Yohaannis Kaalta 21

Haareechchi Iima'n Bikkinaa Haareechchi Uulli Bikkinaa

1 # Isa 65:17; 66:22; 1Phex 3:13 Eraa'l iimanii eraa'l uullii higaa hee'u bikkina haareechchi iimanee haareechchi uullaa moo'ummo. Dambalaqim ee lasage od siidamukkoyyo. 2#Isa 52:1; Kal 3:12; Isa 61:10 Odim haareechchi Yerusaalee'm keesammi beero'i is goonchina wereeggita'a guddo'i idaayyichcho labaa iimaniinsi Waa'i beyyiinsi dillukkuuyyi moo'ummo. 3#Hiz 37:27; Qes 26:11 Odim adilla'n barcumiinsi geejji sagar «Oono'o! Waa'ik heechchi beyyi manni lambe'ennette. Ixxim ixxuwwinne maqire hee'ookko. Ixxuwwim ixxi minaadab ikkamo. Waa'i ixxi gagim ixxuwwinne maqire ihaa ixxuwwina Waa'i ihookko. 4#Isa 25:8; Isa 35:10; 65:19 Waa'im ixxuwwi illiinsi indiiddi hundichchom shiinshookko. Eraa'l luwwi hundim higu bikkina ee lasage od leh hee'ooyyo. Odim kichchechchi te'im wi'llimmi te'im hawwi hee'ooyyo» yukkuuyyi macceesummo.

5Adilla'n barcumanne afuurukkokim «Oono'o! An hundem luwwam haareechchi issoommo» yukko. Odim «Ku sagar amma'nnamaakkoohanee hanqo'anee ihu bikkina kitaabe» yukko. 6#Isa 55:1 Ee lasage odim «Beeddaakko; hundi luchchiinsim illageen hee'ummokii hundi luchchiinsi lasagem hee'oommokii anette. Xeebe'ukkaannina heechcha uwwoo wo'i bu'iinsi bit bee'em uwwoommo. 7#2Sam 7:14; Maz 89:26 Kaa'ukkok eekka laga'llookko; anim ixxena Waa'i ihoommo. Ixxim iina beet ihookko. 8Woshshi ihukkaarem baddoo kee'nnek, amma'nnoobee'i kee'nnek, haashaarammuwwik, manna shitam kee'nnek, saa'llam kee'nnek, gennitam kee'nnek, qophpha'n Waa'ina otossitam kee'nnekii qophphanaa'nnekii hundikim saam diininne aphphoo gii'l dambalaqanne ihookko. Oohim la'm leho» yukko.

Haareechchi Yerusaalee'm Bikkina

9Ee lasage lasaanchi lamarem boobannuwwi wo'mmaakkoo lamarem injaffuwwa amaddo'i lamarem asse'amaaniinsim mat i beyyo waaraa «Gereechchina arette ikko'i idaayyichcho moo'isoommo; waare» yukkuuyyi wocukko. 10#Hiz 40:1 Ixxim eese Keesammi Ayyaaninne mat lob qeeraa'l duunanne fissaa keesammi Yerusaalee'm beero'i iimaniinsi Waa'i beyyiinsi dillukkuuyyi moo'isukko. 11Ee beero'onnem Waa'i lombi hee'u bikkina oo beero'i gagmoo'ixxa laboo lobakata bito xee'aalli belecce'oo ki'nnisa caakkisam hee'ukko. Odim muccur gagmoo'ixxisam belecce'am hee'ukko. 12#Hiz 48:30-35 Ee beero'inam tommii lam goocii yoo lobakata qeeraa'l qash hee'ukko. Ee tommonnee lamem gooccuwwannem tommii lam asse'amaanii hee'llo'o. Odim ee gooccuwwannem tommikii lamem Isra'ee'l sullikim summi kitaabamaa hee'ukko. 13Ee gooccuwwikim eelliinchi firinne sas gooc, hanaa'n qarinne sas gooc, woroo'n qarinne sas gooc, eelliinchi aagginne sas gooc hee'ukko. 14Ee beero'i qashim tommonnee lam kinannee uullaa hee'ukko. Ee kinneewwannem Gereechchi asse'amaa'nnek tommikii lamikim summi kitaabamaa hee'ukko.

