หม 78
78
ลอง เฌาพรา แยต ดูอี ปี อึบ อัน
อาซาบ แฮะ แดม โหมว อี โดบ แมง มาซาคี.
1แคะ กอย เบ ดูอี บอกาเฆลียด, แตห เบ โทม โฆรห โอว. แตห เบ บอ ซาดีก น็อห เบ, โทม ปี กาลาง โอว.
2โอว ดี กาลาง โฆรห อี มึห อางยาน, แตห เบ โทม. อึณ บอ มูห โฆรห อี ตู ลึห ดี อี ซีณ ดอ มึอน.
3อึณ มูห โฆรห แปะ แฮะ ดึอม ยึร เอ, โฆรห ปี ดึอม แค ฆูณ มา ดา ยา เอ, แตห เอ โทม.
4โอว มืร ตู เครียง โฆรห ตี, โอว ดี กาลาง ดี หลูกหลาน เอ. โอว ดี กาลาง แตห เฆ ปอ โจว นับ ลอง แปะ แฮะ โบง อัน เฌา อี หมึอม อาม กาเซา, แตห เฆ นับ บอ ปวน อัน บอ อี กาอาบ อืบ ดอน โมยว.
5อัน เฌา แฮะ ดึอม ดัว ดารา ดี เฆ ดูอี อีซาเรลัะ. อัน บอ แฮะ กาลาง อูน ดารา ดี ครึร อาโกบ. อัน เฌา บอ แฮะ ดึอม กาลาง ดี ดา ดา เอ, แตห เฆ วี มาโนว บอ หลูกหลาน เฆ.
6อัน ซี แตห ดูอี แบน โจว แบน โจว นับ ลอง อัน ตี, วี แตห เฆ อี ดี ฆึอด วาย นี วี ปึอน ดี กาลาง ฮาว ดี หลูกหลาน เฆ.
7เซ อึณ ปาย ตี, เฆ ดี บอ หณึม บึง เฌาพรา. เฆ มืร ตู ปีว แปะ แฮะ ดึอม โบง เฌาพรา. เฆ ดี บอ โดบ ดารา เฌาพรา เซเซ.
8เฆ โลว โบง ปาย ตี, แกวะ แตห เฆ ปี ดา ดา เฆ อี ดืร กาเซา, อี นับ ดี แทณ, นับ ดี โบง กาบัห ดี เฌาพรา. เฆ บอ มูห ดูอี อี ตู โดบ ซีคยา เฌาพรา. น็อห พึอม เฆ มืร ตู หณึม ซีคยา เฌาพรา.
9เฆ ดูอี เอพารีม แฮะ ดึอม โฆ็ง อัะ เฆ บลา, กาโฆห ดี อี. เฆ ยี วี กาดูห ดี เตา ดอ กาโฆห เฆ ตี.
10เฆ มืร ตู โดบ แปะ แฮะ ดึอม ดัว เฆ กาดีก ซัดฌา ดี เฌาพรา. เฆ แฮะ แวน โฆรห ปี กาลาง เฌาพรา ดี เฆ.
11เฆ แฮะ ปีว แปะ แฮะ ดึอม โบง เฌาพรา. เฆ ปีว บอ อี หมึอม อาม แปะ แฮะ ดึอม ยึร เฆ.
12ดา ดา เฆ แฮะ ดึอม ยึร อี หมึอม อาม กาเซา แปะ แฮะ โบง เฌาพรา ดี ฆลัง จอนา แคง มืง แอฆึบ ตึอน.
13ดอ อัน ตี เฌาพรา แฮะ โบง แตห อึม ดีโหนง เรณ กาย็อห แบน อา บลาก, แตห เฆ ปึอน ดี กาโลห ฮาว ดี กาแต. อึม ตี อาว ฮู แหล, วี แบน ปี แรง จา.
14กาแต ซีแง เฌาพรา บอ โบง แตห อึณ มึห อึณอูะ แยต ดี อาต เฆ. แคง หมึร อัน เฌา บอ แตห อึณ มึห บลาง เงา อี แหน อึณเตณ โดง ดี ฮาว เฆ.
15ดอ กอย เฆ แคง แปร กาฮ็อห, เฌาพรา แฮะ แตห มาว ดัห, แตห อึณ เลห อึม กืน.
16อัน เฌา แฮะ โบง แตห อึม กืน เลห ดี ดาอาง มาว, แตห อึณ กอ แหล ปี อึม แบลง ตาง.
