o'l eddechcha edde'lla'a hee'llo'o. Barattam ammane ixxuwwi laxxi gug dut farad gaare'uwwa gosaasukkuuyyi orina maroo ammane gugoo'isa gugam hee'ukko. 10Ixxuwwinam ginxa yakkam daquuchchaanni'nnoo'i sheerim hee'ukko. Ee sheerimonnem qub hee'u bikkina ee sheeriminne manna qassu'uuyyi onti agan afeebe'e barche'e issitam hee'llo'o. 11Tungi bee'i baalli asse'amaanchim ixxuwwina adil hee'ukko. Ixxi summim Ibro'isinne Abaadoona Giriikisinnem Aphphoolyoona yamamookko. #9:11 Abaadoona te'im Aphphoolyoona yimmi «Bi'isichcho» yimma.

12«Aayye» yisiisoo luxxi hawwi higaakko. Oono'o! Odim ka lasage waaroo «Aayye» yisiisoo lam hawwi yookko.

13 # Doy 30:1 Ee lasage loh asse'amaanchi ixxi xurumbulla fugukko. Aduruusa wiriissimmina worqiinsi baxamaa Waa'i illagenne yoo mu'utiinsi#9:13 «Wiriissakkam mu'utiinsi» yinummoka mat mat tirattuwwanne «Soorem buudduwwiinsi» yamamaa kitaabamaakko. waaru mat sagara macceesummo. 14Oo sagarim xurumbulla amadaa hee'u loh asse'amaanchina «Efiraaxiisa yakkam lob daajjenne karanto'oo soorem asse'amaano tire» yukko. 15Ee bikkina ee sa'aatina, ee ayyaamina, ee aganinaa ee hiinchinaa gudda'a hee'llo'i soorem asse'amaanim manni shumo'ika saxxi suume shitamisina tiranto'o. 16Anim faradaa'n gogotik xig lam xibbi miliyoona ihukkisa macceesummo. 17Ee faradoo faradaanoo kaaltanne moo'ummo. Ee faradaa'n biqenne yoo o'l eddechchim gii'l kashara, cuquluusa laboo kinaa diina yakkam baar luwwaa laboohan hee'ukko. Ee faraxxekim horoor hobbi horoore laboohan hee'ukko. Ixxuwwi suumiinsim giir, wiriirii diina yakkam luwwii firam hee'ukko. 18Ixxuwwi suumiinsi firu giirinne, wiriirinnee diina yakkam luwwinnee ee sasem boobaninnem manni shumo'ik saxxi suum beeddukko. 19Mashka'oomim ee faraxxek malaayyi ixxuwwi suumennee sheerimonnee hee'u bikkinatte. Ixxuwwi sheerimim hamashsha laboohan hee'ukko. Ee sheerimonnem horoor hee'ukko. Eehanninnem manna hawwoddam hee'llo'o.

20 # Maz 115:4 Ee boobananne letoo'n gatto'i manni habusina otossimmiinsi saxxita'a daba'llito'oyyo. Odim moo'lleena, macceesseenaa taakke'lleenaa xantambee'i misilluwwa worqiinsi, biriinsi, naasiinsi, kiniinsii haqqiinsii ixxuwwi anginne baxxa'a otossimmiinsi saxxita'a daba'lliteena hasso'oyyo. 21Ee'isam manna shimma, kiirimma, saa'immaa game'immaa utto'oyyo.

Currently Selected:

Yohaannis Kaalta 9: KeesKita

Highlight

Copy

Compare