หม 86
86
ปี ซาคึร แตห เฌาพรา จอย
อาดาวีด แฮะ แดม ปี ซาคึร นี.
1อึย แม เฌาพรา, แตห แม โทม โฆรห ปี ซาคึร โอว, อี มูห ดูอี ฆีน ดูอี พลาน.
2แตห แม เฌา บัร รีด อาซาก โอว, แกวะ แตห โอว ยัม. โคว, โอว แฮะ บึง แม. แม เฌาพรา ปี กรึบ โอว, แตห แม คยอด โอว.
3โอว หมาณ, แตห แม เฌา เฆฌู โอว. โคว, โอว แฮะ ซาคึร ดี แม ดอง วัน.
4โอว หมาณ, แตห แม แตห น็อห โอว วี ดาคึย. โคว, น็อห โอว แฮะ โหลห มี แม.
5แม เฌา, แม มึห น็อห หมึอม, น็อห กาเว อี. แม มืร ร็อก กาเซา ดอน อี อี ซาคึร ดี แม.
6แม เฌาพรา, โอว หมาณ, แตห แม โทม โฆรห ปี ซาคึร โอว, แตห แม เฌา เฆฌู โอว.
7ปัน ดี ฌัม โอว ดูก ตาง, โอว ดี ซาคึร ดี แม. แม เฌา ดี บอ โทม โฆรห ปี ซาคึร โอว.
8แคะ กอย เฌา ปี กรึบ ดูอี เฮา, อาว มึห อี ปี แม เฌา. ปี โบง เฆ อาว ปี ปี โบง แม เฌา.
9แม เฌาพรา แม แฮะ พาน เบลห เฆ อาโมยว ดูอี ดอน โมยว, แตห เฆ บอกาเฆลียด ตัห กรึบ แม เฌา. เฆ ดี บอ อืบ แม เฌา.
10โคว, อึณ มูห แม เฌาพรา อี ตาง. อึณ มูห แม เฌาพรา อี โบง นา หมึอม อาม กาเซา. อึณ มูห มี แม เฌา อู กาดัง อี มูห เฌาพรา อาคาคัร.
11แตห แม เฌาพรา วี มาโนว โอว ลอง ปี อึง แม, แตห โอว ปึอน ดี โบง นา มูห นา หมาน. แม แตห โอว มึห น็อห ซี โดบ มี แม. แตห โอว โรวเซ แม.
12บอ น็อห บอ พึอม โอว บอ โตต ดี อืบ แม เฌา. โอว ดี อืบ มยูก แม เฌา เซเซ.
13โคว, แม ร็อก กาเซา โอว. แม มืร แฮะ คยอด เลห โอว แคง มืง มารานัะ.
14อึย แม เฌาพรา, อึณ มึห ดูอี ปีคึก เฆ, เฆ แฮะ โบง กาบัห ดี โอว. พึง เฆ ดูอี อี ฮาย กาเซา, เฆ แฮะ คราม ดี ง็อห ยัม โอว. เฆ มูห ดูอี ยี ตู โรวเซ แม เฌา.
15อึณ ยี มูห แม เฌา, แม มูห เฌาพรา อี ร็อก กาเว เย. แม เฆฌู เย, แม ตู หงึย รู. แม บอ มึห น็อห หมาน เซเซ.
16แตห แม เฌา ยอด โอว, กาเว โอว. แตห แม ดัว โปลม ดัว แฮณ ดี โอว อี มูห แดเจณ แม. แตห แม คยอด โอว.
17แตห แม โบง นา หมึอม ดี โอว, แตห รันซู โอว ยึร ลอง อัน ตี, แตห เฆ วี ซาย อี. โคว, แม เฌา แฮะ จอย โอว, แฮะ แตห น็อห โอว วี ดาคึย.
© 2021, Wycliffe Bible Translator, Inc. All rights reserved.