หม 69
69
ปี ซาคึร แตห เฌาพรา จอย
อาดาวีด แฮะ แดม โหมว นี. แตห ดา อี แยต เฆ อี ต็อห โหมว นับ, โลว โดบ แมง อี จืร โบห.
1อึย แม เฌาพรา, โอว หมาณ, แตห แม เฌา คยอด โอว. อึณ ปี อึม แฮะ อึณปูน ฌัม แมง โอว.
2อึณ แฮะ ปี โอว แฮะ กอย แคง โหนง อี ลึก กาเซา, อาว มึห โดง ดี แณต. อึณ บอ ปี โอว แฮะ โจห แคง อึม ลึก. อึม แฮะ ฮอต อึณปูน โตต โอว.
3โอว บอ นูน กาเซา บอ ดีหลัห โกบ ยาม แดะ โอว, แตห อึณ มึห อี จอย โอว. กาเดา แมง โอว บอ กาฮ็อห ต็อง, งาย โอว มืร แฮะ โมว โกบ แฮะ เหรต เหลณ โอว ดี เฌาพรา.
4เฆ อี ฌ็อง โอว บอ กืน กาเซา หลึอม ฮึก ฆีณ โอว. อึณ ยี ตู มึห ดีโคว. เฆ ฌ็อง โอว ปีเยณ. รันซู โอว บอ มึห โปลม มึห แฮณ หลึอม โอว. เฆ ซี ปยาต โอว ปีเยณ. เฆ หมาณ โอว ดัว วีว โกรวกราม ปี ตู ดึอม ปรา โอว.
5อึย แม เฌาพรา, แม เฌา บอ นับ ปี กาลึบ โอว. แม เฌา บอ นับ โตต แคะ กอย หมาบ โอว.
6แม เฌาพรา อี อึบ โตต โมยว อี มึห ปวน, แกวะ แตห เฆ อี โรวเซ แม เฌา โลว ซาย อี โกบ โอว. อึย แม เฌาพรา ปี กรึบ เย ดูอี อีซาเรลัะ, แกวะ แตห เฆ อี กรึบ แม เฌา มึห น็อห ลึร โกบ โอว.
7โอว บอ คัม แตห อี เฮา กาย็อง โอว, บอ คัม ดี ชึม ซาเร โกบ หณึม โอว แม เฌาพรา.
8โอว แฮะ ปี แคต ดี บีนอง วอแว โอว. โอว แฮะ วี ปี ดูอี อาโมยว เฮา, วี ตัห กอย แคง อึณโฮม เฆ.
9น็อห โอว แฮะ ร็อก กาเซา โฮว แม เฌาพรา. โอว กอ คัม ยัม ดี ร็อก. ปี แฮะ แนนัะ อี เฮา ดี แม เฌา, อึณ ปี โอว แฮะ วี คัม โตต.
10ดอ ยาม โอว บอ ยืน ปี ดี โฮม, เฆ แฮะ กาณัห โอว.
11ดอ ชึบ โอว ดี ตา ครึง จาน โกบ กลึร โอว, เฆ บอ แค จาว โอว.
12เฆ อี ฮาว โดบ อึณเตณ บอ กอย ดี ฆลัะ, เฆ บอ กามวน ลอง ตู หมึอม โอว. เฆ อี ยึต ป็อห บอ ต็อห แบน โหมว แบน โมยว ลอง โอว.
13อึณ ยี มูห โอว, โอว ซาคึร ดี แม เฌาพรา. แตห แม เฌา บอ โทม โฆรห โอว ดอ อึง แม ดี โทม. โกบ มึห แม เฌา น็อห ร็อก น็อห กาเว, โอว หมาณ, แตห แม เฌา บอ กาเว โอว. แตห แม เฌา โบง แคะ ปี หมาณ โอว, แตห แม คยอด โอว อาคาคัร.
14อึณ ปี โอว แฮะ โจห แคง โณะ แคง โหนง. แตห แม เฌา คยอด โอว, แกวะ แตห โอว เจต. เฆ อี ฌ็อง โอว แฮะ กืน. อึณ ปี โอว แฮะ โจห แคง อึม ลึก. แตห แม เฌา ดืด เลห โอว.
15แกวะ แตห อึม ปรัยะ ตัห ฌูห โอว. แกวะ แตห โอว ยัม แคง อึม ลึก. แกวะ แตห โอว โจห แคง กาเดา บาเรว.
16อึย แม เฌาพรา, โอว หมาณ, แตห แม เฌา โทม โฆรห โอว. โกบ มึห แม น็อห ร็อก กาเว, แตห แม เฌา เฆฌู โอว.
17แม เฌา, แกวะ เครียง ดี โอว. อึณ แฮะ ดูก กาเซา ดี น็อห โอว. โคว, โอว หมาน, แตห แม เฌา อึร โฆรห โอว ดอ ตี นี อู เฌณ.
