รม 4

1เซ อึณ ปาย ตี, อาบราฮัม อี มูห ฆูณ ดัง เอ ดูอี อายูดา ตึอน, เหมา อัน ปาย ดี ปึอน น็อห ซืร น็อห หมาน ปี ดัว เฌาพรา? 2เซ อัน ปึอน น็อห ซืร น็อห หมาน โกบ ปี โบง อัน, อัน แฮะ ปึอน ปีพูง โดว บรีม อัน. อัน ยี ตู ปึอน ปีพูง อัน ดี อาต เฌาพรา. 3แคง บับ เฌาพรา อึณ แฮะ แดม อูน ต็อห, “ดา อาบราฮัม หณึม บึง เฌาพรา. โกบ หณึม อัน ปาย ตี, เฌาพรา มืร ต็อห, อัน แฮะ มึห น็อห ลูย.”

4เซ อึณ มูห ดูอี อี รัณ ฆาน, อัน ดี ปึอน รึอน รูห รัณ อัน. รึอน ปี ปึอน อัน ตี, อาว มูห, อี ดัว แบน ลักซอง ดี อัน. อึณ มูห รูห ปี โลว ปึอน อัน โกบ รัณ อัน ฆาน ตี.

5มาแล, อาเซ ตู บึง อาฆยึร ปี โบง อัน, เซ อัน หณึม บึง มี เฌาพรา อี ปึอน ฆ็อห แวน หมาบ ปี โบง ดูอี ฮาย ดูอี มืก, เฌาพรา ดี ดัว น็อห ซืร น็อห หมาน ดี อัน โกบ แฮะ หณึม อัน. 6บอ คูนดีคัม อาดาวีด ตึอน แฮะ กาลาง ลอง อัน ตี. อัน แฮะ กาลาง ลอง ดูอี อี แฮะ ปึอน น็อห ซืร น็อห หมาน โกบ หณึม บึง เฆ ดี เฌาพรา, เฆ มึห น็อห ดาคึย กาเซา. ลอง อัน ตี, อึณ แฮะ แดม อูน ต็อห,

7“เซ เฌาพรา แฮะ ฆ็อห แวน หมาบ ดูอี อู วี, อัน ดี มึห น็อห ดาคึย โกบ แฮะ ฮอต หราย หมาบ อัน ตี.

8เซ เฌาพรา ต็อห ลอง ดูอี อู วี, อัน ตู มึห หมาบ, อัน ดี โบยว ดาคึย.”

9มาเซ ปี ทาง เบ? เฆ อี แฮะ โบยว ดาคึย ปี กาลาง คูนดีคัม ตี, อึณ มูห มี เฆ ดูอี อี แฮะ คัม ดี ซัวะ แวน ฮูน ลัะคานา? เซ อาว ปาย ตี, อึณ มูห บอ เฆ ดูอี อาโมยว เฮา อี ตู มึห ดี ซัวะ? เย ยี แฮะ ฮอต ต็อห, “โกบ หณึม บึง ดา อาบราฮัม ดี เฌาพรา, เฌาพรา มืร ต็อห, อัน แฮะ มึห น็อห ลูย.” 10ดอ เหมา เฌาพรา แฮะ ต็อห, อาบราฮัม แฮะ มึห น็อห ลูย? อึณ มูห วาย แฮะ ฮอต อัน ซัวะ แวน ฮูน ลัะคานา อัน? เซ อาว ปาย ตี, อึณ มูห อาต หณัม ซัวะ แวน อัน? อาว มูห วาย แฮะ ฮอต ซัวะ แวน อัน ฮูน ลัะคานา อัน. ซีณ อาต หณัม ซัวะ แวน อัน ฮูน ลัะคานา อัน, เฌาพรา แฮะ ต็อห, อัน แฮะ มึห น็อห ลูย. 11ลอง วี คัม อัน ดี ซัวะ แวน ฮูน ลัะคานา อัน ตี, อึณ แบน ลักซานา ปี ดัว เฌาพรา. โคว, อัน แฮะ ฮอต ดัว น็อห ลูย ดี อาบราฮัม โกบ หณึม อัน เฌาพรา ซีณ อาต ซัวะ แวน อัน ฮูน ลัะคานา อัน ตี. โกบ อึณ ปาย ตี, เฌาพรา แฮะ แตห อัน แบน ฆูณ ดัง เฆ อี หณึม ดอน อี, อี ตู มึห ดี ซัวะ แวน ฮูน ลัะคานา เฆ. เฆ มืร แฮะ ปึอน น็อห ซืร น็อห หมาน ปี ดัว เฌาพรา. 12ดา อาบราฮัม ตี, อัน แฮะ แบน บอ ฆูณ ดัง เฆ อี คัม ดี ซัวะ แวน ฮูน ลัะคานา เฆ. อึณ ยี ตู มูห โกบ แฮะ คัม เฆ ดี ซัวะ แวน ฮูน ลัะคานา เฆ. อึณ มูห โกบ หณึม เฆ ดี เฌาพรา ปี ดา อาบราฮัม ตึอน อี แฮะ หณึม ซีณ อาต ซัวะ แวน อัน ฮูน ลัะคานา อัน.