17ดอ กอย เฆ แคง แปร กาฮ็อห ตี, เฆ ยี แว โบง หมาบ กืน, เฆ บอ ปีรู เฆ ดี เฌาพรา อี อึบ โตต ดอน โมยว.
18เฆ บอ เทว น็อห เฌาพรา. เฆ บอ หมาณ ปี ซี โฮม เฆ.
19เฆ กาลาง โฆรห ตู หมึอม ลอง เฌาพรา ต็อห, “เหมา เฌาพรา ดี ปาย ดี ดัว ปี ดี โฮม ดี เอ แคง แปร กาฮ็อห นี?
20แฮะ มูห, อัน เฌา แฮะ แตห มาว ดัห แตห อึณ เลห อึม แหล ปี อึม แบลง. เอ ยี ตู ทาง อัน ดี ดัว บอ โบม เฆ ยัง, แตห เอ ดูอี ปี อึบ อัน โฮม.”
21โคว, ดอ ยึร เฌาพรา โฆรห ปี กาลาง เฆ ตี, อัน บอ รู กาเซา ดี เฆ. อัน เฌา บอ แตห เงา กาซึม ดูอี อีซาเรลัะ. อัน บอ แว รู ดี เฆ.
22โคว, เฆ ตู หณึม, ตู โรวเซ เฌาพรา. เฆ มืร ตู หณึม, ตู ทาง เฌาพรา ปึอน คยอด เฆ.
23มาแล, เฌาพรา วี กาลาง ดี เบลณ นา แดง. อัน บอ แตห ฆางหราว อึณวึห.
24แฮะ ฮอต, อัน แตห ปี ดี โฮม โจห โลง ปี ฆลาย, แตห เฆ ปึอน ดี โฮม. อัน ดัว ดีฆาว อี เลห ฆางหราว ดี เฆ.
25เฆ บอกาเฆลียด บอ ปึอน ดี โฮม ปี ดี โฮม อามู อามาด เฌาพรา. อัน เฌา บอ แตห เฆ ปึอน ดี โฮม แคะ ลึบ วัต เฆ.
26เฌาพรา บอ โบง แตห คูน ตัห นา เลห ซีแง บูด แคง เบลณ, อึณ บอ มูห ปวน อัน เฌา, อี แตห คูน วี บูด บอ นา เตต.
27อัน บอ แตห มาซีม ตัห โลง ฌัม โดง กอย เฆ, แตห อึณ กืน ปี กาปูห, วี แบน ยัง ปี ดี โฮม เฆ อี กืน ปี กาฮาต อี กอย บาง อึม นัมมูกซารา.
28อัน เฌา แตห มาซีม เฆ ตี โจห ดี กาแต โดง คยัะ เฆ, บอ โลง โคบ โดง กอย เฆ ดอน โปละ.
29เฌาพรา บอ แตห เฆ ปึอน ดี โฮม ยัง ตี, แตห อึณ โดบ น็อห ลามาก เฆ.
30มาแล, น็อห ลอพัะ เฆ ยี ตู นับ ดี โตต. ดอ ซีงยา โฮม เฆ ตี, ยัง ซี กอย แคง โมต เฆ,
31เฌาพรา บอ รู ดี เฆ ดูอี อีซาเรลัะ ตี. อัน บอ ง็อห ยัม เฆ อี มึห โปลม มึห แฮณ หลึอม อี เฮา. อัน บอ ง็อห แวน กืน เฆ กาโณม อี กอย กาแต ดูอี อีซาเรลัะ.
32เฆ แฮะ ยึร ปาย ตี มืร, เฆ วี โบง ฮาว หมาบ ปอ อึณปัว. เฆ แฮะ ยึร อี หมึอม อาม แคะ ตี, เฆ ตู หณึม ตู บึง เฌาพรา.
33ปาย ตี, เฌาพรา โบง แตห อาซาก เฆ ชึม ดีโลย ดีลาย. แตห เฆ มึห ดูก มึห หณาบ แบน ซีนัม แบน ซีนัม.
34ดอ ง็อห เฌาพรา เฆ มัง อี กาแต เฆ, เฆ วี โหลห เฌาพรา. เฆ วี กาปลูะ น็อห วี ออน ดี ซาคึร ดี อัน.
35เฆ บอ วี โหลห เฌาพรา อี อึบ โตต ดอน โมยว. เฆ โหลห อัน เฌา อี ฆ็อง อี แร เฆ, อี คยอด อี จอย เฆ.
36ปัน ตี เฆ ยี นับ ดี ณึงราง, กาลาง นา หมึอม ดี เฌาพรา. เฆ นับ ดี กาโลว ดี เฌาพรา.
