Luka 22

Kakongo ke kuchia Yɛsu

(Mat 26:1-5; Mali 14:1-2; Yɔa 11:45-53)

1Abɛa lusu lwe ketokoyoo kye mikati etaasi ne bisunga bye komeembya#22:1 Mo kee ketokoyoo, Bayula baeyoka lusu lwatoka abɔ mo boocha ku Misili. Lɔlɔ lusu ndebatɛcha bisunga mu mikati kɔmɔa babɛchaya mo lobeo, ndebaɔsɔna koendecha batɛchɛ bisunga bye koembya mikati. itwitaniwa Pasaka ingaolea. 2Bakoo be basia ne baeyechi be Salia na koenga meke njea yee kuchia Yɛsu, abɔ na koongwa nɛ bɔɔba bwe bando.

Yula uswimenya kolamboa Yɛsu

(Mat 26:14-16; Mali 14:10-11)

3Alya ne aingea Isombo mo motema wa Yula waitaniwaya Isikaliɔta, ɔmɔ mo chia ndomwa ikumi na babee. 4Yula na koya kwaungwane ne bakoo be basia ne bakoo be basangi be Ɛkalu ko njea yee awɛ kobalambolea Yɛsu. 5Basɛ na kwimɛma na kuungwana kɔ kɔmɔɛcha tombaambaa. 6Yula na kuimenya akaɛ alya na kobangoa koenga njea ya kolamboa Yɛsu kwabɔ ku bwise.

Yɛsu osolya ketokoyoo kye Pasaka ne baeyechwa bakɛ

(Mat 26:17-25; Mali 14:12-21; Yɔa 13:21-30)

7Lusu lwe ketokoyo kye mikati etaasi kɔtɛchiwa bisunga bye komeembya na koolea. Loa lusu lwawaena koyengoa mɔkɔkɔ we Pasaka. 8Yɛsu na kotoma Pɛtɛlɔ na Yɔana na kobasaolea itɛ: «Moya kwa sangye biebwa bye ketokoyoo kye Pasaka.» 9Abɔ na komobocha itɛ: «Otokonda tomesangyee koni?» 10Awɛ na kobasaolea itɛ: «Ataingee banu mo kalya kakoo, motasange mondo ɔmɔ oe mo kochaa kebongo kye maache, momoyee ko ndabo elya etaingee awɛ. 11Motasaolee mwɛɛnɛ we elya ndabo itɛ: ‹Mweyechi otokobocha itɛ koni koe sebula letalee awɛ ketokoyoo Pasaka ne baeyechwa bakɛ.› 12Ko boa, otabaangoeche iboa lye monganda, liusia kosangiwa bwaachi alya ne atasangye banu ketokoyoo kye Pasaka.»

13Abɔ na koya, na kobanga biisɛ boa bwa ɔsɔɔcha Yɛsu, na kosangya ketokoyoo kye Pasaka.

Ketokoyoo ke biebwa bye koeyoka Mwaame

(Mat 26:26-30; Mali 14:22-26; 1 Kɔl 11:23-25)

14Aolea kea kyanya, Yɛsu na kuchikaa mo kolya ne ndomwa chaakɛ. 15Awɛ na kobasaolea itɛ: «Naekyee byabua kolya niinu biebwa bye Pasaka kombaa kwe mee kokonja manɛnɛ. 16Ko boa, natomosaolea, sikale kabee ketokoyoo kye Pasaka ɛka loa lusu lotale mee elya yee kiinɛkinɛ mo boombe bwa Kakua.»

17Kusia na koenda kebacha, na kosekoa Kakua itɛ: «Moende keke kebacha, moabanye asambea baanu, 18kɔmɔa natobasaolea banu itɛ sikasɔɛ kabee lifai ɛka ataolee boombe bwa Kakua.»

19Kɔmɔngɔ na koenda mukati na kosekoa Kakua, na kumubuka ne kobaabanyea mɔ kɔɔcha itɛ: «Lolo ne lɔkɔba lwaanɛ [losoochiwa ko mbanga yiinu. Moketaye bobo ko kongeyoka.»

