1 Yɔana 1

Ikomo lyɛ mwɛchɔ

1Tusumukunyea ko Ikomo lyɛ mwɛchɔ lyasangwa, a kobangoa. Bae twaliungwa, bae na kuimɔɛna ne miisɔ miito, bae kɔlɛlɔla ne kolekwata ne mesani yiito. 2Kiinɛkinɛ ona mwɛchɔ aolee awo, bae tɔmɔmɔɛɛ. Tususingeecha byamɔa bae, ne ko bobo, tosobasaolea ilɔngɔ lyɛ mwɛchɔ we meombo, ɔbɛɛ amɔsa na Tati ne koangoechwa kwiito. 3Lea lɛmɔɛchi bae ne kuliungwa, ne lee bae mokosaola kwinu bwakaɛ, kɔmɔa moongwe niito amɔɔsa. Na koo koongwa kwito amɔɔsa na koa kwe niito amɔɔsa na Tati ne Mwaana waakɛ Yɛsu Kilisito. 4Tosobakunyea maa makomo, kɔmɔa toongwe nɛ kɛmɛmɔ kye kiinɛkinɛ.

Kakua nɛ kyɛɛngɛ

5Na lee ne ikomo liungwee bae kotokea ko kanywa kaakɛ na kolesaola kwinu: Kakua ne kyɛɛngɛ, ne monda mwaakɛ muusi ikunyɛ. 6Twaswitomboa itɛ: toe naakɛ amɔɔsa, koko ne toe mu kuchikana mwikunyɛ lya mbaa na mbaa, tɔsɔɔcha manu, tootoketa kiinɛkinɛ. 7Kɔ bɔbɔ ingɛ tusuchikana mɔ kyɛɛngɛ boa bwe Kakua mwɛɛnɛ mɔ kyɛɛngɛ, toe amɔɔsa bae bɛɛnɛ na bɛɛnɛ. Na Yɛsu, Mwaana waakɛ, waita masi makɛ, otatɔɔyɛ ne bwabea bɔsɛ.

8Twaswitomboa itɛ tuusi ne bwabea, tuswionga bae bɛɛnɛ, ne monda mwiito muusi bye kiinɛkinɛ. 9Kɔ bɔbɔ, ingɛ tuswimenya bwabea bwito, Kakua otaebeele bwabea bwito, oe we kiinɛkinɛ ne otaɔyɛ bwabea, boe awɛ we kiinɛkinɛ. 10Ingɛ tɔsɔɔcha itɛ ndetwaketa bwabea, tusumutuula Kakua koongwa we manu, ne kiinɛkinɛ yee makomo maakɛ iisi monda mwiito.

Currently Selected:

1 Yɔana 1: ZMB

Highlight

Copy

Compare