หม 74
74
ปี ซาคึร แตห เฌาพรา คยอด ดูอี อีซาเรลัะ
อาซาบ แฮะ แดม โหมว นี อี โดบ แมง มาซาคี.
1อึย แม เฌาพรา, เย ปี มาบู ปี เฮียง แม. เหมา อึณ ปาย ปี แวน แม เฌา ดี เย? เหมา อึณ ปาย ปี รู แม เฌา ดี เย เซเซ?
2เย หมาณ, แตห แม เฌา บอ วี โหลห เย ดูอี แปะ แฮะ ร็อห แม เฌา ซีณ ดอ มึอน. แกวะ ปีว เย อี มูห ดูอี แปะ แฮะ ทูด เลห แม ดี ดูอี เฮา, แตห เย แบน ดูอี ปี อึบ แม. แตห แม เฌา โหลห บอ นอน ฌีโอน อี มูห โดง แฮะ ดึอม กอย แม เฌา.
3แตห แม เฌา ฮาว ยอด โฮว แม เฌา อี แฮะ ลึร แฮะ กาปยาต. แฮะ เหลณ, เฆ รันซู แม เฌา แฮะ ปยาต แวน โตต.
4ดอ อัน ตี เฆ แฮะ กาโพรม ดี ดัด ตาง แคง โฮว อี มูห โดง กรึบ เย ดี แม. เฆ บอ ซัม อาลาม เฆ, แตห ดอน อี ยึร เฆ แฮะ ออง ดี ตี.
5เฆ โบง แคง โฮว ปี ดูอี อี แฮะ ดึห มึย ฆัร เฮ ตาง.
6เฆ แฮะ ดึห มึย เฆ มาปัวะ ดอย ราง โบห อี ดึก ดี แรง, แตห อึณ ลึร กาปยาต โตต.
7เฆ แฮะ ดึห เงา โดะ กาซึม โฮว แม เฌา. เฆ ตู โรวเซ โดง บอด อี มูห โดง กอย แม เฌา.
8แคง น็อห เฆ, เฆ ต็อห ดี โบง แตห เย กอ ลึร โตต. แคง มืง บอ มืง เฆ แฮะ โดะ กาซึม ดอน โปละ, อี มูห โดง กรึบ เย เฌาพรา.
9ลักซานา ปี เบลห เย แตห เย โนว ลอง แปะ แฮะ โบง แม เฌาพรา แฮะ หราย โตต ดอน โมยว. ดูอี อี บยาน โฆรห เฌาพรา, อู วี มืร อาว ฮู มึห. อึณ ดี เหลณ แคะ เหมา, ดอ ตู มึห คอ อู วี กาแต เย อี นับ ลอง อัน ตี?
10อึย แม เฌาพรา, ปัน เหมา แม ดี แตห เฆ รันซู จู กาณัห แม? แม ดี บอ แตห เฆ แนนัะ แม เซเซ?
11เหมา อึณ ปาย ปี ตู จอย แม ดี เย? เหมา อึณ ปาย ปี กอย แม เฌา ตู โบง มาเซ ดี เฆ?
12อึย แม เฌาพรา, แม เฌา แฮะ มูห คูนดีคัม เย ซีณ ดอ โฆว อัน. แม เฌา บอ แฮะ คยอด แฮะ จอย เย แบน เฌณ แบน เฌณ.
13ปวน ตาง แม เฌา แฮะ โบง แตห อึม นัมมูกซารา กาย็อห. แม เฌา บอ กาบัก ฆีณ มากราย อี กอย แคง อึม ตี.
14แม เฌา แฮะ ฮอต มัห กาลาต ฆีณ มากราย ตี, วี ดึห โดว ยัม อัน, วี แตห อึณ แบน ปี ดี โฮม มาโดว แปร.
15อึณ บอ มูห แม เฌา อี โบง แตห อึม โตห, แตห อึณ กอ แหล เซเซ. แม เฌา บอ โบง อึม แบลง อี ฌูห กาเซา, แตห อึณ วี ฮีด แบน โปละ แบน โปละ.
16แม เฌา บอ พาน แตห อึณ มึห มาเฆียน บอ ซีแง. แม บอ มูห ดา กาณา อี อึบ บอ กาแต ซีแง บอ แคง หมึร.
17แม เฌา แฮะ โบง แตห อึณ มึห กาอูน ดอน โมยว แดง กาดาย, แตห อึณ บอ มึห บอ อาคราว แหม, อาคราว ฆัด.
18อึย แม เฌาพรา, แตห แม เฌา บอ วี โหลห ปี ปาย เฆ รันซู แม ดี กาณัห แม. แตห แม โหลห แคะ รึร ดูอี ดอ กาลาง เฆ นา จาว ดี แม เฌา.
19แม เฌา, แกวะ อาบ ดูอี ปี ร็อก แม ดี เฆ รันซู อี ฮาย กาเซา, อี ปี มาโดว แปร. แม เฌา, แกวะ ปีว อาโมยว เฆ ดูอี ปี อึบ แม อี แฮะ คัม ดูก ดี อี เฮา.
20แตห แม เฌา บอ วี โหลห ปี ดึอม กาแซณ แม ดี แดเจณ แม. โคว, อึณ มึห อี ฮาย กาเซา อี แฮะ กอย ดอน นา ดอน โปละ แคง อับ ว็อง.
21แกวะ แตห เฆ อี คัม ดูก ดี อี เฮา หมึอม ซาย. แตห เฆ ดูอี ดูก ดูอี ฆีน วี ปึอน ดี อืบ แม เฌา.
22อึย แม เฌาพรา, แตห แม บยัะ ดี เฆ แคะ ตู หมึอม เฆ. แตห แม เฌา บอ วี โหลห, เฆ ดูอี รึร แฮะ พยาก แฮะ กาณัห แม เฌา ดอน ซีแง.
23แม เฌา แกวะ ปีว โฆรห แปะ แฮะ ดัด แฮะ แดะ เฆ รันซู แม. แตห แม โหลห ปี ดัด ซีนัน ซีนืง เฆ เซเซ, ปี แนนัะ เฆ ดี แม เฌา.
© 2021, Wycliffe Bible Translator, Inc. All rights reserved.