13เฌาพรา มืร แฮะ ดัว กาดีก ซัดฌา ดี ดา อาบราฮัม บอ ดี เฆ ครึร อัน ต็อห, แดง กาดาย นี ดอน นา ดอน โปละ, อึณ ดี แบน คาฆูน เฆ. เฌาพรา ตู ดัว กาดีก ซัดฌา ตี โกบ โบง โดบ ดา อาบราฮัม ดารา. เฌาพรา ดัว กาดีก ซัดฌา ตี โคว, เฌาพรา แฮะ ฮอต ดัว น็อห ซืร น็อห หมาน ดี อัน โกบ แฮะ หณึม บึง อัน เฌาพรา. 14เซ เฌาพรา ดัว คาฆูน ตี ดี ดูอี โกบ โบง โดบ เฆ ดารา, ปี หณึม เอ อาว มึห อาฆยึร. กาดีก ซัดฌา ตี มืร, อาว มึห ดีโคว. 15โคว, ดารา ตี, อึณ แตห เฌาพรา รู ดี เอ ดูอี. มาแล, เซ อาว มึห ดารา, อาว มึห หมาบ, อาว มึห ปี กาลึบ ปี ลูต เอ.

16โคว, กาดีก ซัดฌา ตี, เฌาพรา แฮะ ดัว โกบ หณึม เอ. อึณ บอ มูห ปี เฆฌู อัน เฌา ดี เอ, แตห เอ นับ ซีคยา, เฆ หลูกหลาน ครึร ดา อาบราฮัม บอกาเฆลียด ดี ปึอน ปี เฆฌู เฌาพรา ตี. เอ มืร ตู โลว โตต มาเซ. เฌาพรา ตู ดัว กาดีก ซัดฌา ตี มี ดี เฆ อี โบง โดบ ดารา. อัน ดัว บอ ดี เฆ อี หณึม เฌาพรา ปี ดา อาบราฮัม อี แฮะ หณึม ตึอน. อัน แฮะ แบน ฆูณ ดัง เอ ดอน อี อี หณึม ปาย ตี. 17เฌาพรา แฮะ แดม อูน แคง บับ อัน ต็อห, “โอว แฮะ แตห แม แบน ฆูณ ดัง อาโมยว ดูอี กืน.” ปาย ตี, เฌาพรา แฮะ แตห ดา อาบราฮัม แบน ฆูณ ดัง เอ โกบ หณึม บึง อัน ดี เฌาพรา อี นับ ดี แตห ดูอี ยัม วี ยีต วี อีม. อัน เฌา บอ นับ ดี กาลาง ลอง อี หณัม มึห, แตห อึณ ปี แฮะ ฮอต มึห.

18อัน บอ หณึม โฆรห เฌาพรา ดอ ตู มึห อัน โดง น็อห ตาง ดี มาเซ. โคว, เฌาพรา บอ แตห อัน แบน ฆูณ ดัง เฆ อาโมยว ดูอี กืน, แตห อึณ ปี ปี ดึอม กาลาง เฌาพรา ดอ ต็อห อัน, “หลูกหลาน แม, เฆ ดี กืน กาเซา.” 19ดอ วี กาพา อัน ปี ปาย โดว บรีม อัน, น็อห หณึม อัน ยี ตู หราย ตู โยม ดอ เหมา. อัน แฮะ นับ, โกบ แฮะ โนะ อาซาก อัน อู มาย็อห ซีนัม, อัน แฮะ แหนน ดูอี ยัม. บอ อีบึณ อัน อี มูห นาง ซาราย แฮะ หมัน. 20อัน ปี บอ แฮะ นับ ลอง อัน ตี, อัน ยี หณึม เซเซ. อัน ตู มึห น็อห อี ทาง, กาดีก ซัดฌา เฌาพรา อึณ ตู หมาน. แคง น็อห อัน, อัน บอ แว หณึม ซีคยา บอ อืบ เฌาพรา. 21อัน หณึม อาคาคัร, เฌาพรา นับ ดี โบง โดบ ปี กาแซณ อัน. 22โคว, เฌาพรา มืร แตห อัน มึห น็อห ซืร น็อห หมาน. 23อี แดม ต็อห, “เฌาพรา แฮะ ต็อห, อัน มึห น็อห ลูย” โฆรห ตี, อาว มูห เฌาพรา กาลาง มี ดี ดา อาบราฮัม อู วี. เฌาพรา แฮะ กาลาง บอ ดี เอ. 24เซ เอ หณึม, เฌาพรา แฮะ แตห เฌา เยซู อี มูห ดา กาณา เอ วี ยีต วี อีม วาย แฮะ ฮอต ยัม อัน, อัน เฌา ดี ต็อห, บอ เอ แฮะ มึห น็อห ซืร น็อห หมาน. 25เฌา เยซู ตี, อัน แฮะ คัม ดี ยัม กาดาง หมาบ เอ. อัน แฮะ วี ยีต วี อีม, แตห อัน โบง แตห บอ เอ มึห น็อห ซืร น็อห หมาน.

Currently Selected:

รม 4: pce

Highlight

Compare

Copy