หม 5
5
ปี ซาคึร แตห เฌาพรา แร อาเพ อาเร
อาดาวีด แฮะ แดม โหมว นี. แตห ดา อี แยต เฆ อี ต็อห โหมว นับ, โลว บูด เวา.
1อึย แม เฌาพรา, โอว หมาณ, แตห แม เฌา โทม โฆรห ปี ซาคึร โอว, แตห แม เฌา ยึร บอ ปี หงูน โอว.
2แม มูห เฌาพรา ปี กรึบ โอว บอ ดา กาณา อี อึบ โอว. แตห แม เฌา โทม ปี หมาณ โอว นี, แตห แม เฌา จอย โอว.
3ซีณวัห เจว แม เฌา บอ ยึร โฆรห โอว. ซีณ ซีณวัห เจว โอว ซาคึร ดี แม เฌา บอ บัร แม เวียะ โฆรห โอว.
4แม เฌาพรา, แม ตู อึง อี ตู หมึอม. แม มืร ตู คัม นา จีจีว.
5แม เฌา บอ ฌ็อง เฆ อี โบง มืก ดอน อี. แม บอ กราน ดี ยอด เฆ ดูอี อี ปีคึก เฆ.
6อาเซ กาลาง โฆรห ตู หมาน, แม เฌา ดี แตห เฆ ชึม. แม เฌา บอ กาอีห เฆ อี ง็อห ยัม อาซาก อี บอ เฆ อี ซีมา กาโลว.
7โกบ แฮะ ร็อก กาเว กืน แม เฌา ดี โอว, โอว บอ ปึอน ดี ลึบ โดง กอย แม. โอว บอ ปึอน ดี กรึบ ซาคึร บอ โรวเซ แม แคง โฮว แม อี บอด กาเซา.
8แม เฌาพรา, โอว หมาณ, แตห โอว ปึอน ดี โบง นา หมาน ปี อึง แม. เฆ รันซู โอว แฮะ เหรต โอว. โคว, โอว หมาณ, แตห แม เฌา แยต โอว, แตห อึณ หงึย ดี โอว, แตห โอว ปึอน ดี โดบ ซีคยา แม.
9เฆ รันซู โอว บอ กาลาง โฆรห ตู หมาน. น็อห เฆ บอ ซี โบง แตห อึณ ลึร แบน โมยว แบน โมยว. โฆรห อี เลห แคง โมต เฆ แตห อึณ เซา ดี น็อห อี. อึณ บอ ปี อาย มาฮัณ.
10แม เฌาพรา, หมาณ แตห แม แตห เฆ วี คัม หมาบ ปี โบง เฆ, แตห เฆ วี ชึม โกบ ปี กาพา เฆ. แตห แม เฌา ซูต เตา เฆ โกบ แฮะ ซี กาแคณ เฆ ดี แม บอ โกบ แฮะ โบง เฆ หมาบ กืน.
11อึณ ยี มูห เฆ อี บึง ซีคยา แม เฌา, แตห แม แตห เฆ โบยว ดาคึย. แตห เฆ บอ ต็อห โหมว ดาคึย โกบ แฮะ แร แฮะ ฆ็อง แม เฌา ดี เฆ. เฆ อี ร็อก แม เฌา, เฆ ดี บอ แบน น็อห โบยว ดาคึย.
12แม เฌาพรา ดี ม็องการา ดัว ดี เฆ อี มึห น็อห ซืร น็อห หมาน. แม เฌา ดี บอ อึง เฆ บอ โบง นา หมึอม ดี เฆ, แตห อึณ ปี เฆ มึห มัง ฆ็อง อี แร เฆ.
© 2021, Wycliffe Bible Translator, Inc. All rights reserved.