37น็อห เฆ มืร ตู ซืร ตู หมาน ดี เฌาพรา. เฆ มืร ตู โบง โดบ แปะ แฮะ ดึอม กาแซณ เฆ ดี อัน เฌา.
38เฌาพรา ยี แฮะ กาเว เฆ, วี ฆ็อห แวน หมาบ เฆ. ตู ปยาต เฆ. แบน เฌณ แบน เฌณ เฌาพรา บอ ยืน บอ โอด น็อห รู อัน ดี เฆ.
39เฌาพรา วี โหลห, เฆ มูห โมยว อี นับ ดี อัม นับ ดี ลาต. อัน นับ, เฆ บอ ปี คูน อี ฮาว, อาว ฮู นับ ดี วี ตัห.
40ดอ กอย เฆ แคง แปร กาฮ็อห ตึอน, เฆ บอ โบง กาบัห ดี เฌาพรา แบน เฌณ แบน เฌณ. เฆ มืร โบง แตห อึณ เซา ดี น็อห เฌาพรา.
41แบน เฌณ แบน เฌณ, เฆ แฮะ วี เทว น็อห เฌาพรา, วี โบง แตห อึณ เซา ดี น็อห อัน เฌา อี บอด กาเซา, อี มูห เฌาพรา ปี กรึบ เฆ ดูอี อีซาเรลัะ.
42เฆ มืร แฮะ ปีว ลอง ปวน เฌาพรา. เฆ ปีว ซีแง ดอ แฮะ จอย อัน เฌา ดี เฆ แตห เฆ ลอด ตัะ รันซู เฆ.
43เฆ ปีว ซีแง ดอ แฮะ โบง เฌาพรา อี หมึอม อาม กาเซา ดี ฆลัง จอนา แคง มืง แอฆึบ ตึอน.
44ดอ อัน ตี เฌาพรา แฮะ โบง แตห อึม แบน หนาม, แกวะ แตห เฆ ปึอน ดี เดียง อึม อี กอย แคง แบลง.
45อัน บอ ตึย มากามูด, แตห อึณ ตัห ก็อะ เฆ. อัน บอ แตห มาโระ กืน ตัห ดัว ดูก ดี เฆ.
46อัน แฮะ แตห วัะลัว ตัห โฮม ปี ซัม เฆ, แตห บอ มา อาโฌ็ง โฮม โตต อี ลัต แคง มาน แคง โดง นา เฆ.
47อัน แฮะ แตห เบรีย โจห, แตห อึณ ปยาต เฮ มางูน, แตห อึม ดาด โจห ปยาต เบล ดีปู.
48แคะ กอย มามัก เฆ, อัน เฌา แตห เฆ ชึม ดอ โจห เบรีย ตี. บอ มาบู กอ ยัม โตต ดอ ดัห เบล กาซัห ดี เฆ.
49เฌาพรา บอ แตห เฆ ยึร แคะ รู อัน ดี เฆ. อัน บอ มึห น็อห ฌ็อง เฆ, กาอีห เฆ, แตห อึณ ปี พึง อามู อามาด อี ง็อห โตต ดอน โมยว แฮะ ตัห ปยาต เฆ.
50อัน เฌา แฮะ แรน ปี ดี ปาย อัน ดี รู ดี เฆ. อัน ตู แตห เฆ ลอด ยัม, โบง แตห เฆ มึห เซา รอฆา.
51เฌาพรา แฮะ ง็อห แวน ฆอน ฆีณ ดอน อี อี กอย แคง มืง แอฆึบ. อึณ มูห ฆอน เฆ ดูอี อี ซี มึห โปลม, อี หณัม กัด, อัน แฮะ ง็อห โตต แคง มืง เฆ ดูอี อี มูห หลูกหลาน อาฮาม ตึอน.
52อึณ ยี มูห ดูอี อาโมยว ปี อึบ เฌาพรา, อัน เฌา วี แตห เฆ เลห แคง มืง แอฆึบ, แตห อึณ ปี พึง มาบู เลห โฮม เปต. อัน บอ ตึย เฆ ฮาว แคง แปร กาฮ็อห, แตห เฆ ปี มาบู อัน.
53เฌาพรา บอ แยต เฆ, แตห เฆ ปึอน ดี ฮาว ดาคึย, แกวะ แตห เฆ โลว โยว มาเซ. อึณ ยี มูห รันซู เฆ, อึม ดีโหนง เรณ แฮะ อึณปูน ยัม โตต เฆ.