15 # Hiz 40:3 Ee iinninne wocam hee'ukkaannina ee beero'o, gooccuwwaa qashaa keenoo worqi bicci hee'ukko. 16Ee beero'ik uullichchii midaadii gudaanchi ihaa soor midaad yoohan hee'ukko. Ixxim ee beero'o ee biccinne keenukkaare uullichchi 2,220 kiilomeetira ihooqax beyyi ihukko.#21:16Giriik kitaab «Tommoo lam kum istaadiyooma» yookko. Ixxekim qeeraa'lloom, haraaroomii uullichchii gudaanchi hee'ukko. 17Odim ee beero'i qasham keenukkaare manchi keennaanchonne mat xibbee soree soor angaa hee'ukko.#21:17Giriik kitaab «Mat xibbee soree soor anga» yookko. Oohim ee asse'amaanchaannonnette. 18#Isa 54:11-12 Beero'oomim baxamukkok gagmoo'ixxi'nnoo'i muccur worqiinsette hee'ukko. Ihukkaarem qash baxamukkok shaano'i kininnette. 19Ee beero'i qash uullu kinneewwim lobakata bito xee'aalli kinneewwi hundinnem wereeggaakkoohan hee'ukko. Ee kinneewwikim luxxek gagmoo'ixxa laboo shaano'i kina, la'mmek cuquluusa laboo kina, saxxek heemachchi lab shaano'i kina, soo'llek aduu'n ille laboo kina, 20ontik haxaraam heemachchi kina, lohik boobeet kashar kina, lama'llek worqa laboo kina, sadeentik shaano'i kina, honsik baar kina, tommik baar shaano'i kina, tommikii matikii sandaab kina, tommikii la'mmekii kuul kin hee'ukko.#21:19-20Ka beyyonne tommoo lam hagaraa kurimminne kitaabamu kinneewwi mulli tirattuwwanne «Iyyaasaaphphiida, sanpheera, kelqeedoona, margiida, sardooniksa, sardiyoona, kiristiloobe'e, birille'e, wuraawure'e, kirispiraasisa, yaakintaa ameetesxinoosaa» yamamu keeno. 21Oo tommii lam gooccuwwim baxamukkok inqu yakkam tommiinsii lam kiniinsette. Oo gooccuwwi annannichchim ee inqu yakkam kinneewwinne matinne matinnem baxamaakkoohan hee'ukko. Ee beero'i googim burcuqo'isa worinne caakka higisoo muccur worqi hee'ukko.

22Hundam xanoo Moollanni Waa'ii Gereechchii ee beero'ina Keesammi Min ikko'i bikkina ee beero'onne Keesammi Mine moo'ummoyyo. 23#Isa 60:19 Ee beero'ina Waa'i lombii Gereechchii caakki ikko'i bikkina ee beero'o caakkisoo'isina eelliinchi te'im agan hasisooyyo. 24#Isa 60:3 Minaadabim ee beero'i caakkanne daba'llamookko. Uulli adilluwwim ixxuwwi lomba ee beero'o eebbamo. 25#Isa 60:11 Ee beero'i gooccuwwi ballanne hore'em xufamooyyo. Hiimim ee beero'onne hee'ooyyo. 26Minaadaphphekam lombaa nuuraa ee beero'i eebbamo. 27#Isa 52:1; Hiz 44:9 Ihukkaarem Gereechchaannonne heechchi kitaabanne kitaabanto'i keeniinsi bagaan haashaassoo luwwik ma'lluchchim ee beero'o aagooyyo. Odim shigigaa'oo luwwa issitam keenii qophphanaanii ee beero'o hore'em aaggamoyyo.

Currently Selected:

Yohaannis Kaalta 21: KeesKita

Highlight

Copy

Compare