Asse'amaa'n Baxo 23

1Phaawuloos dummichchi daannuwwa xuxxaa moo'aa «Iyyabbaayyuwwa, an Waa'i illagenne kaballi afeebe'em muccura» yukkaare 2ee ammane hundiinsi lob qeessichchi hee'u Hanaaniy ixxi gadanonne uullu keenina «Kannika suume aphphissehe!» yaa ijaajukko. 3#Mat 23:27 Phaawuloosim ee hundiinsi lob qeessichchina «At ka boorjo'o labakko'i gortanna labboohaanno!#23:3 Phaawuloos «At boorjo'o labakko'i gortanna labboohaanno» yookkok kiikki han danaamo labookko bagaan wor jora yimminatte. Waa'i keese aphphisookko! At Seer yoo'isanne oogatteena afuuttaa hee'llittuuyyi Seera ginditaa eese ‹Aphphissehe› yitoohonnihe?» yukko. 4Phaawuloos gadanonne uullita'a hee'llo'i keen «Waa'i doo'llaakkoo hundiinsi lob qeessichcho duuntoohonnihe?» yito'o.

5 # Doy 22:28 Phaawuloosim «Iyyabbaayyuwwa, hundiinsi lob qeessichchi ihukkisa an la'ummoyyo. Waa'i sagarim ‹Minaadaba gassaanchonne jora woccitte› yaakko» yukko.

6 # Ass 26:4 Phaawuloos ee dummichchanne hee'llo'i mannik kollii Saduuqaawe'i kollii odim Farisaawe'i ikko'isa la'u ammanenne «Iyyabbaayyuwwa, an Farisaawe'iinsi qaramaammoo Farisaawekkichcho. Kaba an oogato'ina hincummok ‹Lehiinsi kichchi yookko› yaa amma'nnummi bikkinatte» yaa shuuraa wocukko. 7Ixxi eekka wocukkisam Farisaawe'uwwaannonnee Saduuqaawe'i lambe'ennee woc ki'aa dummichchi lam ihukko. 8#Mat 22:23; Mar 12:18; Luq 20:27 Mashka'oomim Saduuqaawe'i «Lehiinsi ki'immi, Waa'i asse'amaanii ayyaanii bee'e» yitam hee'llo'o. Ihukkaarem Farisaawe'i oo hundim yoo'isa amma'nnitam keen hee'llo'o. 9Ee ammanenne malaayyaam woc firaa Farisaawe'i kolli manniinsi Seera losisaa'nnek mat mat keen shoottita'a uullita'a «Ka manchonne matem bi'ishsham siindummoyyo. Ixxena ayyaan te'im Waa'i asse'amaan kuraatette ihookko» yita'a qoxxaallisa fitanto'o. 10Woc lophphukkuuyyi maru ammanenne Phaawuloosa aphphissa'a shitamaannina gaadaa'n ijaajaanchi baddaa gaadaanina «Mattakka'a Phaawuloosa ixxuwwi lambe'iinsi malaayyinne fissitakka'a gaadaa'n qash woro massehe» yaa ijaajukko.

11La'm balli hiimonne Phaawuloos gadanonne Moollanni Yesuus uullaa «Phaawuloosa, baddititte! Ka Yerusaalee'm beero'onne i bikkina woccittisam Oroo'm beero'onnem i bikkina woccootto» yukko.

Phaawuloosa Shiteena A'llanto'isa

12Uulli soodaa lasage Ayihuxxi mannik mat qax wixxita'a «Phaawuloosa shinoo'n maham intoommoyyoo angoommoyyoo» yita'a hide'anto'o. 13Ee woshshanne mat ikka'a iittanto'i keen soriinsi lophphitam manni hee'llo'o. 14Ixxuwwim qeessi awwonsaa'n beyyoo lommanni beyyoo matta'a «Neese ‹Phaawuloosa shinoo'n hurbaata suumennem amandoommoyyo› yinaa hide'nnaammo. 15Ee bikkina dummichchi lommanninne maqirem ixxi woshsha lobakata saarayyitakka'a laqqakkeena hassakko'an issitakka'a Phaawuloosa ki'nnuwwi beyyo asse'oo'isina ijaajaanchi beyyo asse'llehe. Oo ijaajaanchi asse'oo ammane Phaawuloos ki'nnuwwi beyyo affoo'nnim neese googonnem shineena gundaammo» yita'a kutto'o.

