หม 80
80
ปี ซาคึร ดูอี อี แฮะ ชึม แตห เฆ วี ดาคึย
อาซาบ แฮะ แดม โหมว นี. แตห ดา อี แยต เฆ อี ต็อห โหมว นับ, โลว โดบ แมง อี จืร โบห.
1อึย แม เฌาพรา อี อึบ ดูอี อีซาเรลัะ, แม ปี ดูอี อี เฮียง มาบู, แตห แม โทม โฆรห เย. แม เฌา แฮะ แยต หลูกหลาน อาโยว, แตห อึณ ปี ดูอี อี เฮียง มาบู แยต มาบู อัน. แม เฌา อี กอย กาแต อามู อามาด อี จืร เครูบ, แตห อาโรง บลาง แม เฌา ลึห.
2เฆ ครึร อาเอพารีม, อาเบนยาม บอ อามานาเซ, แตห เฆ ยึร อาพูง ดังโคว แม เฌา. แตห แม บยัะ ปวน แม, แตห แม ตัห จอย เย.
3อึย แม เฌาพรา, แตห แม เฌา จอย เย, แตห เย วี มึห โปลม, แตห เย วี ยึร ฆูง เฆฌู แม, แตห แม วี คยอด เย.
4อึย แม เฌาพรา อี อึบ โตต โมยว อี มึห ปวน, ปัน เหมา แม เฌา ดี แวน น็อห รู แม? ปัน เหมา แม ดี วี โทม ปี ซาคึร เฆ ดูอี อาโมยว แม?
5อึณ ปี แม เฌา แฮะ แตห เฆ เดียง อึม งาย เฆ, แตห อึณ กาดาง ปี ดี โฮม เฆ. แม เฌา แฮะ แตห เฆ คัม ดูก กืน กาเซา.
6แม เฌา แฮะ แตห เฆ อี กอย โคบ เย, วี กาโฆห มืง เย. เฆ รันซู เย บอ กาณัห แนนัะ เย.
7อึย แม เฌาพรา อี อึบ โตต โมยว อี มึห ปวน, เย หมาณ, แตห แม เฌา จอย เย, แตห เย วี มึห โปลม, แตห เย วี ยึร ฆูง เฆฌู แม, แตห แม วี คยอด เย.
8แม เฌา แฮะ แตห ดูอี อีซาเรลัะ เลห แคง มืง แอฆึบ. อึณ ปี แม แฮะ รึต เลห เฮ มางูน. แม วี โฮว เตา เฆ ดูอี อาโมยว เฮา, บอ วี ซัม เฮ มางูน แคง มืง นี.
9อึณ ปี แม เฌา แฮะ โดห แปร บอ โละ กาดาย, แตห อึณ ปึอน ซัม, แตห เรียห เฮ มางูน ปึอน ดี ฮาว ลึก, แตห อึณ บอ แบร กาลัต บอ มืง.
10ดี นอน ดอน นอน บอ มึห ยาบ เฮ ตี. รา อัน บอ ฌัม โดง กอย เฮ อารีด อี ตาง กาเซา, อี กอย นา กัว.
11อึณ บอ ปี รา อัน บอ แบร ฮาว ดอน บลาก, กอ ฌัม อึม นัมมูกซารา. กาแดะ อัน กอ ฌัม แบลง อึม อูพาราด.
12อึย เฌาพรา, เหมา อึณ ปาย ปี วี ปยาต แวน แม โล็ง มาน มางูน ตี? เหมา อึณ ปาย ปี ควาง แม เฆ อี เฮา ตัห เบต เบล อัน?
13มาเลต แปร แฮะ ฮอต กูน อึณรึต เรียห อัน. แคะ กอย มาโดว แปร แฮะ ฮอต โฮม โตต เบล อัน.
14อึย แม เฌาพรา อี อึบ โตต โมยว อี มึห ปวน, เย หมาณ, แตห แม วี ตัห โดง กอย เย. แม เฌา อี กอย แคง ฆางหราว, แตห แม บอ ยอด โลง เย, แตห แม บัร เย ดูอี อาโมยว แม อี ปี เฮ มางูน ตี.
15แตห แม เฌา บอ ตัห ยอด ลึมลา เฮ มางูน ปี ซัม อูน แม เฌา. แตห แม ยอด แมน เย ปี ฆอน อีมาย ปี เฮียง แม.
16อึณ ปี เฆ รันซู เย แฮะ ฆัร เกห เฮ มางูน ตี, วี โดะ แคง เงา. เซ แม เฌา ยี เอห เฆ, เฆ ดี บอ ชึม.
17แตห แม เฌา บัร รีด ดูอี ปี ร็อห แม. อี มูห ฆอน ดูอี แปะ แฮะ แตห แม เฌา แบน ดูอี อาโมยว แม.
18ปัน ตี เย มืร ตู วี กาฆ็อห กาย็อห ดี แม. เย หมาณ, แตห เย วี มึห โปลม กามาย. เย ดี บอ อืบ บอ กรึบ แม เฌา.
19อึย แม เฌาพรา อี อึบ โตต โมยว อี มึห ปวน, เย หมาณ, แตห แม จอย เย, แตห เย วี มึห โปลม, แตห เย บอ ยึร ฆูง เฆฌู แม เฌา, แตห อึณ บอ คยอด เย.
© 2021, Wycliffe Bible Translator, Inc. All rights reserved.