Luka 16

Ngambi yee lokani

1Yɛsu na kɔtɛchɛa kabee baeyechwa bakɛ keke kisimu itɛ: «Kwabɛchaya ɔmɔ ngonji wabɛchaya ne mosangi wɛ byɛndɔ byakɛ. Bando na kosaolea elya ngonji itɛ mosangi wɛ byɛndɔ byao usubiɔna. 2Kɔ bɔbɔ, mwɛɛnɛ wɛ byɛndɔ na kumwitana na komosaolea: ‹Bike bituungwa mee kombanga yao? Mbaekea byɛndɔ byaanɛ biisɛ, sikakusie kabee awɛ koongwa mɔsangi wɛ byɛndɔ byaanɛ.›

3«Mosangi na kwiɔchɛa: ‹Ndakete booni, kɔmɔa mokoo waanɛ we meemo ungandikita koemanea byɛndɔ byakɛ. Ndakete booni? Kɔtɛma? Sikaɔsɔnɛ. Nachikae mɔ kɔɛngɛa? Naungwe masɔni. 4Nasoeyoka bitakete mee! Atalikitwe mee ko meemo yaanɛ yee koemanea byɛndɔ, bando bangimenye ko maabo mabɔ.›

5«Kusia boa, awɛ na kwitana ɔmɔ ɔmɔ ko baa basɛ baongwa nɛ malɛni me mokoo waakɛ. Awɛ na kobocha we kombaa: ‹We ne lɛni lye chinga ko mokoo waanɛ?› 6Na awɛ itɛ nae ne mangunguu lokama me makuta me misɛituni. Olya mosangi wɛ byɛndɔ na komosaolea: ‹Bunda kaani kao kɛ lɛni, chikaa chaa chaa ase, kunya makumi matanu.› 7Kusia na kobocha ukinɛ: ‹Na awɛ wee nɛ lɛni yee chinga?› Awɛ itɛ masaki lokama me bonga bwe ngano. Olya mosangi wɛ byɛndɔ na komosaolea: ‹Bunda kaani kao kɛ lɛni, kunya masaki makumi kinaanɛ.› 8Mokoo na koseka olya mosangi wabea wɛ byɛndɔ ko boa bwakamba awɛ ne lokani. Kɔ bɔbɔ, bando ba kee keeko bae ne lokani kwisambya asambea abɔ kokoela baa bae bɛ kyɛɛngɛ.»

9Yɛsu na kɔɔtɔkɛa kɔɔcha itɛ: «Mee natobasaolea: mɔsɛngɛ bɔɛmba nɛ byɛndɔ byabea bye ona mɔsɛngɛ, ne ko keeko ketaasi bikaongwe ako, bakɔsɛkɛɛ ku buchikye bwe meombo. 10Olya oe we kiinɛkinɛ ku biemo bikɛɛkɛ, oe bwakaɛ we kiinɛkinɛ ku biemo bwabua. Olya oe wabea ku biemo bikɛɛkɛ, oe bwakaɛ wabea ko biemo byabua 11Ko boa, ingɛ ndemwaongwa be kiinɛkinɛ ko kokambekya ikonja lyinu lyabea lye ona mɔsɛngɛ, naani otabaɛchɛ ikonja lyaachi. 12Kende ndemwabaelwa kɔ kɔɔnga byɛndɔ bye mondo ukinɛ, ne naani otamwɛchɛ byɛndɔ bitaongwe biinu?

13«Kuusi ngambi ɛmɔ etokoka kokambea bakoo babee. Kɔmɔa, otabɔngɛɛ kokonda ɔmɔ na kɔkɔna ukinɛ; ɔbɛɛ kwisambya nɛ ɔmɔ nɛ kɔnyɛka ukinɛ. Mɔɔkaɔsɔnɛ kokambea Kakua ne kokambea tombaambaa.»

Makinɛ makomo ma Yɛsu

(Mat 11:12-13; 5:31-32; Mali 10:11-12)

14Aungwa Bafalisayɔ maa makomo masɛ, abɔ na kɔnyɛka Yɛsu, kɔmɔa bakondaya tombaambaa. 15Yɛsu na kobasaolea itɛ: «Baanu moe ne bando batuiangwecha koba be kiinɛkinɛ kombaa kwe bando, alakini Kakua otocheba bie monda mwe metema yiinu. Kɔmɔa, biemo byaanga bando kɔnyɛmya ne bitɔkɔna Kakua.

