Luka 24

Yɛsu usuubuka

(Mat 28:1-10; Mali 16:1-8; Yɔa 20:1-10)

1Mɛkyɛɔ yee lusu lwe yinga baa babakachi na koyaka ko manda, kwasie malasi masangya abɔ. 2Bakee njɔɔ na kɔmɔa iwɛ lwachiba abɔ ko manda lisusukwewa mɔsɛɛsɛ mwe mukinda. 3Abɔ na kwingea monda, ndebabanga mobee wa Mwaame Yɛsu. 4Abɔ bakee mu kwibocha lee ikomo, bando babee babwaa ngubɔ chakɛnya na koemaa kombaa kwabɔ. 5Abɔ basɛ na kuungwa bɔɔba na kɔlɔla mo matɛkɛ. Baa bando na kobasaolea itɛ: «Ko booni kotoenga baanu oe mwɛchɔ mwingya mwe bakwo? 6Ndaekee ana, usuubuka. Mwitunduche bia bya basaoleaya awɛ alya okee Kalilaya: 7Bitokoka ne Mwaana we Mondo oochiwe mo mabɔkɔ me bando babea, osongeekiwe, ne uubuke mo masu masato.» 8Abɔ na koeyoka mɛɔcha ya Yɛsu.

9Abɔ na kɔɔtɔka kotoka ko manda, na koyasaola maa makomo masɛ ko baa ikumi na ɔmɔɔsa, ne ko ndomwa chikinɛ. 10Babɛchaya ne: Malia we Makitala, Sanɛ, Malia, ina Yakɔbɔ, na baa babakachi bakinɛ, babɛchaya naakɛ, na koolecha bwakaɛ ilɔngɔ ko ndomwa. 11Alakini baninga itɛ bitɔɔcha abɔ bie ne byebokata, na baba ndebaimenya. 12Pɛtɛlɔ na kobangoa mbeo koya ko manda. Koyaingea, kyayasanga awɛ ne ngubɔ chabweka abɔ ketomba, awɛ na kɔɔtɔka mo kokanakana biisɛ byaeteka.

Yɛsu ɔsɔmɔɛka ko baeyechwa bamɔchi

(Mali 16:12-13)

13Lwakaɛ loa lusu, ndomwa chibee chaeyechaya ko kalya kaitanewaya Emausi, ilɛba le ɔbɛɛ bilomɛtɛlɛ ikumi na bibee ne Yɛlusalɛma. 14Abɔ na bae mɔ kɔchɔbɔa makomo masɛ maeteka. 15Bakee mɔ kɔchɔbɔa ne kochombya ngani chabɔ, Yɛsu mwɛɛnɛ na kobaisɛnɛa na kosambea nabɔ njea. 16Miisɔ mabɔ mamɔmɔa alakini keemo kɛmɔɔsa kyabachibea baamochebaya.

17Yɛsu na kobabocha itɛ: «Mɔtɔchɔbɔa ko leke ikomo?» Abɔ na kwimana mo koemoka. 18Ɔmɔ waabɔ we chiina lya Kɛlɛɔpa, na komosaolea itɛ: «Oe ne ingaa mɔ Yɛlusalɛma metondoo, otaasi kocheba ikomo lesoeteka mano masu?» 19Awɛ na kobabocha itɛ: «Bike bisoeteka?»

Abɔ na komosaolea itɛ: «Mae ne makomo maetekee Yɛsu we Nasalɛti. Wabɛchaya ndɛnda mekoo ya Kakua, wabɛchaya nɛ bɔkɛtɛ mɔ mɛɔcha ne mu bikete kombaa kwa Kakua ne kombaa kwe bando. 20Bakoo be basia ne bakoo biito bɛ mɔsɛngɛ bamolamboa kɔ kɔbɛmba makomo maakɛ me kokwa. Kubɔngɛɛ na komosongeeka ko mote we maakanu. 21Bae twabɛɛ tosobaela itɛ awɛ ne otaolose Baisilaɛli. Alakini, leno masu masato maokoka, aetekee elya myanda. 22Kabee bye kokanyakanya ne, bamɔ baabakachi be ketongo kiito batukuumunyee. Bayee ko manda mɛkyɛɔ, 23alakini ndebasanga ketomba. Abɔ na kɔɔtɔka kwatosaolee itɛ bakumbakanee ne molendo we kɔmɔa meombo, ebasaolee kiinɛkinɛ itɛ oe mwɛchɔ. 24Kusia boa, bamɔ ko baa babɛɛ niito, na koya bwakaɛ ko manda, na koyasanga makomo bwakaɛ boa bo saolee baa babakachi; alakini abɔ ndɛbamɔmɔa.»

25Yɛsu na kobasaolea itɛ: «Banu bando bataasi ne lokani, batɔtɛa metema ku kwimenya biisɛ byaɔcha ndɛnda cha Kakua. 26Bitokoka Masia okonje mama manɛnɛ kombaa kwe awɛ kwingea mo boombe bwakɛ.»

27Kusia Yɛsu na kobasaolea makomo makunyewa ko mbanga yaakɛ mu Tuchimba tɔɔsɛ twa Ama. Kobangoea ko mekanda ya Musa, ne koolea ko mekanda yee Ndɛnda chiisɛ cha Kakua.

