หม 63
63
ลอง ดีเกน เฌาพรา
อาดาวีด แฮะ แดม โหมว นี ดอ กอย อัน แคง แปร กาฮ็อห แคง อืง ยูดา.
1อึย แม เฌาพรา, แม มูห เฌาพรา ปี กรึบ โอว. โอว ดีเกน แม เฌา. น็อห พึอม โอว บอ กาปรา ดี กอย เครียะ แม เฌา. อึณ ปี โอว แฮะ กอย แคง โดง กาฮ็อห, ตู มึห ดี เดียง อึม, แตห โอว ดีหลัห. โคว, โอว แฮะ ดีเกน กาเซา แม เฌา.
2โอว แฮะ ยอด แม เฌา ดอ กอย โอว แคง ทึบ บอด. ดอ อัน ตี โอว มืร แฮะ ยึร อาพูง ดังโคว บอ ปวน แม เฌา.
3เซ แม เฌา ร็อก กาเว โอว, อึณ หมึอม หลึอม โอว มึห อาซาก. โคว, โอว วี อืบ มยูก แม เฌาพรา เซเซ.
4โกบ อึณ ปาย ตี, โอว ดี อืบ แม เฌา บอ โจว โอว. โอว ดี บอ กรึบ มี แม เฌา เซเซ.
5น็อห พึอม โอว แฮะ ดาคึย. อึณ ปี โอว แฮะ ปึอน ดี โฮม แพ แคง บลอย ตาง. โอว ดี บอ ต็อห โหมว ดาคึย บอ อืบ แม เฌา.
6ดอ กอย โอว แดง กาโช็ง อีด โอว, โอว ดี โหลห แม เฌา. ดอง คืน โอว บอ กาพา แม เฌา.
7แม เฌาพรา มูห โดง บึง โอว. โคว, โอว บอ ต็อห โหมว ดาคึย. ดอ กอย โอว โคบ แม อึณ ปี ฆอน มาซีม กอย ครึม เพียง มา อัน.
8น็อห พึอม โอว บอ กาดึก กาด็อะ ดี แม เฌาพรา. แม เฌา บอ จอย โอว.
9เฆ อี เหรต ดี ง็อห โอว, เฆ ดี ชึม. เฆ ดี โจห โลง โตต แคง มืง มารานัะ.
10เฆ ดี บอ ยัม ดี มาปัวะ ลาง, วี แบน ปี ดี โฮม มาโซว แปร.
11อึณ ยี มูห คูนดีคัม, โกบ โหลห อัน เฌาพรา, อัน ดี บอ โบยว ดาคึย. เฆ อี ดืง กาแซณ แตห เฌาพรา โทม, เฆ ดอน อี ดี บอ อืบ ปวน อัน เฌา. เฆ อี นับ ดี กาโลว ยี ตู ปึอน ต็อห มาเซ.
© 2021, Wycliffe Bible Translator, Inc. All rights reserved.