หม 72
72
ปี ซาคึร คูนดีคัม
อาซาโลวโมว แฮะ แดม โหมว นี.
1อึย แม เฌาพรา, หมาณ, แตห แม เฌา มาโนว คูนดีคัม, แตห อัน นับ ดี ซูงพยาด, แตห อึณ ปี ปี ซูงพยาด แม. น็อห ซืร น็อห หมาน แม เฌา, แตห แม ดัว บอ ดี อัน.
2แตห อัน วี ปึอน ดี ซูงพยาด นา หมาน ดี เฆ ดูอี ปี อึบ แม เฌา, แตห อัน วี ซูงพยาด การัม ดี ดูอี อี แฮะ คัม ดูก.
3โกบ โบง อัน นา มูห นา หมาน, เฆ ดูอี แคง มืง บอ มืง ดี บอ โคย ดาคึย.
4คูนดีคัม ตี, อัน ดี บอ ซูงพยาด ดี เฆ ดูอี ดูก ดูอี ฆีน, แตห อึณ การัม. อัน ดี บอ จอย ฆอน เฆ อี ตู มึห มาเซ, บอ ปยาต เฆ อี โบง นา จีจีว ดี อี.
5ดอ ซี บลาง มาเฆียน เฆ ซีแง, แตห อัน อึบ แบน ฌาด แบน ฌาด.
6ดอ อึบ คูนดีคัม ตี ดี ดูอี, แตห อึณ ปี ฆลาย อี โจห แคง โดง นา, แตห อึณ ปี บอ อึม ฆลาย อี โจห, แตห กาดาย อัม.
7ดอ กอย อัน ตี, เฆ ดูอี อี มึห น็อห ซืร น็อห หมาน, เฆ ดี บอ กืน กาเซา. เฆ ดี บอ กอย ฆยามซา ดาคึย ดอน อี, แตห อึณ กอ ฌัม ปัน ดี หราย บลาง มาเฆียน.
8มาน มืง ปี อึบ อัน ดี บอ กาว็อห กาเซา, อึณ ดี บอ จูห ดี อึม นัมมูกซารา อู บลาก, กอ วี ฌัม อึม นัมมูกซารา ปอ อู บลาก. อึณ ดี บอ จูห ดี อึม แบลง อูพาราด, กอ ฌัม โดง ซืด กาดาย.
9เฆ ดูอี อี กอย แคง แปร กาฮ็อห, เฆ ดี บอ ตัห โฆม, ตัห กรึบ อัน. แคะ กอย รันซู อัน บอกาเฆลียด, เฆ ดี บอ ตัห โดง กอย อัน, วี มูด ฆึบ ดี กาดาย.
10เฆ คูนดีคัม อี กอย มืง ทาซีด บอ คูนดีคัม อี กอย แคง ฆูน อึม นัมมูกซารา, เฆ ดี บอ ตัห ฮับ จึง ดี อัน. เฆ คูนดีคัม แคง มืง เซบา บอ แคง มืง ซาบา, เฆ ดี บอ ตัห ดัว ลักซอง ดี อัน.
11แคะ กอย คูนดีคัม บอกาเฆลียด ดี บอ โลว ตัห โฆม, ตัห กรึบ อัน. เฆ ดูอี ดอน ฌึร ดอน ครึร ดี บอ แบน แดเจณ อัน.
12เฆ ดูอี อี คัม ดูก, อี แฮะ หมาณ ดี อัน, อัน ดี แตห เฆ วี ดาคึย. บอ เฆ อี ตู มึห มาเซ, อี ตู มึห โดง ดี บึง, อัน บอ จอย เฆ.
13อัน บอ มึห น็อห กาเว เฆ ดูอี ฆีน อี คัม ดูก. อัน บอ คยอด อาซาก เฆ อี ตู มึห มาเซ.
14อัน บอ ทูด เลห เฆ ดี ดูอี ฮาย บอ ดี เฆ อี คาหนาบ อี เฮา. โคว, อัน นับ อาซาก เฆ แฮะ ง็อห ตาง.
15แตห อาซาก คูนดีคัม โต็ง กาเซา. แตห อัน บอ ปึอน ครีว อี ตัห ดี มืง เซบา. แตห ดูอี ซาคึร อาดา อัน ดอง คืน ดอง วัน. แตห อัน บอ ปึอน ปี ม็องการา ดัว เฌาพรา เซเซ.
16แตห โหงว เฆ ดีฆาว บอ มึห กืน กาเซา แคง มืง ปี อึบ อัน. กาโย็ง โหงว บอ เบล ปี ซัม เฆ ดอน นอน, แตห อึณ บอ หมึอม บอ มึก, แตห อึณ กอ ปี เฮ อี กอย ดี นอน เลบานูน. แคง มืง ปี อึบ อัน, แตห อึณ บอ มึห เบล กืน ปี เปต.
17แตห อัน มึห ซาเร เซเซ. แกวะ แตห เฆ ปีว อัน ดอ เหมา. โคว, เฆ ดูอี ดอน โมยว ดี ปึอน ม็องการา ปี ดัว เฌาพรา โกบ มูห อัน คูนดีคัม.
18อึย เฌาพรา, เย อืบ แม เฌา อี มูห เฌาพรา ปี กรึบ เย ดูอี อีซาเรลัะ. อึณ มึห มี แม เฌา อู กาดัง อี โบง นา หมึอม อาม กาเซา.
19แตห เอ อืบ อัน เฌา อี มึห อาพูง ดังโคว ตาง เซเซ. แตห อี กอย แดง กาดาย นี ดอน อี กอ นับ ลอง อาพูง ดังโคว เฌาพรา. ซาตู ซาตู.
20ปี โหมว ทัม ปี แดม อาดาวีด อี มูห ฆอน อาเยเซ, แฮะ โตต ปูง นี.
บับ ฮาโอย
© 2021, Wycliffe Bible Translator, Inc. All rights reserved.