28Aba abɔ bangaolea mo kalya kayeela abɔ, awɛ Yɛsu na kɔmɔɛka boe oe mo koya njɔɔ. 29Baa baeyechwa na kumwisingea itɛ: «Chikaa niito chooba lesoya, ne butu bungaila.» Awɛ na kwingea mo ndabo na kuchikaa nabɔ. 30Basɛ na kuchikaa na Yɛsu mo kolya. Awɛ na kotomba mukati, na kɔɔcha boa kwa Kakua, kusia na kubuka na kɔbaɛcha. 31Akaɛ alya miisɔ mabɔ na kobooloka na batomocheba! Alakini Yɛsu na kobachimbea, ndebamɔmɔa kabee. 32Abɔ na kobangoa kwiɔchɛa itɛ: «Bieko! Abɛɛ awɛ mɔ kɔɔcha niito mo njea, ne kotosaolea makomo me Tuchimba twa Ama, metema yiito na kochaa nɛ kɛmɛmɔ!»

33Abɔ na kotaoka ko kyakaɛ kea kyanya, ne kɔɔtɔka ko Yɛlusalɛma. Na batoyasanga baa ndomwa ikumi cha Yɛsu ɔmɔɔsa ne bando bakinɛ be ndongo yaabɔ. 34Baa basɛ basangwa ne kosaolea baa baeyechwa babee itɛ: «Bieko kiinɛkinɛ, Mwaame wiito usuubuka! Omoolee Simɔni.» 35Baa baeyechwa babee na abɔ, na kosaolea banjinabɔ maɔngɔ mauungwee abɔ ne booni bochebee abɔ Yɛsu abɛɛ awɛ mu kubuka mikati.

Yɛsu osobaolea baeyechwa bakɛ

(Mat 28:16-20; Mali 16:14-18; Yɔa 20:19-23; Ndo 1:6-8)

36Bakee mɔ kɔchɔbɔa maa makomo, Yɛsu mwɛɛnɛ na kɔmɔɛka mwingya mwabɔ, na kobasaolea itɛ: «Nyaa iongwe niinu!» 37Abɔ na kuungwa bɔɔba ne kamiona, mu kuninga itɛ bamoɛchi mukinje. 38Yɛsu na kobasaolea itɛ: «Ko booni kutuungwa baanu ne keangaa nɛ kwikakanya? 39Mɔtalɔla manja maanɛ nɛ tɔbɛya twanɛ, ko baanu kocheba itɛ mee na oono. Mɔngɔbɔchɛ nɛ kɔndɔla! Kɔmɔa mukinje uusi ne misunɛ ne makua bobo bɔtɔmbɔa baanu.#24:39 Yɛsu waocha bɔbɔ kokoenga baeyechwa bamɔɛ bibangwa bye misumali mo manja nɛ mɔ tɔbɛya twakɛ. Wakonda baimenye itɛ ne awɛ kiinɛkinɛ.» 40Asia Yɛsu koocha bia, na kɔbamɔɛsa manja maakɛ nɛ tɔbɛya. 41Baa baeyechwa ndebaimenya kɔ kɔmɔa baba nɛ kɛmɛmɔ ne kokanakana, ko boa, awɛ na kobabocha itɛ: «Moe ne byekolya?» 42Na batɔmɔɛcha kyunda kye mwɛa kɛ kɔɛkɛlwa. 43Na kukibunda, na kokelya mu miisɔ mabɔ.

44Kusia ne otobasaolea itɛ: «Abɛchaya mee niinu amɔɔsa, nabamosaolea itɛ, makomo maochiwa ko mbanga yaanɛ mo Salia ya Musa ne mo mekanda yee Ndɛnda cha Kakua, ne mo mokanda wa Nembo, biitowaena biisɛ koolea.» 45Ko boa Yɛsu na kobachiboa ngani chabɔ, kɔmɔa bachebe Tuchimba twa Ama. 46Na kobasaolea itɛ: «Bitukunyiwa mu Tuchimba twa Ama, itɛ Masia okonje manɛnɛ ne kuubuka lusu lwa sato kɔmɔngɔ kwe kokwa kwakɛ.#24:46 Yɔɔla Isa 53:1-12; Ɔsɛ 6:2. 47Byakunyiwa bwakaɛ boa, ku chiina lyaakɛ batasaolee mɔsɛngɛ maɔngɔ, kobangoa Yɛlusalɛma, kɔmɔa batuuluke kotoka ko bwabea bwabɔ ne koboebeela. 48Baanu ne batasaolaye bitocheba banu ko eena meanda ɛsɔmɔa banu. 49Mee mwɛɛnɛ ndamotomee byamolaa Isanɛ. Motaendeche mo kalya ke Yɛlusalɛma ɛka atachekwe manu nɛ bɔkɛtɛ kotokea kwiyoo.»

Yɛsu osoendwa mwiyoo

(Mali 16:19-20; Ndo 1:9-11)

50Kusia Yɛsu na koola ne baeyechwa bakɛ mo kalya kɛ Yɛlusalɛma, na kobachaa mɔsɛɛsɛ mwe kalya ke Bɛtania. Aolea abɔ alya, awɛ na koendoa mabɔkɔ mwiyoo, na kobatwamboela. 51Awɛ mo kobatwamboela ne otosambokana nabɔ ne koendwa kwiyoo. 52Ko mbanga yaabɔ, abɔ na kwiyaya, nɛ batɔɔtɔka Yɛlusalɛma, metema bɛɛ ne kɛmɛmɔ. 53Alya, masu masɛ ne bae mɔ Ɛkalu mo koseka Kakua.

Currently Selected:

Luka 24: ZMB

Highlight

Compare

Copy