16Ee woshsha Phaawuloosina aayyi beet macceesaa gaadaa'n qash woro maraa Phaawuloosina kurukko. 17Kuraa lasage Phaawuloosim xibbi halaqquwwiinsi mato weeshaa «Ku beet ijaajaanchina kuroo woshshi yoo bikkina ixxi beyyo hincaa'e» yukko. 18Ee bikkina oo xibbi halaqichchi ee beeto ijaajaanchi beyyo awwonsaa massaa «Karamaa yoo Phaawuloos eese ixxi beyyo weeshaa ‹Ku beet ijaajaanchina kuroo luwwi yoo bikkina ixxi beyyo masse› yaakko» yaa kurukko.

19Oo ijaajaanchim ee beetika anga amadaa tochchonne fissaa «At iina kutteena hassitti luwwi maruchcho?» yaa xa'mmukko. 20-21Oo beetim «Soriinsi lophphitam manni ‹Phaawuloosa shinoo'n maham intoommoyyoo angoommoyyoo› yita'a hide'anta'a gudda'a at asse'lleebe'e egetto'i bikkina Ayihuxxi manni Phaawuloosika woshsha lobakata saarayyita'a moo'llamoka labba'a soodo at Phaawuloosa dummichchi daannuwwi beyyo asse'llaa hincaa'lloo'isina keese xa'mmiteenatte. Ee bikkina at ixxuwwina ha'yyititte» yaa kurukko. 22Ee lasage oo ijaajaanchim «Ka woshsha eesenne kuttittisa ayyenam kuttitte» yaa ee beeto maroo'isa issukko.

Phaawuloos Filiksi Illagenne Hincukkisa

23Oo beet maraa lasage ijaajaanchi xibbi halaqquwwika lamo weeshaa «Hii'mmaannonne sas sa'aatanne Qiisaariya mattamisina gaadaanika bisa'a lade'u kee'nneka lam xibbee lamarayyi faradaanoo lam xibbi bagadaanoo gudissehe. 24Odim Phaawuloos saa'llaa gassaanchi Filiksi beyyo maroo gammaamo gudissakka'a xumminne massitakka'a afissehe» yukko. 25Oo ijaajaanchim

26«Lombi yoo gassaanchi Filiksina an Qalaawdiwoos Lusiyoos xummaato hincaa'oommuulla. 27Ka mancho Ayihuxxi manni shiteena amadda'a hee'llo'o. Ihukkaarem an gaadaaninne maqirem afaa ixxi Oroomekkichchi ihukkisa la'aa ixxuwwiinsi gatisaammo. 28Ixxo mahina kasassoda'e la'eena hasaa hee'ummi bikkina ixxuwwi dummichchi daannuwwi beyyo massaa hee'ummo. 29Ixxuwwi see'l bikkina ixxo kasasso'isa siidummo bagaan ixxo shisiisoo te'im kassiisoo luwwika ixxonne maham siidummoyyo. 30Ixxo shiteena ki'llo'isa macceesummi ammanenne kasassam keenim ki'nnenne kasassamisina an ixxuwwina kuraa ki'n beyyo asse'aammo» yoo assi kitaaba kitaabaa asse'ukko.

31Oo gaadaanim ijaajaanchi kurukkisinne Phaawuloosa hiimonne massita'a Antiphaaxira yakkam beyyo afisso'o. 32La'm balla Phaawuloosa faradaan massitona lokkaan utta'a gattam beyyo daba'llito'o. 33Oo faradaanim Qiisaariya affa'a lasage gassaanchina assi kitaaba uwwita'a Phaawuloosa ixxi illagenne hincaa'llo'o. 34Gassaanchim assi kitaaba qananaa'aa lasage Phaawuloosa «At hinka'i uulli mancho?» yaa xa'mmaa Kilqe'i uulli manchi ihukkisa la'u ammanenne 35«Keese kasassam keen waatta'a affa'a lasage ki woshsha moo'oommo» yaa adil Heeroodis baxisu minenne Phaawuloosa egettamisina gaadaano ijaajukko.

Currently Selected:

Asse'amaa'n Baxo 23: KeesKita

Highlight

Compare

Copy