ปบ 3

แปะ ปี แดม ตึย ดี เฆ แคง พึง เฌา เยซู อี กอย แคง มืง ซาตี

1อัน เฌา วี ต็อห, “แตห แม วี แดม อูน โฆรห นี, วี ตึย ฮาว ดี อามู อามาด เฌาพรา อี ลึมลา เฆ แคง พึง เฌา เยซู อี กอย แคง มืง ซาตี. แตห แม แดม, ‘โฆรห นี มูห โฆรห อัน เฌา อี มึห น็อห พึอม เฌาพรา อี ปี วีณาน บู กาดัง. อัน เฌา ตี มึห บอ ซีมัณ บู โบ็ง. โอว แฮะ นับ ปี โบง เบ. อี เฮา ปี บอ ต็อห เบ มึห อาซาก กามาย มืร, น็อห พึอม เบ ยี แฮะ ฮอต ยัม. 2แตห เบ บยอง น็อห, แตห อึณ ปี เบ แฮะ วี อึณซึห. โอว แฮะ ยึร ปี โบง เบ, อึณ ตู เฌะฌูง ดี อาต เฌาพรา. อึณ มึห มัง อี, เฆ แฮะ ปี ดูอี อี รีน ดี ยัม, เฆ ยี หณัม ยัม. แตห เบ จอย ดูอี เฆ ตี, แตห เฆ วี มึห โปลม, แตห เฆ วี หณึม ซีคยา. 3โคว อัน ตี แตห เบ วี กาดัวะ กาพา ลอง แปะ แฮะ โทม แฮะ เฮน เบ บอ ลอง แปะ แฮะ ดัว เฌาพรา ดี เบ ดอ หณึม เบ ดี อัน. แตห เบ วี โบง โดบ ปาย ตี. แตห เบ วี โหลห แวน หมาบ เบ. เซ เบ ตู บยอง น็อห เบ, โอว ดี ตัห โดง กอย เบ ปี ดา ปรา, ตู แตห เบ นับ อาคราว ดี ตัห โอว.

4มาแล, ดูอี แคง มืง ซาตี นี, อึณ ซี มึห ดูอี มัง อี อี ตู โบง อี หมึอม กาอีห. อึณ ปี, เฆ ตู แตห ครึง ปี ตา เฆ กาดาต. เฆ ดูอี ตี, เฆ ดี วี ปึอน ดี ตา ครึง ลูย บอ ฮาว โดบ โอว. โคว, เฆ มูห ดูอี อี แฮะ กาอาบ ตา, กาอาบ โดบ. 5เซ อึณ ยี มึห ดูอี อี ออง โตต ดอน โมยว, เฆ ดี ปึอน ดี ตา ครึง ลูย. โอว มืร ตู บยัด จืร เฆ แคง บับ ฌาราง เฆ ดูอี อี แฮะ ปึอน อาซาก กามาย. โอว มืร ดี วี กาลาง ดี ฆูณ โอว, บอ ดี เฆ อามู อามาด อัน ลอง แฮะ กาดึก กาด็อะ เฆ ดี โอว. 6ปาย ตี, เซ เบ มึห โหยะ อี นับ ดี โทม, แตห เบ โทม ปี กาลาง น็อห พึอม เฌาพรา ดี เฆ ดูอี แคง พึง เฌา เยซู บอกาเฆลียด.’”

แปะ ปี แดม ตึย ดี เฆ ดูอี แคง พึง เฌา เยซู อี กอย แคง มืง พีลัะเดพี.

7อัน เฌา วี ต็อห, “แตห แม แดม อูน โฆรห นี, วี ตึย ฮาว ดี อามู อามาด เฌาพรา อี ลึมลา เฆ แคง พึง เฌา เยซู อี กอย แคง มืง พีลัะเดพี. แตห แม แดม, ‘โฆรห นี มูห โฆรห อัน เฌา อี ซีงา บอด, อี ซืร ซืร, หมาน หมาน. อัน เฌา ตี บอ มึห ปวน ดี แตห อี ลึบ แคง มืง ปี อึบ เฌาพรา โกบ มูห อัน หลูกหลาน อาดาวีด. เซ อัน ฮี วึห มาโลห, อาว มึห อี ปึอน กาบีด. เซ อัน ฮี กาบีด, อาว มึห อี ปึอน วี วึห. 8โอว แฮะ นับ โตต ดอน โมยว แปะ แฮะ โบง เบ. แตห เบ บัร ดี ยอด. โอว แฮะ ฮอต วึห อูน มาโลห ดี เบ. อาว มึห อาเซ อี ปึอน กาบีด มาโลห ตี. เบ ปี บอ มึห แฮณ อี แจก มืร, เบ ยี โบง โดบ โฆรห ปี กาลาง โอว บอ มึห น็อห หมาน. เบ ตู ดึอม ต็อห, เบ ตู นับ โอว. 9อึณ มึห พึง เฆ อี โดบ โบว กานัม อี กาโลว ต็อห เฆ มูห ดูอี อายูดา, เฆ ยี ตู มูห. โอว ดี แตห เฆ ตัห ครึบเครา ฆึบ ดี อาต เบ. อึณ ดี บอ ลึห ดี เฆ บอกาเฆลียด ลอง ร็อก โอว ดี เบ. 10โกบ แฮะ โทม โดบ เบ โฆรห โอว, โกบ แฮะ คัม เบ ดี ยืน, โอว มืร ดี ยอด แมน เบ. เซ ดูอี แดง กาดาย นี ดอน อี ดี บอ กาดูห ดูก ตาง, โกบ เทว โอว ดี น็อห เฆ, โอว มืร ตู แตห เบ คัม.

