รม 12

1อึย เบ บีนอง, ปี เฆฌู เฌาพรา ดี เอ, อึณ แฮะ กืน กาเซา. โคว, โอว ซี หมาณ, แตห เบ อาบ โดว เบ ดี เฌาพรา, แตห อึณ ปี ปี หลู อี มึห อาซาก, อี ซีงา บอด อี ล็อะ น็อห เฌาพรา. แฮะ กาอาบ เบ โบง ปาย ตี. 2แกวะ ฮู แตห เบ โบง ปี เฆ ดูอี อี ตู หณึม เฌาพรา. แตห เบ คัม ดี บยอง ปี เฌณฌา เบ, แตห อึณ แบน อี กามาย. เซ เบ โบง ปาย ตี, เบ ดี นับ ปี อึง เฌาพรา, นับ บอ อี บอด อี หมึอม อี ล็อะ น็อห เฌาพรา อี กยัะ กาเซา. 3โกบ ปี เฆฌู เฌาพรา ดี โอว, โอว วี กาลาง ดี เบ ดอน อี, แกวะ แตห เบ อาทาง ตาง โดว บรีม เบ หลึอม แคะ ปี กาอาบ ทาง. แตห เบ วี เฌณฌา ซีคยา, แตห ปี ทาง เบ กาดาน ดี น็อห หณึม แปะ แฮะ ดัว เฌาพรา ดี เบ ราง อาเซ ราง อัน. 4อึณ ปี โดว โบ็ง เอ นี. แคง โดว โบ็ง เอ, อึณ บอ แฮะ มึห แบน โมยว แบน โมยว. ดอน โมยว บอ มึห อาฆยึร ราง อาเซ ราง อัน. 5อึณ บอ ปาย ตี, เอ ปี บอ แฮะ มึห แบน วี แบน วี มืร, โกบ หณึม เอ เฌา เยซู เอ แฮะ ปี โดว โบ็ง อู โบ็ง. อึณ บอ ลาย บาะ ดอน อี แคง โดว โบ็ง ตี. 6เฌาพรา แฮะ ดัว ปี เฆฌู อัน ดี เอ ราง อาเซ ราง อัน. แตห เอ จัร ปี เฆฌู ตี. เฆฌู ปี ดัว เฌาพรา ดี เอ ตี, อึณ ตู มูห อู โมยว. เซ เฌาพรา แฮะ แตห อู วี บยาน โฆรห เฌาพรา, แตห อัน กาลาง โดบ ปี หณึม อัน. 7เซ เฌาพรา แตห อู วี ปึอน ดี จอย อี, แตห อัน โบง แคะ ปี โลว อัน โบง. เซ ปอ อู วี บอ โลว มาโนว อี, แตห อัน มาโนว ซีคยา. 8เซ เฌาพรา แตห ดูอี อู วี นับ ดี เหลา น็อห อี, แตห อัน โบง, แตห อึณ ดัว โปลม ดัว แฮณ ดี อี. เซ อู วี บอ โลว กาซาง ดัว ดี อี เฮา, แตห อัน มึห น็อห ดีฮาง ดี ดัว. เซ อู วี บอ โลว แยต อี, แตห อัน ออน ดี โบง ฆาน อัน ตี. เซ อู วี บอ โลว กาเว โลว จอย อี เฮา, แตห อัน บอ มึห น็อห ฌอนโฌม ดี จอย.

9แตห เบ มึห น็อห ซืร น็อห หมาน ดี ร็อก ดูอี. แตห เบ บอ กาอีห อี ฮาย อี มืก บอ โบง นา บอด นา หมึอม เซเซ.

10แตห เบ ลาย ร็อก ปี อู กัด อู วา. แตห เบ โรวเซ อี เฮา หลึอม โดว บรีม เบ. 11แตห เบ ออน ดี โบง ฆาน เฌาพรา. แกวะ แตห เบ กราน. แตห บอ น็อห บอ พึอม เบ โบง ฆาน เฌาพรา เซเซ. 12แตห น็อห เบ บอ โบยว ดาคึย โกบ ปี หน็อะ อึณด็อะ เบ. เซ เบ โลว คัม อี ดูก อี หณาบ, แตห เบ คัม ดี ยืน เหลณ. แตห เบ บอ ซาคึร เซเซ. 13เซ ดูอี อี หณึม เฌา เยซู บอ เอต ตู มึห แคะ ปี โลว เฆ, แตห เบ กาซาง ดัว ดี เฆ. แตห เบ บอ ดาคึย ดี ยอด ลึมลา แคต.

14แตห เบ ซาคึร ดาง เฆ อี โบง นา จีจีว ดี เบ. แกวะ ดืง เฆ, ม็องการา ดัว ดี เฆ. 15แตห เบ โคย ดาคึย โดบ เฆ อี โคย ดาคึย. แตห เบ บอ ยาม โดบ เฆ อี แฮะ ยาม. 16แตห เบ ลาย โพรม รึม แบน อู น็อห. แกวะ แตห เบ ปีคึก น็อห เบ. แตห เบ คัม ดี โบง ฆาน อี โจห เตียม. แกวะ แตห เบ ทาง เบ แฮะ มึห อางยาน หลึอม อี.

17เซ อี เฮา โบง นา ฮาย นา มืก ดี เบ, แกวะ วี โบง เวียะ นา ฮาย นา มืก ดี เฆ. แคะ ปี โบง เบ ดอน โมยว, แกวะ แตห อี เฮา มึห ดี กาลาง, อึณ ตู หมึอม. 18แคะ ปี ปึอน เบ โบง, แตห เบ บอ โฆยวฆยา ดี ลาย กาล็อะ ดี ดูอี ดอน อี. 19อึย เบ ฆึก โอว, แกวะ แตห เบ โบง เวียะ ดี อี. แตห เบ แตห เฌา เยซู รู ดี เฆ. โคว, อึณ แฮะ แดม อูน แคง บับ เฌาพรา ต็อห, “อึณ มูห โอว, อี ดี โบง เวียะ ดี อี. อึณ มูห โอว, อี ดี ดัม หมาบ ดี เฆ.” 20อาว วัน มี แคะ ตู โบง เวียะ ดี อี ตี. เบ โลว โบง โดบ ปี แดม อูน แคง บับ เฌาพรา ต็อห, “เซ รันซู แม กาปราณ โบม, แตห แม เฮียง อัน โฮม. เซ อัน ซี เดียง อึม, แตห แม ดัว อัน เดียง. เซ แม โบง ปาย ตี, โยว อัน ดี บอ วี ซาย แม, วี โหลห หมาบ อัน, วี ซี แบน ฆึก แม.” 21แกวะ แตห นา ฮาย นา มืก แป เบ, แตห นา บอด นา หมึอม แป นา ฮาย นา มืก.

Currently Selected:

รม 12: pce

Highlight

Compare

Copy