18โอว หมาณ, แตห แม เฌา ตัห กอย รึม โดบ โอว, คยอด โอว, แกวะ แตห รันซู โอว โคย.
19แม เฌา บอ แฮะ นับ โตต แปะ แฮะ คัม โอว. อี แฮะ กาย็อง โอว, แฮะ โบง นา หมึอม ซาย กาเซา ดี โอว, แตห โอว ชึม ซาเร. แม เฌา แฮะ นับ โตต รันซู โอว บอกาเฆลียด.
20เฆ แฮะ แนนัะ โอว, แตห น็อห โอว กาปยาต ลึร. โอว อาว ฮู นับ ปี ดี ปาย. โอว บอ หน็อะ บัร ดี ยอด, แตห อึณ มึห อี กาเว โอว มืร, อาว มึห อาเซ. โอว บอ เหรต, แตห อึณ มึห อี เหลา น็อห โอว, แตห อึณ ดาคึย มืร, ยี ตู มึห คอ อู วี.
21ดอ กาปราณ โอว ปี ดี โฮม, เฆ บอ กาวัร อึม ซ็อง. ดอ ซี เดียง โอว อึม, เฆ บอ ดัว โอว เดียง อึม ปราง.
22เซ เฆ โฮม ตาง, แตห อึณ แป วัต เฆ. เซ เฆ โฮม ยัง ปี หลู เฆ, แตห อึณ แบน กาปู ดี เฆ, แตห อึณ ปี มาซีม อี เคร ยอต.
23แตห งาย เฆ อับ, แกวะ แตห เฆ ยึร มาเซ. แตห เฆ บอ โลว ฮาว กาโฆะ เซเซ.
24แตห แม เฌา บอ รู ดี เฆ, ดัม หมาบ ดี เฆ. โกบ รู กาเซา แม ดี เฆ, แตห แม คูงครัห ดี ปัน เฆ, แกวะ แตห เฆ ลอด.
25โดง กอย เฆ, แตห อึณ กอ ง็อง. แคง ทึบ แคง กาง เฆ, แกวะ แตห อึณ ซี มึห อาเซ.
26โคว, เฆ แฮะ คาหนาบ ดูอี แปะ แฮะ ดัม แม เฌา หมาบ. เฆ บอ กาลาง ลอง อี เฮา อี แฮะ คัม ดูก แปะ แฮะ ดัว แม เฌา แตห เฆ มึห เซา มึห ดีม.
27แตห แม เฌา โนว หมาบ แปะ แฮะ โบง เฆ ตี. แกวะ แตห เฆ ปึอน ฆูง เฆฌู ปี คยอด แม เฌา ดี เฆ.
28แกวะ แตห แม แดม จืร เฆ แคง บับ ฌาราง เฆ อี มึห อาซาก กามาย. แกวะ อูน จืร เฆ แคง ฌาราง เฆ ดูอี ปี อึบ แม.
29อี มูห โอว, โอว แฮะ ดูก แฮะ หณาบ กาเซา ดี น็อห โอว. โอว หมาณ, แตห แม เฌา คยอด โอว, แตห โอว กอย ซีคยา.
30โอว ดี ต็อห โหมว อี อืบ เฌาพรา. โอว ดี บอ มยูก อัน, กาลาง ฆูง เฆฌู ดี อัน.
31เซ โอว โบง ปาย ตี, อึณ บอ ล็อะ น็อห เฌาพรา หลึอม หลู โอว มัก อาโล็ง ตาง. อึณ บอ หมึอม หลึอม หลู โอว มัก ดีโซว.
32เฆ อี ดูก อี หณาบ ดี น็อห, เฆ ฮี ยึร ลอง อัน ตี, เฆ ดี บอ ดาคึย กาเซา. เฆ อี กรึบ ซีคยา เฌาพรา ดี บอ แบน โปลม แบน แฮณ ดี น็อห เฆ.
33เฌาพรา บอ โทม โฆรห ปี ซาคึร เฆ ดูอี ฆีน. อัน เฌา มืร ตู ปีว เฆ ดูอี อาโมยว อัน อี กอย แคง กาปึม.
34แตห บอ ฆางหราว บอ กาดาย อืบ เฌาพรา. บอ อึม นัมมูกซารา บอ โดว ซัดดาวา อี กอย แคง อึม ตี, แตห เฆ กาโพรม โตต ดี อืบ เฌาพรา.
35อัน เฌา ดี บอ คยอด มืง ฌีโอน, วี อึณปราย มืง อี กอย แคง อืง ยูดา. อัน เฌา ดี วี แตห ดูอี กอย แคง มืง ตี บอ แบน มืง เฆ.
36เฆ หลูกหลาน แดเจณ อัน เฌา, เฆ ดี ปึอน ดี บึง คาฆูน ตี. เฆ อี ร็อก อัน เฌา ดี บอ ปึอน ดี กอย แคง มืง เฆ ตี.
© 2021, Wycliffe Bible Translator, Inc. All rights reserved.