11อาว เหลณ โอว ดี วี ตัห. แตห เบ หณึม ฮาว แคะ ปี แฮะ หณึม เบ ดอ ตี นี. แกวะ แตห อาเซ ปึอน ดี พาด ฮาว รูห ปี ดี ปึอน เบ อี ปี มังฆึม. 12เซ อึณ ยี มึห ดูอี อี ออง โตต ดอน โมยว, โอว ดี แตห อัน กอย รึม ซีคยา โดบ เฌาพรา, แตห อึณ ปี ร็อง อี กอย แคง โฮว เฌาพรา. อัน มืร ตู โลว กาโทะ เลห ดอ เหมา. โอว แดม ฮับ จืร เฌาพรา ปี กรึบ โอว แดง ร็อง ตี. โอว ดี แดม ฮับ บอ จืร มืง เยรูซาแลม กามาย แดง ร็อง ตี. มืง ตี, อึณ มูห มืง เฌาพรา ปี กรึบ โอว. อึณ ดี เลห โลง แคง ฆางหราว อี มูห โดง กอย เฌาพรา. บอ จืร กามาย โอว, โอว ดี แดม ฮับ แดง ร็อง ตี.

13ปาย ตี, เซ เบ มึห โหยะ อี นับ ดี โทม, แตห เบ โทม ปี กาลาง น็อห พึอม เฌาพรา ดี เฆ ดูอี แคง พึง เฌา เยซู อี กอย แบน โปละ แบน โปละ.’”

แปะ ปี แดม ตึย ดี เฆ ดูอี แคง พึง เฌา เยซู อี กอย แคง มืง ลอดีกี.

14อัน เฌา วี ต็อห, “แตห แม แดม อูน โฆรห นี, วี ตึย ฮาว ดี อามู อามาด เฌาพรา อี ลึมลา เฆ ดูอี แคง พึง เฌา เยซู อี กอย แคง มืง ลอดีกี. แตห แม แดม, ‘โฆรห นี มูห โฆรห อัน เฌา อี มูห อี หมาน. อัน แฮะ กาลาง อี มูห อี หมาน ลอง เฌาพรา. อัน มืร แฮะ อึบ โตต ดอน โมยว แปะ แฮะ พาน เบลห เฌาพรา. 15โอว แฮะ นับ ปี โบง เบ. เบ ตู ร็อก ตู แวน เฌาพรา. น็อห เบ อึณ ปี อึม อี ตู เฆียด ตู ดาด. โอว ซี แตห เบ ดาด. เซ เบ ตู ดาด, แตห เบ เฆียด. 16มาแล, โกบ ตู เฆียด ตู ดาด เบ ตี, โกบ ซีอูณ ซีอูณ เบ, โอว ดี แวน เบ ปี อี ปัต เลห อึม ซีอูณ แคง โมต เฆ. 17เบ บอ ต็อห, “เย แฮะ ครัม, โกรวกราม เย แฮะ กืน กาเซา, อาว ฮู มึห ปี ดี โลว ปอ อึณปัว.” เบ ยี ตู วี นับ โดว เบ, ตู นับ แคะ แฮะ ฆีน เบ, แคะ หมึอม กาเว เบ, แคะ แฮะ พลาน เบ. อึณ ปี, ครึง ปี ดี ตา มืร, เบ ตู มึห. งาย เบ มืร แฮะ อับ. 18โอว ดี กาลาง อากยาม อางยาน ดี เบ, แตห เบ ดึห ปี ดัว โอว ดี เบ, แตห อึณ ปี เบ จึห ครีว ดี โอว, อี มูห ครีว แฌด, ครีว บอด แปะ แฮะ ทารอง อี แคง เงา. แตห เบ วี ปี ดูอี ครัม. แตห เบ แวน หมาบ เบ, แตห อึณ ปี เบ จึห ชึบ ครึง ลูย, แตห อึณ กาบีด โดว ฆลัะ เบ, แกวะ แตห เบ โลว ซาย อี. แตห อึณ ปี เบ จึห บอ ซีนัม ฮับ ดี งาย เบ, แตห อึณ ลึห ซีคยา ดี เบ ลอง โอว.

19โอว ดี มาโนว กาเซา เฆ ดูอี ปี ร็อก โอว บอกาเฆลียด. แตห เบ วี ออน ดี โดบ โอว, วี โหลห วี แวน หมาบ เบ. 20แตห เบ โทม. อึณ ปี, โอว แฮะ กอย ดี อาต มาโลห บอ แดะ เบ บอ ดอย มาโลห. อาเซ ยึร โฆรห โอว บอ วึห มาโลห ตี, โอว ดี บอ ลึบ แคง กาง อัน, โฮม รึม โดบ อัน. อัน มืร ดี ปึอน ดี โฮม รึม โดบ โอว.

21เซ อึณ ยี มึห ดูอี อี ออง โตต ดอน โมยว, โอว ดี แตห อัน ตูต แดง มาลาง โดบ โอว, แตห อึณ ปี ดอ แฮะ ออง โอว, ดอ แฮะ แตห เฌาพรา โอว ตูต แดง มาลาง โดบ อัน อี มูห ฆูณ โอว. 22ปาย ตี, เซ เบ มึห โหยะ อี นับ ดี โทม, แตห เบ โทม ปี กาลาง น็อห พึอม เฌาพรา ดี เฆ ดูอี แคง พึง เฌา เยซู อี กอย แบน โปละ แบน โปละ.’”

Currently Selected:

ปบ 3: pce

Highlight

Copy

Compare