Asse'amaa'n Baxo 24

Ayihuxxi Manni Phaawuloosa Kasasso'isa

1Onti balliinsi lasage hundiinsi lob qeessichchi Hanaaniy mat qax lommannaa Xarxuloosa yakkam hayyo'i manchoo amadaa Qiisaariya dillukko. Ixxuwwim gassaanchi Filiksi beyyo hincita'a waatto'i woshsha kutto'o. 2Filiksim Phaawuloosa weeshisaa woraa lasage Xarxuloos «Lophphitakko'oo Filiksa, ki'n gassi doollenne neese lobakat xummaa danaam luwwaa siixxinaammo. 3Ee ki'n issitakko'i eroommi hundam neese yoommine'i beyyi hundannem duuha'i hundinnem aa'nnoommuullak lobakat liiranchinnette. 4Ki'nne hawwisoobee'i hoffi woshshichchom wocummuuyyi erisa macceessakkamisina an uunxoommo. 5Kuk uulli hundannem yoo Ayihuxxi minaadaba hambalaachchukkuuyyii ee huushisaanchi Naazireexxi Yesuusa awwontam keeno awwonsukkuuyyii siindaammoo jor mancho. 6Eehanniinsi odim Keesammi Mine haashaasseena ihonam siindaa amandaa#24:6-8 Xiqqi 6b—8a yoo sawwit Giriikisinne kitaabamu gaassi kitaabbuwwanne bee'ane. ni see'llisanne ooganteena hansaa hee'nnummo.

7Ihukkaarem gaadaa'n ijaajaanchi Lusiyoos lobakat malaayyinne waaraa niinniinsi hooraa massaa 8waallaa ki'nnenne kasansoommisina ijaajukko. Neese kasansummi woshshi hanqo'an ihukkisa laqqakkeena hassakkolas ixxo qoxxissakka'a saarayyimminne luwwi hundam laqqakkeena xantakkamo» yaa kasasimma asheerukko. 9Ayihuxxi manni hundim «Oo Xarxuloos wocu woshshi hundim hanqame» yita'a bakkiisso'o.

Kasasakko'i Woshshina Phaawuloos Dabachcha Uwwukkisa

10Ee lasage Phaawuloos wocoo'isina gassaanchi anginne moo'isukkaare Phaawuloosim «Ki'n ka minaadabina lobakat hiinchiinsi ki'isaa gassaanchi ikkakko'isa la'ummi bikkina ixxuwwi eese kasasso'i woshshina liiranchinne dabaroommo. 11An Waa'ina otosseena Yerusaaleema marummaanniinsi tommiinsii lam balliinsii lophphoobee'an ihukkisa laqqakkeena xantakkamo. 12Ixxuwwim an Keesammi Minennettem ihukko, wixxixxi minneewwannettem ihukko, beero'onnettem ihukko mat manchinnem wocamummuuyyi te'im manna hambalaachchummuuyyi eese amaddo'oyyo. 13Kabadem ixxuwwi eese kasasso'i luwwanne mahannem neegatteena xantamoyyo. 14Ihukkaarem an ka ixxuwwi ‹Qophpha'n googo› yitamoka Seerii hiraagaa'n kitaabbuwwii yookkoka hundam amma'nnaa niyyanno'i Waa'ina otossoomman ihummisa ki'nnena caakkisaa kureena hasoommo. 15Odim ixxuwwi amma'nnitamisam er keenoo jor keenoo Waa'i lehiinsi ki'isoo'isa anim amma'nnoommo. 16Ee bikkina an hundi ammanem Waa'i illagennee manni illagennee i tiir acceeqasoobee'i heechcha hee'eena yakoommo.

17 # Ass 21:17-28 «An Yerusaaleemiinsi firummaanniinsi lobakat hiinchiinsi lasage kiti'm diinatee i shumo'ina tasbo'oo amadaa Yerusaaleema daba'llaa waarummo. 18Ixxuwwi eese amaddo'ok an Seer ijaajoo'isinne Keesammi Minenne i gaga muccussaqqaa amadaa waarummi luwwa uwwonatteme bagaan manna hambalaachchummaareyyoo Seera gindummaareyyo. 19Ihukkaarem Keesammi Minenne an hee'onam Issiyiinsi waatta'a eekke'enne hee'llo'i mat mat Ayihuxxi manni eese kasassam luwwi yoolas keyye waatta'a ki'n illagenne kasassona.

20-21An ixxuwwi lambe'enne uullaa ‹An kaballa kasasamaa ki'nnuwwi illagenne hincummok leto'i keen lehiinsi ki'llamisa amma'nnummaanninatte› yaa shuurummaanniinsi bagaan dummichchi daannuwwi illagenne hincummi ammane eesenne siiddo'i bi'ishshi yoolas huno'o, kaba ixxuwwim kuttona» yukko.

22Filiksi Moollanni Yesuusika googo erisa qoossaa la'am hee'u bikkina Phaawuloosa kasasso'i keenina «Gaadaa'n ijaajaanchi Lusiyoos aad waaroo ammane ki'nnuwwi fitantakkam woshsha oogatoommo» yaa mattamisa issaa 23mat xibbi halaqichchina «Phaawuloosa qoxxitaa egere. Ixxi qarmanni ixxena hasisoo mat mat luwwa uwwiteena waattam ammane hoottitte» yaa Phaawuloosina hofqax wolabbanom uwwukko.

Phaawuloos Filiksaannonnee Diruusiil Illagennee Hincukkisa

24Mat qax ammaniinsi lasage Filiksi Ayihudichchotte hee'llo'i Diruusiile yakkam ixxi arenne maqirem waaraa Phaawuloosa weeshisaa woraa Yesuus Kiristoosanne amma'nnimmi bikkina Phaawuloosiinsi macceesukko. 25Phaawuloosim xabbeenoo'm bikkina, gaga ege'llimmi bikkinaa lasaanchonne mannanne Waa'i oogatoo oogaxxi bikkinaa kuru ammanenne Filiksi baddaa «Iina makku ammane weeshisoommo; kaba ihookko mare» yukko. 26Eehid yukkaarem Phaawuloos maqanxa uwwona hasaa hee'u bikkina dut ammane weeshisaa atoorassam hee'ukko. 27Lam hiinchiinsi lasage Filiksi beyyonne Barqiyoos Fisxoos gassaanchi ihukko. Filiksi Ayihuxxi manna liiranseena yaa Phaawuloos karamukkisam hee'ona urukko.

Currently Selected:

Asse'amaa'n Baxo 24: KeesKita

Highlight

Compare

Copy