Yohaannis Kaalta 8

Lama'l Koobo'i Fooqukkisa

1Gereechchi lama'l koobo'o fooqaa'u ammanenne mat sa'aaxxi kollo ihooqax ammanina iimanenne saga'llek ma'lluchchim hee'ukkoyyo. 2Ee lasage Waa'i illagenne uullitam lamar asse'amaano moo'ummo. Ixxuwwinam lamar xurumbulluwwi uwwamukko.

3 # Amo 9:1; Doy 30:1 Odim aduruusa wiriissimmina worqiinsi baxamaakkoo muude'e amadaakkoo mulli asse'amaanchim waaraa aduruusa wiriissimmina worqiinsi baxamaakkoo mu'uxxi gadanonne uullukko. Oo mu'utim adilla'n barcu'm illagenne hee'ukko. Oo Waa'i asse'amaanchi ee mu'utanne Waa'i doo'llu minaadab Waa'a uunxito'i uunxatinne hamaaroo'isina lobakat aduruus uwwamukko. 4Waa'i illagenne uullu ee asse'amaanchi angiinsi aduruus wiriirii Waa'i doo'llu minaadaphphi uunxatii iim firukko. 5#Qes 16:12; Hiz 10:2; Doy 19:16; Kal 11:19; 16:18 Ee lasage oo asse'amaanchim ee muude'e massaa aduruusa wiriissimmina worqiinsi baxamu mu'utiinsi giira wonshaa issaa uullanne darabukkaare banqi gug, belellaat, sagarii uulli huxechchii ihukko.

Xurumbulluwwi Fugamukkisa

6Ee lasage lamar xurumbulluwwa amadda'a hee'llo'i lamarem asse'amaanim xurumbulluwwa fuggeena guddo'o. 7#Doy 9:23 Ee lamarem asse'amaaniinsim luxxek ixxi xurumbulla fugu ammanenne baradii giirii xiiginne hamaaramaa uullanne ga'nnukko. Uullik saxxi suum, haqqik saxxi suumii hixii hundichchim shokkukko.

8Ee lasage odim la'm asse'amaanchi ixxi xurumbulla fugukkaare mat lob duuna laboo luwwi aphphukkuuyyi dambalaq wo'onne darabamukko. Dambalaq wo'ikim saxxi suum xiiganne daba'llukko. 9Dambalaq woronne hee'oo fooraam luwwikim saxxi suum lehukko. Markabbuwwikim saxxi suum bi'ukko.

10 # Isa 14:12 Odim saxxi asse'amaanchim ixxi xurumbulla fugukkaare geejji boollaankichchi xomboo'llisa aphphukkuuyyi wo'i bu'uwwannee daajjuwwi saxxi suumennee ubukko. 11#Erm 9:15 Ee boollaankichchi summim Geneeno'o yamamoohane. Ixxi ubaa wo'ika saxxi suume qaraassu bikkina dut manni lehukko.

12 # Isa 13:10; Hiz 32:7; Iyo 2:10 Soo'l asse'amaanchim ixxi xurumbulla fugukkaare eelliinchik saxxi suum, aga'nnek saxxi suumii boollaankik saxxi suumii aphphisamukko. Ee bikkina ixxuwwi caakkik saxxi suum tuunsukko. Odim ballik saxxi suum tuunsukko; ee'isam hii'mmekim saxxi suum tuunsukko.

13Eehanniinsi lasage mat gaaqichchi lobakat geejji sagarinne «Gatto'i sasem asse'amaanim xurumbulluwwa fuggam ammane uullanne hee'llam mannina aayye, aayye, aayye!» yukkuuyyi iima'n lambe'enne bararookkoka moo'ummo.

Currently Selected:

Yohaannis Kaalta 8: KeesKita

Highlight

Copy

Compare