ปบ 5

ลอง ซีลอย แปะ บอ ลอง ฆอน มาบู

1วาย อัน ตี โอว วี ยึร อัน เฌา อี ตูต แดง มาลาง ตึอน. อัน โฆ็ง ซีลอย แปะ แคง แด อัน บลาก อาอัห. ซีลอย แปะ ตี แฮะ แดม บอ นา เรต นา แคง, แฮะ กาบีด, แฮะ ดอก บอ ฌึม บู โปละ. 2โอว ปี วี ยึร บอ อามู อามาด เฌาพรา อี มึห อาพูง ดังโคว ตาง อู กาดัง. อัน กาลาง โฆรห ตาง ต็อห, “อาเซ แฮะ กาอาบ ปยาต ฌึม ซีลอย แปะ นี, แตห อึณ ปึอน วึห?” 3บอ แคง ฆางหราว บอ แดง กาดาย บอ ครึม กาดาย, อาว มึห อาเซ อี ปึอน วึห ซีลอย แปะ ตี, แตห อึณ ปึอน ยอด นา แคง. 4โกบ ตู มึห คอ อู วี อี กาอาบ วึห ซีลอย แปะ ตี ยอด นา แคง, โอว บอ ยาม ตาง อู เฌณ. 5ดอ อัน ตี แคง ดา ตาง เฆ ตึอน อึณ มึห อู วี, อัน ต็อห ดี โอว, “แม แกวะ ยาม, แตห แม วี ยอด อี จืร ‘มาครังซี ครึร อายูดา’ อี มูห หลูกหลาน อาดาวีด. อัน แฮะ ออง. โคว, อัน แฮะ กาอาบ ดึห แวน ฌึม อี กอย บู โปละ, แตห อัน วึห ซีลอย แปะ ตี.”

6แฮะ ฮอต ปัน ตี โอว วี ยึร ฆอน มาบู อู โดว. อัน จ็อง ดี โคบ มาลาง ตึอน. อารึบ อัน, อึณ ปี อี แฮะ ดึอม ง็อห ยัม อัน. โดว ซัดดาวา พวน โดว บอ เฆ ดา ตาง ตึอน, เฆ กอย โรบ อัน. ฆอน มาบู ตี แฮะ มึห นึง บู โบ็ง บอ งาย บู โบ็ง. บอ นึง บอ งาย ตี มูห น็อห พึอม เฌาพรา ปี ตึย เฌาพรา ฮาว กาลัต แดง กาดาย ดอน นา ดอน โปละ. 7ฆอน มาบู ตี บอ ฮาว ดึห ซีลอย แปะ ปี โฆ็ง อัน เฌา อี กอย แดง มาลาง ตึอน. อัน ดึห ซีลอย แปะ ตี แคง แด อัน บลาก อาอัห. 8ฆอน มาบู แฮะ ฮอต ดึห ซีลอย แปะ ตี, โดว ซัดดาวา พวน โดว บอ เฆ ดา ตาง อา ฆึร ดี พวน วี ตึอน, เฆ บอ มูด ฆึบ ดี อาต ฆอน มาบู ตี. เฆ ดอน อี แฮะ โฆ็ง ดีง บอ ซีลัยะ ครีว ปี ฮับ เฆ ซีนัม อูห หงูน. ปี ซาคึร เฆ ดูอี อี ซีงา บอด, อึณ ปี ซีนัม อูห หงูน แคง ซีลัยะ ตี. 9เฆ บอ กาโพรม ดี ต็อห โหมว กามาย. เฆ ต็อห,

“แม เฌา, แม แฮะ กาอาบ ดึห ซีลอย แปะ ตี, แตห แม ปึอน ดี ปยาต ฌึม เฆ ตี. โคว, อี แฮะ ดึอม ง็อห ยัม แม. โกบ แฮะ เลห หนาม แม เฌา, แม แฮะ ปึอน ดี ทูด เลห ดูอี บอกาเฆลียด แคง หมาบ, แตห เฆ วี ปึอน ดี โดบ เฌาพรา. เฆ ดูอี ดอน มาน ดอน มืง, ดอน ฌึร ดอน ครึร, อี กาลาง โฆรห ดอน โมยว, เฆ ปึอน ดี แบน โตต ดูอี ปี อึบ เฌาพรา.

10แม เฌา แฮะ แตห เฆ ปึอน ดี แบน อู พึง อี มูห ดูอี อี หลู ดี เฌาพรา. แตห เฆ ปึอน ดี โบง ฆาน เฌาพรา อี อึบ เอ, แตห เฆ อึบ แดง กาดาย.”

11เฆ แฮะ ฮอต กาลาง โฆรห ตี, โอว ปี วี ยอด, โอว วี ยึร โฆรห อามู อามาด เฌาพรา เฆ กืน กาเซา, กอ มึห แบน แซน แบน ลาน กอ ฮู แป ดี ตีห. เฆ แฮะ จ็อง, แฮะ โรบ บอ มาลาง บอ โดว ซัดดาวา พวน โดว บอ ดา ตาง เฆ ตึอน.

12เฆ บอ ดัด ตาง ต็อห โหมว. เฆ ต็อห,

“ฆอน มาบู แปะ แฮะ ง็อห ยัม อี, เอ แฮะ กาอาบ อืบ อัน. เอ บอ อืบ อัน โกบ แฮะ กืน ปวน อัน บอ โกรวกราม อัน. เอ อืบ บอ อางยาน บอด บอ โปลม เฆ แฮณ อัน. แฮะ กาอาบ อืบ อาพูง ดังโคว อัน เฌา, แตห อัน มึห ซาเร. เย บอ ดาง ฆูง เฆฌู ดี อัน.”

13วาย อัน ตี โอว ปี วี ยึร โฆรห เฆ อี มึห พึอม ดอน โมยว. บอ อี กอย แคง ฆางหราว บอ อี กอย แดง กาดาย, บอ อี กอย ครึม กาดาย บอ อี กอย แคง อึม นัมมูกซารา, เฆ บอกาเฆลียด ต็อห,

“เอ อืบ อัน เฌา อี ตูต แดง มาลาง บอ ฆอน มาบู ตึอน, แตห ฆาย มึห ปวน, มึห ซาเร. แตห ฆาย มึห บอ อาพูง ดังโคว เซเซ ดอน โจว ดอน บาน.”

14เฆ แฮะ ฮอต กาลาง ปาย ตี, โดว ซัดดาวา พวน โดว ตึอน วี ต็อห, “แฮะ หมาน, แฮะ มูห, ซาตู.” ดา ตาง เฆ ตึอน บอ มูด ฆึบ กรึบ อู เฌณ.

Currently Selected:

ปบ 5: pce

Highlight

Copy

Compare