20Kusia kolya, na koenda kabee kebacha, na kɔɔcha itɛ: «Keke kebacha ne ilai leyaleya lya Kakua koetea masi maanɛ mataiteke ko mbanga yiinu.]#22:20 Kobangoa keba kye bɔlɔlɛɔ bwe 19 nɛ kɔbɔngɛa ku 20 biisi mo byakunyiwa kombaa. 21Mɔlɔlɛ naanga na olya otambanje oe ana mo kolya amɔɔsa naanɛ. 22Kiinɛkinɛ mee Mwaana we Mondo ndakwe ko boa bwakonda Kakua, alakini mayombe ko olya mondo otanamboe!» 23Ko boa ndomwa na kobangoa kwibocha asambea abɔ ko kocheba naani otakete ikomo bwe lɛlyɔ.

Naani oe mokoo asambea baeyechwa ba Yɛsu?

24Kusia baeyechwa ba Yɛsu na kobangoa meango asambea ko kocheba ne naani mokoo asambea abɔ. 25Yɛsu na kobasaolea itɛ: «Binombe be mɛsɛngɛ baanga konyaa bando babɔ kɔ bɔkɛtɛ, na baa batonyaa batwitana ‹batoketa byaachi›. 26Biisi bwaachi baanu koongwa boa. Biitowaena olya oe mokoo asambea banu, bie bwaachi ɔmɔɛkɛ mɔkɛɛkɛ. Na olya oe mokoo asambea banu, biitowaena ɔmɔɛkɛ boe mokambi wiinu. 27Ko boa, naani oe mokoo kokoela munjinakɛ? Na olya oe mo kolya ɔbɛɛ olya otomosangyea biebwa? Ko boa mee nae asambea banu boe mokambi wiinu. 28Banu nɛ babɛɛ naanɛ amɔɔsa kɔ kɔɛlɛkiwa kwanɛ. 29Boa bombekee Isanɛ boombe, na mee nasobabekea abɔ. 30Kɔmɔa motale nɛ kɔsɔa amɔɔsa naanɛ mo boombe bwaanɛ. Bwakaɛ, banu ne batachikane mo bipamba kɔ kɔbɛmba makomo me biɔngɔ ikumi na bibee bye Isilaɛli.»

Yɛsu osochekya itɛ Pɛtɛlɔ otamotone

(Mat 26:31-35; Mali 14:27-31; Yɔa 13:36-38)

31Yɛsu na kosaolea Simɔni itɛ: «Simɔni, Simɔni! Ungwa: Isombo lɛɛngɛlɛɛ njea yee kobapɛpa bɔtɔpɛpa abɔ tumuka. 32Mee, nabɛɛ mukwiyaya kwa Kakua ko mbanga yao, kɔmɔa nduchimbechaya iekekeo. Na awɛ ataɔtɔkɛ awɛ kwanɛ kabee, sekemeka babotwa nao.» 33Pɛtɛlɔ na komosaolea itɛ: «Ee Mwaame, nae bwisangye kwingea mo kekako amɔɔsa nao naa ne kokwa ko mbanga yao.» 34Yɛsu na komosaolea itɛ: «Kiinɛkinɛ natokosaolea, ɛɛ Pɛtɛlɔ, leno kombaa kwe ngɔkɔ kobeengana otabɛ osondona ngongobwa chisato, itɛ ndotonjeba.»

Tombaambaa, lokombo nɛ kɛyɔma

35Kusia Yɛsu na kobocha baeyechwa bakɛ itɛ: «Alya amotomee mee kotasi tombaambaa, ɔbɛɛ lokombo, ɔbɛɛ bilato, moenee eke?» Abɔ na komosaolea itɛ: «Imbɔɔ.» 36Kwibɔngɛɛ na kobasaolea itɛ: «Ko leno, olya oe ne tombaambaa twakɛ, oende, ne oe ne lokombo, oloende, ne olya otaasi nɛ kɛyɔma, oolekye ngubɔ yaakɛ na kokeola. 37Kiinɛkinɛ natobasaolea bie bwaachi itɛ maa makomo makunyewa mu Tuchimba twa Ama mangolelee. Na maa makomo matɔɔcha itɛ: ‹Bamobaekee amɔɔsa ne batoketa bwabea.#22:37 Yɔɔla Isa 53:12.› Kɔmɔa makomo matɔndɔa, mangaolea kɔ kɔbɔnga kwamɔ.» 38Baeyechwa bakɛ na komosaolea itɛ: «Ee Mwaame, toe ne mbao chibee.» Awɛ na kobasaolea itɛ: «Chiokoka.»

