หม 99
99
ลอง เฌาพรา อึบ โตต ดอน โมยว
1เฌาพรา อึบ โตต ดอน โมยว แดง กาดาย. โคว, เฆ ดูอี โยว อัน. อัน เฌา บอ กอย กาแต อามู อามาด อัน อี จืร เครูบ.#99:1 อึณ กาลาง ลอง อารึบ เครูบ อี กอย แดง ซีบลึก ฌีดืก เฌาพรา โคว, บอ มาอีม บอ โยว บอ เยณ.
2เฌาพรา แฮะ บอด มยาด แคง มืง ฌีโอน.#99:2 บอ นอน ฌีโอน, มืง อาดาวีด บอ มืง เยรูซาแลม มูห อู โปละ. อัน เฌา บอด มยาด หลึอม ดูอี บอกาเฆลียด.
3แตห เฆ อืบ ปวน อัน เฌา อี บอด กาเซา อี หมึอม โยว กาเซา. อัน เฌา แฮะ ซีงา บอด อาคัร หมาน.
4คูนดีคัม ตี แฮะ มึห ปวน ตาง. อัน ร็อก เฆ ดูอี อี โบง นา มูห นา หมาน. แม เฌา แฮะ มาโนว ดูอี อีซาเรลัะ, แตห เฆ นับ นา มูห นา หมาน.
5แตห เอ อืบ เฌาพรา ปี กรึบ เอ. แตห เอ กรึบ นา กอย มาลาง อัน เฌา. อัน เฌา แฮะ ซีงา บอด อาคัร หมาน.
6อาโมวแซ ฆาย อาโรน ตึอน มูห ดูอี อี หลู ดี อัน เฌา. อาซามูเอน บอ มูห อี ซาคึร ฆาว ปวน อัน เฌา. เฆ ตี ฮี ซาคึร ดี เฌาพรา, อัน เฌา บอ โทม โฆรห ปี ซาคึร เฆ.
7อัน เฌา แฮะ กอย แคง อึณอูะ, กาลาง โฆรห ดี อาโมวแซ ฆาย อาโรน ตึอน. ฆาย บอ โบง โดบ ปี ต็อห อัน เฌา, บอ โดบ ดารา ปี กาลาง อูน อัน ดี เฆ.
8อึย แม เฌาพรา, แม มูห เฌาพรา ปี กรึบ เย. แม เฌา แฮะ โทม โฆรห เฆ. แม เฌา ปี บอ แฮะ ดัม หมาบ โกบ แฮะ กาลึบ เฆ, แม เฌา ยี วี แตห เฆ นับ, แม มูห อี ฆ็อห แวน หมาบ เฆ.
9แตห เอ อืบ เฌาพรา ปี กรึบ เอ. แตห เอ กรึบ อัน เฌา ดี นอน ซีงา บอด อี มูห โดง กอย อัน. โคว, อัน เฌา มูห เฌาพรา อี ซีงา บอด อาคัร หมาน.
© 2021, Wycliffe Bible Translator, Inc. All rights reserved.