Genesis 32
32
Jakob ge Esaub ǀkha ǀhaos ǃoa ra aiǂhomisen
1Jakob ge ǁîb daoba ge ǃgû tsî gu ge Elob di ǀhomǃgāga ge ǀhao-ū bi. 2Ob ge ǁîgab ge mû, o “Nēs ge Elob di ǂnubisa” ti mî tsî ǁnā ǃkhaiba Mahanaim#32:2 Mahanaim: Nēs ge Hebregowab ǃnâ ǀGam ǂnubira ti ra ǂâibasen. ti ge ǀonǂgai.
3ǁNās khaoǃgâb ge Jakoba sîsabega ǁîb aiǃâ ǁîb di ǃgâsab, Esaub ǁga ge sî Seirǃhūb, Edomǃhūǀkharib dib ǃoa. 4Tsîb ge ǁîga ge mîmā: “Nēti go ge sī ti ǀhonkhoeb, Esauba nî mîba: ‘Sa ǃgāb, Jakob ge “Tita ge Labanni tawa ge hâ i nēsis kōse. 5Goman tsî dâukin, gūn tsî pirin, aore tsî tare ǃgān tsîna ta ge ūhâ. O ta ge nē haisisa nēsi ti ǀhonkhoeb ǃoa ra sî, ǁîb nî ǃgâiǂâiba tese” ti ra mî.’ ”
6Oahā gu ge o gu ge sîsabega Jakoba ge mîba: “Sa ǃgâsab, Esaub tawa ge ge go sī hâ i, tsîb ge ǁîba sats ǀkha nî ǀhaose hakakaidisi khoegu ǀkha ǃgoaxa.” 7Jakob ge kaise ǃao tsî ge ǂâiǂhansen. Ob ge ǀgam ǃgubira ǃnâ ǁîb ǀkha ge hâ i khoen tsî ǁkhāti gūn, pirin, goman tsî ǃnaina ge ǀgora. 8“Esaub ga hā tsî ǀgui ǃgubis di khoena ǁnāǂam, on kom nauna a ûiǂoa ǁkhāo” tib ge ǁîb ǃnâ ǂâi xui-ao.
9Tsîb ge Jakoba ǁnās khaoǃgâ nēti ge ǀgore: “Ti ǁnaob, Abrahammi tsî ti îb Isaki di Elotse, sats ǃKhūts, tita ti ǀaokhoen tsî khoexakhoen di ǃhūb ǃoa ta nî ǁaru ǃkhaisa ge mîbats ge hoaraga xūn nî tita ǀkha ǃgâise ǃgû ǃkhaisa nî mâǃgao. 10Hoaraga ǃgâisib tsî ǂgomǂgomsasib, sats go tita, sa ǃgāta ǁgauba ta ge anu tama hâ. Tita ge ǁgâibasenhaib ǀguib ose xū-i xare-e ūhâ tamase Jordanǃāba ge ǃgâu, xawe ta ge nēsi nē ǀgam ǃgubira ǀkha go oahā. 11O ta ge ra ǀgore, ti ǃgâsab Esauba xuts nî sâu te ǃkhaisa. Tita ge sida ǁnāǂam tsîb nî taradi tsî ǀgôan tsîna ǃkhōǂgā hâse hîkākāseb ǃgoaxa ǃkhais di ǃaoba ūhâ. 12Sats kom ‘Tita ge satsa ǃgâidī tsî sa suriba hurib di ǃhūb, ǃgôahe ǁoab khami nî ǂguiǂgui’ ti ge mîo.” #Gen. 22:17
13ǁÎb ge ǁnā tsuxuba ǁnāpa hâ tsî ūb ge hâ i xūna xu Esauba ǀkhaexū-e ge ūba. 14ǁÎb ge ǀgamkaidisi piridi tsî ǀgamdisi ǂkharapirigu, ǀgamkaidisi gūdi tsî ǀgamdisi baigu, 15ǁîdi di ǂkhamron ǀkha hâ ǃnonadisi ǃnaidi, hakadisi gomadi tsî disi ǁgōgu, ǀgamdisi dâukidi tsî disi dâukigu tsîna ge ū. 16ǁÎb ge mâ ǀgoaǃnôa-i hoa-e ǀguipa hâse ǃgāna mā tsî ge mîba: “Ti aiǃâ ǃgû î ǀgoan ǁaegu soaga dī re.” 17Tsîb ge ǂguro ǃgāba ge mîmā: “Ti ǃgâsab Esaub ga ǀhao-ū tsi tsî ‘Tariba a sa ǀhonkhoe? Mâǀîts garu? Tari-i di ǀgoana nē sa ais ai garuna?’ ti dî tsi 18ots ge ‘ǁÎn ge a sa ǃgāb, Jakob di. ǁÎb ge ǁîna ǀkhaexūn ase ǁîb ǀhonkhoeb Esauba go sîba. ǁKhātib ge Jakob ǂûb tsîna sige ǃgâb ai hâ’ ti nî ǃeream.” 19ǁÎb ge ǁkhā ǁguiǂamsa ǀgamǁîb tsî ǃnonaǁîb tsî naugu hoagu hîa ǀgoana doeǁgā hâga ge mā: “Nēti go ge Esauba ǁîb ǀkha go ga ǃoagu o 20‘Sa ǃgāb Jakob tsîn ge sige ǃgâb ai ǃgoaxa’ ti nî mîba.” Jakob ge ǁîb ǃnâ ge ǂâi: “Nē ta ti aiǃâ ra sî ǀkhaexūn ǀkha ta ge ǁîba nî ǃgēǃgē, ob kom ǀnîsi ǁîkhom ga ǀhao, o nî ǀûba te o.” 21Tsîb ge ǀkhaexūna aisî tsî ǁnā tsuxuba hâǃkhaib tawa ge ǁom.
Jakob ge Peniels tawa ra ǃkham
22ǁNā tsuxub ǂûb ǃnâb ge Jakoba khâi tsî ǁîb tarara, ǁîb ǃgāra, ǁîb di disiǀguiǀa ǀgôan tsîna ū tsî Jabokǃāb di ǃgâuǃkhais tawa ge ǃgâu-ū. 23ǁÎnab ge ǃgâu kais khaoǃgâb ge ǁkhāti hoaraga xūn ǁîb din tsîna ge sîǃgâu, 24xaweb ge ǁîba ǀguri ge hâǃgau.#Hos. 12:3-4
O-i ge ao-i ǁîb ǀkha ge ǁgoaǂnobos kōse ǃkham-e ge ǂhai. 25Jakobab ǃkhamdan ǁoa ǃkhaisab ge mû ob ge nē khoeba Jakoba ǂnamis ai ge ǂnau tsîs ge ǂnamis âb di uniǁaesa ge ǃoe. 26Tsîb ge ǁîba Jakoba ge mîba: “ǁNāxū te re, ǁgoaǂnobos ra ǁhai xuige.”
Ob ge Jakoba “Tita ge satsa ǀkhae te tamats hâ hîa ǁnāxū tide” ti ge ǃeream.
27Ob ge khoeba “Mâtits ǀon hâ?” ti ge dî.
Ob ge “Jakob” ti ge ǃeream.
28Tsîb ge nē khoeba Jakoba ge mîba: “Sa ǀons ge ǃaruǀî Jakob ti hâ tide. Sats goro Elob tsî khoeb ǀkha ǃkham tsîts go dan xui-aots ge Israel#32:28 Israel: Nēs ge Hebregowab di ǁÎb ge Elob ǀkha goro ǃkham tamas ka io Elob goro ǃkham ti hâ mîs khami ra ǀō. ti nî ǂansa.”#Gen. 35:10
29Ob ge Jakoba ge mî: “O nēsisa mâtits ǀon hâ ǃkhaisa mîba te re.”#ǂHǂh. 13:17-18
Ob ge nē khoeba Jakoba “Tare-i ǃaromats ti ǀonsa ra ǂan ǂgao?” ti ge dî.
30Jakob ge “Eloba ta go aisa xu ais ǃoa mû xawe ta ge noxopa a ûitsama” ti mî tsî ǁnā ǃkhaisa Peniel#32:30 Peniel: Nēs ge Hebregowab di Elob ais khami ra ǀō. ti ge ǀonǂgai. 31Penielsa xub ra Jakoba, ǂnamis âb ǃnâ ra ǀīse ǃkharu hîas ge soresa ge ǁhaiǂam bi. 32Nētsēs kōsen ge Israelǁîna ǁgan-en ga ǂû, o ǂnamis di uniǁaes ǁapaga ǂû tama hâ, Jakob ge ǁnāpa ǂnauhe xui-ao.
Currently Selected:
Genesis 32: KKG20
Highlight
Copy
Compare
Share
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