Yɛsu usuiyaya kwa Kakua ko keembe kye Misɛituni

(Mat 26:36-46; Mali 14:32-42)

39Yɛsu na koola na koya ko keembe kye Misɛituni, bwaketaya awɛ. Baeyechwa bakɛ na komoyea. 40Aolea awɛ ko lea iboa, awɛ na kobasaolea itɛ: «Mwiyaye kwa Kakua, kɔmɔa mɔɛlɛkiwaya.» 41Kusia na kɔbaisɔka mu ilɛba lye kokosoa ngone. Na kɔkɔma malu makɔngɔ ne kwiyaya bobo: 42«Ee Isanɛ, wasokonda, ndosea kebacha ke mama manɛnɛ! Ataasi kokonda kwanɛ koketeke, kokonda kwao.» [43Kusia ɔmɔ moombo na koba kwiyoo na kumwikea nɛ kɔmɔɛcha motema. 44Yɛsu na kuungwa lobaba lwatɔba, na kɔtɛcha kwiyaya ne motema we bosongo, byɛmɛnya na kumwiteka mo matɛkɛ boe matɔkɔchi me masi.#22:43-44 Kobangoa bɔlɔlɛɔ bwe 43 na kɔbɔngɛa ku 44 biisi mo byakunyiwa kombaa.]

45Asia awɛ kwiyayaa, na kotaoka ne kɔɔtɔka kabee kwabɛchaya baeyechwa bakɛ na kobasanga basɔkyɛsa, kɔmɔa babɛchaya ne kelele ko metema. 46Na kobabocha itɛ: «Ko eke kɔtɔkyɛsa banu? Mobwoke ne kwiyaya kwa Kakua mwingeaya mɔ kɔɛlɛkiwa!»

Kubundwa kwa Yɛsu

(Mat 26:47-56; Mali 14:43-50; Yɔa 18:3-11)

47Yɛsu wabɛa ndanasiecha kɔɔcha, lɔla, ndongo mekataa na koolea, kombaa. Kombaa kwabɔ kwaba Yula ɔmɔ ko baa ikumi ne babee, na kumwisɛɛnɛa Yɛsu itɛ ɔmɔɛnyɛ. 48Yɛsu na komosaolea itɛ: «Yula, osonamboa mee Mwaana we Mondo ko njea yɛ kɔɛnya?»

49Baa baeyechwa, amɔa abɔ makomo mangaketeka, na kobocha Yɛsu itɛ: «Mwaame, tɔbabɛmbɛ nɛ biyɔma?» 50Ne akaɛ alya, ɔmɔ waabɔ na kokomoa mokambi we Musia Mokoo ne kɔmɔbɛmba itwe lyaakɛ lee saa ndome. 51Yɛsu na kobasaolea itɛ: «Mɔlɛkɛɛ! Bia biokoka!» Kusia na kɔkɔbɔcha itwe lya olya mondo wabɛmbiwa, na komoolola.

52Kusia Yɛsu na kutulukea akaɛ ko bakoo be basia, ne bakoo be basangi be Ɛkalu ne bakoo bɛ mɔsɛngɛ we Bayula baa babaka kwamubunde itɛ: «Mosobaka ne biyɔma, nɛ mɛnɔmbɔ boe bae mo koya kwabunde ngiba? 53Nabɛchaye niinu masu masɛ mɔ Ɛkalu, naa ne mondo ɔmɔ ndambunda; keno kyanya ne kinu, kabee ne kyanya ke konyaa ke mokoo we ikunyɛ.»

