Yohaannis Kaalta 5

Kitaab Bikkinaa Gereechchi Bikkinaa

1 # Hiz 2:9 Ee adilla'n barcumanne afuurukkaanni makki anganne mat hanennee woronnee kitaabamaa fooqoobee'isa lamar koobo'inne koobamaakkoo kitaaba moo'ummo. 2Odim Waa'ik mat malaayyaam asse'amaanchi malaayyaam sagarinne «Ee koobo'o fooqaa'eenaa kitaaba biddiqaa'eenaa labookkok ayyette?» yaa shuurukkuuyyi moo'ummo. 3Ihukkaarem iimanenne te'im uullanne te'im uulliinsi woroon ee kitaaba biddiqaa'eenaa ixxi wororo moo'eenaa labookkok matim hee'ukkoyyo. 4Anim ee kitaaba biddiqaa'eenaa ixxi wororo moo'eenaa labookkok matim bee'u bikkina shikkaa wi'llummo. 5#Qoc 49:9; Isa 11:1 Ee lasage woddaa'i lommannik mat «Wi'llititte! Oono'o! Daawiit moollik Yihuxxi shumo'iinsi qaramu hobbichchi kaa'u bikkina ee lamarem koobo'om fooqaa'eenaa kitaaba biddiqaa'eenaa xanookko» yukko.

6 # Isa 53:7; Zak 4:10 Odim ee lamiyyaannonnee soorem lommannaannonnee lambe'enne yo'i soorem fooraam qooccanchuwwinaa adilla'n barcuminaa lambe'enne mat Gereechchi duramu gereechcho labaa uullaakkoo moo'ummo. Ee Gereechchinam lamar buudii lamar illii hee'ukko. Oo keenim uulli hundam asse'amu Waa'i lamar ayyaannuwwa. 7Oo Gereechchim maraa ee adilla'n barcumanne afuurukkaanni makki anganne hee'u kitaaba massukko. 8#Maz 141:2 Ixxim ee kitaaba massukkaare oo soorem fooraam qooccanchuwwii lamiyyii soorem lommannii ee Gereechchi illagenne ubba'a otossito'o. Ixxuwwi annannichchim diitta'aa worqiinsi baxakka'a aduruusa wonshakko'oo muude'ee amadda'a hee'llo'o. Oo aduruusim keesammi keen Waa'a uunxitam uunxato. 9#Maz 33:3; 98:1; Isa 42:10 Ixxuwwim

«At durantaa ki xiiginne shumo'i hundiinsi,

wocakkam suum hundiinsi, minaadab hundiinsii

moolli hundiinsii Waa'ina manna bitaa'l bikkina

kitaaba massimmii fooqaa'immii kiina laboohan ikkaatto.

10 # Doy 19:6; Kal 1:6 Odim at ixxuwwa Waa'i gassoo minaadabaa

qeessuwwaa issitaatto.

Ixxuwwim ka uulli minaadaba gassitamo» yitu'uuyyi haareechchi mazmuura zammatto'o.

11 # Dan 7:10 Ee lasage odim ee adilla'n barcuma, soorem fooraam qooccanchuwwa, lommannaa kululaa'lla'a uullito'oo lobakat Waa'i asse'amaanoo moo'ummo. Ee asse'amaa'nnekam sagara macceesummo. Ixxuwwikim xig kum ko'l kum afeebe'ee miliyoon ko'l miliyoon afeebe'ee hee'ukko. 12Ixxuwwim lobakat malaayyaam sagarinne «Duramu Gereechchina malaayyi, amaxxi,#5:12 «Amaxxa» yoo sagar Waa'i ixxo hundiinsim lonsaa maasse'ukkisa moo'isoohane. qooroom, qoxallan, lombi, nuur, galatii maassii labookko» yitam hee'llo'o. 13Odim iimanenne, uullanne, uulliinsi woroonii dambalaqannee hee'llam qooccanchi hundim «Adilla'n barcumanne afuurukkaanninaa Gereechchinaa galat, lombi, nuurii malaayyii heer heerinam ihona» yitu'uuyyi macceesummo. 14Oo soorem fooraam qooccanchuwwim «Aameen» yito'o. Lommannim ubba'a otossito'o.

Currently Selected:

Yohaannis Kaalta 5: KeesKita

Highlight

Copy

Compare