ปบ 10

ลอง อามู อามาด เฌาพรา บอ ซีลอย แปะ อี ดีแตด

1วาย อัน ตี โอว วี ยึร ปี บยัะ เฌาพรา ปอ อู โมยว. โอว ยึร อามู อามาด เฌาพรา อู กาดัง อี มึห ปวน บอ อาพูง ดังโคว ตาง. อัน ตัห แคง ฆางหราว โลง. อึณ บอ มึห บอ อึณอูะ โรบ อัน. อึณ ปี ครึง ปี ตา อัน. ดี ฆีณ อัน อึณ มึห คูนมาแยง โรบ. นา อัน อึณ บลาง ปี ซีแง. เปลา อัน อึณ ปี ร็อง เงา. 2แคง แด อัน, อัน โฆ็ง ซีลอย แปะ อี แฮะ ฮอต วึห อูน. เปลา อัน บลาก อาอัห แฮะ ฌาบ แดง อึม นัมมูกซารา. บลาก อาฆัะ แฮะ ฌาบ แดง กาดาย. 3อัน บอ ดัด เรียง ปี มาครังซี. อัน แฮะ ฮอต เรียง, อึณ วี มึห ฮัม กานัม ดีงึณ บู เฌณ. 4ดอ แฮะ ดีงึณ ฮัม กานัม บู เฌณ ตี, โอว แฮะ หงา ดี แดม อูน โฆรห อี เลห แคง ฮัม ตี. มาแล, โอว วี ยึร โฆรห อี เลห แคง ฆางหราว ต็อห, “ฮัม กานัม บู เฌณ ตี, แกวะ แดม อูน, แกวะ แตห อาเซ นับ โฆรห อัน.”

5ปัน ตี อามู อามาด เฌาพรา กาดัง ปี ยึร โอว ดอ จ็อง อัน แดง อึม นัมมูกซารา บอ แดง กาดาย ตึอน, อัน วี โจะ โซ็ง แด อัน โฮะ แคง เบลณ. 6อัน วี ดืง ฆาว ปวน เฌาพรา อี กอย เซเซ ดอน โจว ดอน บาน. ปวน อัน เฌา ตี แฮะ พาน เบลห ฆางหราว บอ ดอน โมยว อี กอย แคง ฆางหราว. อัน เฌา ตี แฮะ พาน เบลห บอ กาดาย บอ อี กอย แดง กาดาย ดอน โมยว บอ อึม นัมมูกซารา บอ อี กอย แคง อึม ตี ดอน โมยว. อัน ฆาว ปวน อัน เฌา ตี ต็อห, “อาว ฮู บอ เหลณ, แคะ ปี ดึอม กาลาง เฌาพรา ดี แดเจณ อัน อี บยาน โฆรห อัน เฌา, อึณ ดี แบน โตต ดอน โมยว. 7เซ อามู อามาด เฌาพรา กาดัง อึณบู ฮี บูด เวา อัน, ปี คราม เฌาพรา ดี โบง, ปี ตู แตห อัน อี นับ บอ แปะ แฮะ ดึอม กาลาง อัน ดี ดูอี อี บยาน โฆรห เฌาพรา, อี มูห แดเจณ อัน เฌา, อึณ ดี วี ลึห ซีคยา เฌะฌูง โตต ดอน โมยว.”

8ปัน อัน ตี, โอว วี ยึร โฆรห แคง ฆางหราว ปอ อู เฌณ ต็อห, “แตห แม ฮาว ดี อามู อามาด เฌาพรา อี จ็อง แดง อึม นัมมูกซารา บอ แดง กาดาย อี แฮะ โฆ็ง ซีลอย แปะ ตึอน.”

9โอว มืร บอ ฮาว โดง กอย อัน, หมาณ, แตห อัน ดัว ซีลอย แปะ ตี ดี โอว. อัน วี ต็อห, “แตห แม ดึห โฮม, อึณ ดี ซ็อง แคง วัต แม. มาแล, แคง โมต แม อึณ ยี งาม ปี งาม มาเพียน.” 10โอว มืร ดึห ซีลอย แปะ แคง แด อัน ตี, บอ โฮม. ดอ โฮม โอว, อึณ งาม ปี งาม มาเพียน. ดอ วี แมง โอว, อึณ บอ วี ซ็อง กอ อาณ แคง วัต โอว. 11อัน วี ต็อห ดี โอว, “แม ดี โลว วี บยาน โฆรห เฌาพรา ลอง ปี พยาก อัน ดี ดูอี ดอน มาน ดอน มืง, ดอน ครึร ดอน ฌึร, บอ ดี ดูอี อี กาลาง โฆรห ดอน โมยว, บอ ดี เฆ คูนดีคัม บอกาเฆลียด.”

Currently Selected:

ปบ 10: pce

Highlight

Copy

Compare