Pɛtɛlɔ osotona Yɛsu

(Mat 26:57-58,69-75; Mali 14:53-54,66-72; Yɔa 18:12-18,25-27)

54Ko boa abɔ kumubunda Yɛsu ne komochaa mo ndabo ya Musia Mokoo, Pɛtɛlɔ na komoyea kwɛ njɔɔ. 55Mwingya kyambaa kye Musia Mokoo bakɔcha toya. Bando bachikanaya mɔ kɔɔndaa, Pɛtɛlɔ na awɛ wabɛchaya nabɔ. 56Ngambi ɛmɔ yee mwamokachi na kɔmɔa Pɛtɛlɔ mɔsɛɛsɛ mwe toya. Awɛ kɔmɔkɛngɛyɛa na kɔɔcha itɛ: «Mɔlɔlɛ ona na awɛ wabɛchaya amɔɔsa naakɛ.» 57Pɛtɛlɔ wakɔna nɛ kɔɔcha itɛ: «Ɛɛ nɛnɛ, sitocheba ona mondo.»

58Kɔmɔngɔ, mondo ukinɛ, na kɔmɔa Pɛtɛlɔ na komosaolea itɛ: «Awɛ akaɛ oe ne ɔmɔ waabɔ!» Pɛtɛlɔ na kɔɔcha itɛ: «Mee siisi ɔmɔ waabɔ!»

59Abe abe koolea keeko kɛmɔɔsa, ukinɛ mondo na kumusingeesha ne mɛɔcha itɛ: «Kiinɛkinɛ, ona mondo wabɛchaya amɛamɔɔsa naakɛ; kɔ kɔmɔa awɛ oe ne mondo wɛ mɔsɛngɛ we Kalilaya.» 60Pɛtɛlɔ na kɔɔcha itɛ: «Sitocheba bie awɛ mɔ kɔɔcha!» Akaɛ alya okee ndanasia kɔɔcha, moome we ngɔkɔ na kobeengana. 61Mwaame na kutuuluka na kɔlɔla kwee Pɛtɛlɔ. Pɛtɛlɔ na koeyoka bya mosaolea Mwaame itɛ: «Kombaa kwe moome we ngɔkɔ kɔbeengana, ɔtabɛ osondona ngongobwa chisato.» 62Pɛtɛlɔ na koola anjɛ yee kyambaa mo kolela kwe lobaba.

Bando baɔkyɛta Yɛsu

(Mat 26:67-68; Mali 14:65)

63Baa bando basanga Yɛsu na kɔmɔkyɛta ne komokomoa. 64Na kumuchiba miisɔ na komobocha itɛ: «Ɔɔcha, ne naani okokomoee?» 65Na kumusia lɔkɔba nɛ bitɔndɛ.

Yɛsu kombaa kwe keboo kekoo kye Bayula

(Mat 26:59-66; Mali 14:55-64; Yɔa 18:19-24)

66Akya butu, bakoo be Bayula, ne bakoo be basia ne baeyechi be Salia na kukumbakana. Bando na kochaa Yɛsu kombaa kwe keboo kekoo kyabɔ. 67Baa bakoo na komobocha itɛ: «Kende awɛ ne Masia, tosaolea.» Yɛsu na kobasaolea itɛ: «Kende nasobasaolea mookangimenye, 68na mee kende nasomobocha ikomo mookanjaolee. 69Kobangoa keno kyanya, mee Mwaana we Mondo ndachikane kombanga yee saa ndome ya Kakua we Bɔkɛtɛ.» 70Basɛ na komobocha itɛ: «Awɛ ne Mwaana wa Kakua?» Awɛ na kobasaolea itɛ: «Baanu bɛɛnɛ ne basɔɔcha.» 71Kwibɔngɛɛ abɔ na kɔɔcha itɛ: «Totaenge kusingeecha eke kabee? Tusuiyungwea bae bɛɛnɛ mɛɔcha yaakɛ mwɛɛnɛ!»

Currently Selected:

Luka 22: ZMB

Highlight

Compare

Copy