Popular Bible Verses from ปบ 3

Share

แตห เบ โทม. อึณ ปี, โอว แฮะ กอย ดี อาต มาโลห บอ แดะ เบ บอ ดอย มาโลห. อาเซ ยึร โฆรห โอว บอ วึห มาโลห ตี, โอว ดี บอ ลึบ แคง กาง อัน, โฮม รึม โดบ อัน. อัน มืร ดี ปึอน ดี โฮม รึม โดบ โอว.

โอว แฮะ นับ ปี โบง เบ. เบ ตู ร็อก ตู แวน เฌาพรา. น็อห เบ อึณ ปี อึม อี ตู เฆียด ตู ดาด. โอว ซี แตห เบ ดาด. เซ เบ ตู ดาด, แตห เบ เฆียด. มาแล, โกบ ตู เฆียด ตู ดาด เบ ตี, โกบ ซีอูณ ซีอูณ เบ, โอว ดี แวน เบ ปี อี ปัต เลห อึม ซีอูณ แคง โมต เฆ.

โอว ดี มาโนว กาเซา เฆ ดูอี ปี ร็อก โอว บอกาเฆลียด. แตห เบ วี ออน ดี โดบ โอว, วี โหลห วี แวน หมาบ เบ.

โอว แฮะ นับ โตต ดอน โมยว แปะ แฮะ โบง เบ. แตห เบ บัร ดี ยอด. โอว แฮะ ฮอต วึห อูน มาโลห ดี เบ. อาว มึห อาเซ อี ปึอน กาบีด มาโลห ตี. เบ ปี บอ มึห แฮณ อี แจก มืร, เบ ยี โบง โดบ โฆรห ปี กาลาง โอว บอ มึห น็อห หมาน. เบ ตู ดึอม ต็อห, เบ ตู นับ โอว.

เซ อึณ ยี มึห ดูอี อี ออง โตต ดอน โมยว, โอว ดี แตห อัน ตูต แดง มาลาง โดบ โอว, แตห อึณ ปี ดอ แฮะ ออง โอว, ดอ แฮะ แตห เฌาพรา โอว ตูต แดง มาลาง โดบ อัน อี มูห ฆูณ โอว.

เบ บอ ต็อห, “เย แฮะ ครัม, โกรวกราม เย แฮะ กืน กาเซา, อาว ฮู มึห ปี ดี โลว ปอ อึณปัว.” เบ ยี ตู วี นับ โดว เบ, ตู นับ แคะ แฮะ ฆีน เบ, แคะ หมึอม กาเว เบ, แคะ แฮะ พลาน เบ. อึณ ปี, ครึง ปี ดี ตา มืร, เบ ตู มึห. งาย เบ มืร แฮะ อับ.

โกบ แฮะ โทม โดบ เบ โฆรห โอว, โกบ แฮะ คัม เบ ดี ยืน, โอว มืร ดี ยอด แมน เบ. เซ ดูอี แดง กาดาย นี ดอน อี ดี บอ กาดูห ดูก ตาง, โกบ เทว โอว ดี น็อห เฆ, โอว มืร ตู แตห เบ คัม.

อาว เหลณ โอว ดี วี ตัห. แตห เบ หณึม ฮาว แคะ ปี แฮะ หณึม เบ ดอ ตี นี. แกวะ แตห อาเซ ปึอน ดี พาด ฮาว รูห ปี ดี ปึอน เบ อี ปี มังฆึม.

แตห เบ บยอง น็อห, แตห อึณ ปี เบ แฮะ วี อึณซึห. โอว แฮะ ยึร ปี โบง เบ, อึณ ตู เฌะฌูง ดี อาต เฌาพรา. อึณ มึห มัง อี, เฆ แฮะ ปี ดูอี อี รีน ดี ยัม, เฆ ยี หณัม ยัม. แตห เบ จอย ดูอี เฆ ตี, แตห เฆ วี มึห โปลม, แตห เฆ วี หณึม ซีคยา.