16«Salia ya Musa ne byakunyiwa ne Ndɛnda cha Kakua byasaoliwa ne byaimenyiwa ne bando kɔbɔngɛa koba kwa Yɔana Utuina. Kobangoa lɔɔ lusu, Ilɔngɔ Lyaachi lye boombe bwa Kakua lee mo kosaolelwa. Ne mondo ɔɔsɛ utwifɛkɛɛnya kwingea mo boo boombe. 17Bie byalɛnga mɔsɛngɛ ne iyoo koeta kotasi naa ne kachimba kamɔsa ke Salia kuchindolwa.

18«Mondo ɔɔsɛ usulikita mokachi waakɛ ne kotomba ukinɛ, osoketa bwambya. Ne mondo ɔɔsɛ osotomba mokachi ulikitwee, awɛ bwakaɛ osoketa bwambya.»

Kisimu kye ngunji na Lasalɔ wakɛna

19Yɛsu na kobasimbokecha itɛ: «Kwabɛchaya ngonji ɛmɔ, yabwaaya ngubɔ cha kɛnya ne cha nyɛma. Masu masɛ wabɛchaya mo ketokoyoo nɛ kɛmɛmɔ. 20Bwakaɛ bwakaɛ, kwabɛchaya mondo ɔmɔ wa kɛna waitaniwa Lasalɔ. Awɛ wabɛchaya ne tolwaa mɔ lɔkɔba lɔsɛ. Wakyɛsaya a mukinda we ndabo yee ngunji. 21Wakondaya kolya mabumbu makeaya kɔ mɛsa yee ngunji. Naa ne imbwa chalɛmbaya tolwaa twakɛ.

22«Lɔmɔ lusu Lasalɔ na kokwa, meombo na komochaa mɔsɛɛsɛ mwa Abulaamu. Elya ngunji nayo na kokwa ne batomecheka. 23Ku mikinje, kwakonjaya awɛ manɛnɛ me kaseba, na koendoa miisɔ na kɔmɔa Abulaamu kwe njɔɔ, na Lasalɔ mɔsɛɛsɛ mwaakɛ. 24Awɛ na kota kakao: ‹Ee Isanɛ wa Abulaamu, ngwea lokwa! Toma Lasalɔ, ɔchɔbɛkɛ sɔngɔ yee mosani waakɛ mo maaache nabɔbɛkɛ loleme, kɔmɔa boe mee bokonje manɛnɛ mo lee iutea.›

25«Abulaamu na kwiyaya: ‹Ee mwaana waanɛ, eyoka byaachi byaimɛmaya nao okee mwɛchɔ abɛchaya Lasalɔ oe mo manɛnɛ. Ko leno, awɛ osoendwa keebaeba, na awɛ oe mo mambakambaka. 26Akaɛ, kotae kiina kya lɛa asambea niinu. Naanga bae kono bingakonda koolea koa koe baanu, bingaɔsɔnɛka. Na baa bae koa bakaɔsɔnɛ koaboka kono.› 27Kɔ bɔbɔ, elya ngunji na kɔɔcha: ‹Kɔ bɔbɔ, natukwisingea, Isanɛ, toma Lasalɔ mo ndabo ya isanɛ, 28kɔmɔa nae ne babotwa naanɛ batanu, yaaka kwabaane baoleaya mo lee iboa lye manɛnɛ masokonja mee.› 29Abulaamu na komosaolea: ‹Babotwa nao bae ne tuchimba twa Musa ne ndɛnda cha Kakua, batuungweeche!› 30Na elya ngunji na kosaolea: ‹Ee Isanɛ wa Abulaamu, bia bitokoka. Kende mondo ɔmɔ usuubuka ne koyabasaolea, batatuuluke.› 31Abulaamu na kɔɔcha: ‹Kende ndebaungwa makomo ma Musa ne Ndɛnda cha Kakua, naanga mondo uubuke kotoka ko bakwo bakamwimenye.›»

Currently Selected:

Luka 16: ZMB

Highlight

Compare

Copy