Yohaannis Kaalta 6

Lamarem Koobo'uwwim Fooqukkisa

1Ee lasage Gereechchi lamarem koobo'iinsem luxxeka fooqaa'ukkuuyyi moo'ummo. Moo'ummuuyyim ee fooraam qooccanchuwwiinsi mat banqi gugi'nnoo'i sagarinne «Waare» yukkuuyyi macceesummo. 2#Zak 1:7 Oono'o! Qadaalli farashsho moo'ummo. Ee qadaalli farashshonnem saa'llaa hee'ukkok xiyya amadaa hee'ukko. Ixxenam kaachchi mare'i uwwamukkaare kaa'eena murte'aa kaa'ukkuuyyi marukko.

3Odim Gereechchi la'm koobo'o fooqaa'u ammanenne ee fooraam qooccanchuwwiinsi la'mmek «Waare» yukkuuyyi macceesummo. 4#Zak 1:7 Oono'o! Mulli baar kashar farashshi firukko. Ee farashshonnem saa'llukkaannina manni ixxuwwina'i ixxuwwim shaqqantamisina uulliinsi xumma hooroo malaayyi uwwamukko. Odim geejji bisa'im uwwamukko.

5 # Zak 6:2 Odim Gereechchi saxxi koobo'o fooqaa'u ammanenne fooraam qooccanchuwwiinsi saxxek «Waare» yukkuuyyi macceesummo. Oono'o! Odim heemachchi farashsho moo'ummo. Ee farashshonnem saa'llukkok hurbaata keenakkam keennaancho amadaa hee'ukko. 6Ee soorem qooccanchuwwi lambe'iinsi sagari'nnoo'i luwwi «Mat manchi mat balla baxu malaayyina aras ihulas lam burcuqo'i ihona. So'i ihulas loh burcuqo'i ihona. Ihukkaarem zaytaa woyinaa hawwoddakkotte» yukkuuyyi macceesummo.

7Odim Gereechchi soo'l koobo'o fooqaa'u ammanenne fooraam qooccanchuwwiinsi soo'llek «Waare» yukkuuyyi macceesummo. 8#Hiz 14:21 Oono'o! Shiire'i farashsho moo'ummo. Ee farashshonnem saa'llaa hee'ukkaannik summi leho. Ixxom Si'ool awwonukko. Ixxuwwim uullika soo'l suume bagadinne, sibaarinne, jor jabbinnee moochchinnee shitamisina malaayyi uwwamukko.

9Odim Gereechchi onti koobo'o fooqaa'u ammanenne Waa'i sagara kutto'i bikkinaa amma'nnanto'oo keen ikko'i bikkinaa shakko'i keeno Waa'ina kitima hincaa'akkam mu'utiinsi woroon moo'ummo. 10Ixxuwwim sagara iimaa'lla'a «Hundam xantoo Moollanni Waa'a! At keesammaa hanqo'anee. Uullanne hee'llam minaadab neese shito'i bikkina ixxuwwanne oogattaa ni xiiga miqissoobee'ek hinkaa'n balli afeebe'e?» yitu'uuyyi laatto'o. 11Ee lasage ixxuwwina annannichchinam qeeraa'l qadaalli eddechchi uwwamukko. Ixxuwwisam Waa'ina awwaaddam ixxuwwi besha oohim ixxuwwi abbaayyuwwa shakka'a xigo wonshakkeebe'i afeebe'e hoffi ammanem iyyaqqitamisina kuramukko.

12 # Kal 11:13; 16:18; Isa 13:10; Iyo 2:10 Odim Gereechchi loh koobo'o fooqaa'u ammanenne lobakat malaayyaamisa uulli huxe'ukkuuyyi moo'ummo. Eelliinchim xiddi eddechchisa heemachchukko. Aganim xiiqqisa kasharukko. 13#Isa 34:4 Malaayyaam hafachchi heekkeesoohaare oda'i mish giggiraa uboo'isa iima'n boollaanki uullanne ubukko. 14#Kal 16:20 Iimanim hirfa'nnisa xaaxamaa beyyiinsi bee'ukko. Odim duunnuwwii wo'i kibbu uullii hundim beyyiinsi laa'ukko. 15#Isa 2:19 Ee lasage odim uulli adilluwwi, gassaan, gaaxxi manna awwonsaan, goddaan, malaayyaammuwwi, agidii wolabii hundim daawwa'uwwannee duunnuwwannee yoo geejji geejji kinneewwi kolo'uuwwanne maaxanto'o. 16-17#Hos 10:8; Luq 23:30 Ixxuwwim «Kee'mmaalli quunqi ayyaam waaru bikkina geejji geejji kinneewwii duunnuwwii ni hanenne ubbakka'a adilla'n barcumanne afuurukkaanni illiinsii Gereechchi quunqiinsii neese maaxxehe. Ixxuwwi illagenne ayyi uulleena xanookko?» yito'o.

Currently Selected:

Yohaannis Kaalta 6: KeesKita

Highlight

Copy

Compare