Yohaannis Kaalta 22

1 # Hiz 47:1; Zak 14:8 Ee lasage oo asse'amaanchi Waa'aanniinsii Gereechchiinsii adilla'n barcumiinsi firaa daadoo heechcha uwwoo daajji wo'o iina moo'isukko. Oo daajji wo'im gagmoo'ixxa laboo lintaalli hee'ukko. 2#Qoc 2:9 Oo daajjim beero'i bobba'i lambe'inne daadam hee'ukko. Ee daajjaannonne lamem shiinennem hiinchonne tommoo lam koree agana agananne misha mishoo heechcha uwwoo haqqichchi hee'ukko. #22:2Mat mat kitaabbuwwi «Ee daajjaannonne lamem tochchonnem heechcha uwwoo haqqichchi hee'ukko. Oo haqqichchim agana agananne tommoo lam annanni annanni misha mishoohan hee'ukko» yookko. Ee haqqichchik buyyim minaadab fayya'oominne hee'oo'isa issoohane. 3#Zak 14:10 Ee beero'onne Waa'ikii Gereechchikii adilla'n barcum hee'ookko bagaan duumamu luwwik ma'lluchchim hee'ooyyo. Ixxena awwaaddam keenim ixxena otossitamo. 4Ixxi illem moo'llamo. Ixxi summim ixxuwwi miinenne hee'ookko. 5#Isa 60:19; Dan 7:18 Ee lasage od hiim hee'ooyyo. Moollanni Waa'i ixxuwwina caakki ihoo bikkina eelliinchi caakkii mulli caakkii od hasisooyyo. Ixxuwwim heer heerina adilluwwi ikkamo.

Yesuus La'mmaaggem Waaroohan Ihukkisa

6Ee lasage oo asse'amaanchi iina «Ku woshshi amma'nnamaakkoohanee hanqo'anee. Hiraagaa'n ayyaana uwwoo Moollanni Waa'i hoffi ammanenne ihoo luwwa ixxena awwaaddam keenina caakkisona ixxi asse'amaancho asse'aakko» yukko. 7Yesuus «Oono'o! An qaqqisom waaroommo.

Ka kitaabanne kitaabamu hiraaqqi sagarina ijaajamookkok maasse'amaakkoohane» yukko.

8Ka hundam macceesummokii moo'ummokii an Yohaannisatte. An ee keeno macceesummi ammanee moo'ummi ammanee ee keeno iina moo'isu asse'amaanchina otosseena ixxi lokkiinsi woroon ubummo. 9Ihukkaarem oo asse'amaanchi «Iina otossititte. An kiinninne, hiraagaan kiyyabbaayyuwwinnee ka kitaab woshshina ijaajantam keeninnee maqirem awwaadaanchi ihummi bikkina Waa'ina otossihe» yukko.

10Odim ee lasage oo asse'amaanchi iina «Ku hundichchim wo'mmoo amman afu bikkina ka kitaabanne kitaabamu Waa'i sagar fooqoobee'isa koobbitte. 11#Dan 12:10 Jora baxookkok ka lasagem jora baxona. Haashaarammi ka lasagem haashaaramona. Er manchi ka lasagem eroomma issona. Keesammi ka lasagem keesamaakkoohan ihona» yukko.

12 # Isa 40:10; 62:11; Maz 28:4; Isa 40:10; Erm 17:10 Odim Yesuus «Oono'o! Annannichchinam ixxi baxu baxisam uwweena irifo'o amadaa qaqqisom waaroommo. 13#Kal 1:8; Isa 44:6; 48:12; Kal 1:17; 2:8 Hundem luwwiinsim illageen hee'ummok, hundem luwwiinsim lasagem hee'oommok, luxxek, lasaanchik, asheerii goollo'ii anette» yukko.

14 # Qoc 2:9; 3:22 Heechcha uwwoo haqqichcho afimminaa ee beero'o goocinne aagimminaa labbam keen ikkeena ixxuwwi eddechcha muccussita'a aanshitam keen maassaammuwwa. 15Wish keen, kiiraan, saa'aan, manna shitam keen, qophpha'n waa'ina otossitam keen, qophphano iittitam keenii qophphano woccam keenii hundim ee beero'iinsi biireen ikkamo.

16 # Isa 11:1 «Amma'nnaa'n wixxittuwwina ka asso naqqasoo'isina i asse'amaancho ki beyyo asse'ummok an Yesuusatte. An Daawiit qaranchi lugumoo shumo'oo. Odim caakkisoo soodaraa'l boollaankichcho» yukko.

17 # Isa 55:1 Keesammi Ayyaanii idaayyichchoo «Waare» yitamo. Macceesookkokim «Waare» yihona. Xeebe'ukkokim waarona. Hasukkokim heechcha uwwoo wo'ika bit bee'em massona.

18 # Se'l 4:2; 12:32 Oono'o! Ka kitaabanne kitaabamu Waa'i sagara macceesookkoka hundam sogoommo. Ayyim kannonne ma'lluchcho edulas ka kitaabanne kitaabamu boobannuwwa Waa'i ixxonnem edookko. 19Odim ayyim ka kitaabanne kitaabamu Waa'i sagariinsi xa'isulas ka kitaabanne kitaabamu keesammi beero'ikaa heechcha uwwoo haqqichchikaa ixxi qooda Waa'i ixxeensi hoorookko.

20Ka keeno naqqasookkok «Hanqinam an qaqqisom waaroommo» yoolla. Eeyya, Moollanni Yesuusa, waare! 21Moollanni Yesuusik eroommi Waa'i minaadab hundinnem maqire ihona! Aameen.

Currently Selected:

Yohaannis Kaalta 22: KeesKita

Highlight

Copy

Compare