54ปาย ตี, อัน เฌา ตึย เฆ ฌัม ดี กาอูน มืง บอด, มืง ปี ต็อห เฌาพรา ดี ดัว ดี เฆ. อึณ มูห มืง ดี นอน แปะ แฮะ ดึห เฌาพรา ดี อี เฮา.
55ดอ ลึบ เฆ แคง มืง ตี, เฌาพรา แฮะ โฮว เตา ดูอี อาโมยว เฮา. แฮะ ฮอต, อัน วี กาซาง กาดาย เฆ ตี, วี ดัว ดี ดูอี อีซาเรลัะ, แตห เฆ ปึอน ดี ซัม กาง เฆ.
56เฆ ดูอี อีซาเรลัะ ยี วี แวน เฌาพรา อี อึบ โตต ดอน โมยว. เฆ บอ เทว น็อห อัน, บอ ตู โดบ ดารา แปะ แฮะ กาลาง อัน ดี เฆ.
57เฆ ปี วี โบง นา ตู หมึอม ปี ฆูณ ดา เฆ, ตู หณึม ซีคยา เฌาพรา. เฆ ปี บลา อัะ อี ฮาว โฆะ แฆะ.
58เฆ กรึบ โดง จา แบน โปละ แบน โปละ, แตห เฌาพรา วี รู ดี เฆ. เฆ กรึบ บอ อารึบ ปี ตู คัม เฌาพรา เฆ โบง.
59เฌาพรา บอ ยึร ลอง อัน ตี, อัน บอ วี รู กาเซา บอ แวน โตต เฆ.
60เฌาพรา แฮะ แตห เฆ เบลห ทึบ บีก บอด แคง มืง ซีโลว, แตห อัน ปึอน ดี กอย รึม โดบ เฆ ดี ตี. มาแล, อัน วี เลห โดง กอย อัน ตี, อาว ฮู แตห อัน กอย กาตัด เฆ.
61เฌาพรา แฮะ ควาง แตห รันซู อัน พาด ดึห ฌีดืก อี บยัะ อาพูง ดังโคว อัน, แตห อึณ วี ฌัม โดง กอย รันซู อัน.
62เฌาพรา แตห ดูอี ปี อึบ อัน วี ยัม ดี มาปัวะ ลาง. อัน รู กาเซา ดี เฆ ดูอี อี มูห อาโมยว อัน.
63ฆอน กาโณม เฆ, เฌาพรา แตห เฆ กาซึม แคง เงา. ฆอน ดีบยา เฆ อาว ฮู มึห โดง ดี คัด.
64บอ ดูอี อี หลู ดี เฌาพรา แฮะ ยัม ดี มาปัวะ ลาง. ยา ซีปรัห เฆ มืร ตู ดัน กลึร, ตู ดัน ยาม.
65วาย อัน ตี อึณ บอ ปี เฌาพรา แฮะ อึณซึห ปี ดูอี ยึต ป็อห แฮะ วี อึณซึห.
66อัน วี กาโฆห ดี รันซู อัน บอ โบง แตห เฆ ซาย อี เซเซ.
67แฮะ ฮอต, อัน บอ แวน หลูกหลาน อาโยว ตึอน. อัน มืร ตู ร็อห เฆ ครึร อาเอพารีม.
68อัน ยี ร็อห หลูกหลาน อายูดา. อัน บอ ร็อห นอน ฌีโอน อี มูห โดง ปี ร็อก อัน.
69ดี ตี อัน เฌา บอ ซัม โฮว อัน, แตห อึณ ซีคยา ปี ฆางหราว, แตห อึณ มัน ปี กาดาย แปะ แฮะ โบง เฌาพรา อี ตู บลืง ดอ เหมา.
70เฌาพรา บอ ร็อห อาดาวีด อี มูห แดเจณ อัน, แตห อัน เลห แคง โดง เฮียง อัน มาบู,
71แตห อัน วี ยอด แมน ดูอี อีซาเรลัะ, แตห อึณ ปี ปี ดึอม ยอด แมน อัน มาบู. เฌาพรา แตห อัน แบน คูนดีคัม, แตห อัน แยต เฆ ดูอี ปี อึบ อัน เฌา.
72ดอ ยอด แมน อาดาวีด ดี เฆ ตี, อัน โดบ น็อห ซืร น็อห หมาน อัน. แคะ มึห อัน อากยาม อางยาน บอด, อัน บอ ตา โตต ดอ อึบ อัน ดี เฆ.
© 2021, Wycliffe Bible Translator, Inc. All rights reserved.