หม 41
41
ปี ซาคึร ดูอี เซา
อาดาวีด แฮะ แดม โหมว นี. แตห ดา อี แยต เฆ อี ต็อห โหมว ตีห.
1เฆ อี ร็อก กาเว ดูอี ฆีน, เฆ ดี โบยว ดาคึย. เฌาพรา ดี จอย ดอ ฌัม เฆ ดูก.
2เฌาพรา ดี บอ ฆ็อง แร เฆ บอ บัร รีด อาซาก เฆ, แกวะ แตห อึณ ชึม. ดอ กอย เฆ แคง มืง นี, อี เฮา ดี บอ ต็อห, เฌาพรา แฮะ ม็องการา ดัว ดี เฆ. เฌาพรา มืร ตู อาบ เฆ ดี รันซู เฆ, ตู แตห รันซู เฆ ปึอน ดี โบง แคะ ปี อึง เฆ.
3เฆ บอ มึห เซา รอฆา, เฌาพรา ดี บอ จอย ยอด แมน เฆ, แตห เฆ ปึอน ดี อีด ซีคยา โดง อีด เฆ. อัน ดี บอ ยอด ลึมลา, แตห อึณ หราย โตต ดอน โมยว.
4อึณ ยี มูห โอว, โอว หมาณ ต็อห, “อึย แม เฌาพรา, โอว ปี บอ แฮะ กาลึบ ดี โบง หมาบ, โอว หมาณ, แตห แม เฌา กาเว โอว. โอว หมาณ, แตห อึณ หราย.”
5เฆ รันซู โอว บอ กาลาง นา ตู หมึอม ลอง โอว. เฆ ต็อห, “ปัน เหมา อัน ดี ยัม, ปัน เหมา ครึร อัน ดี หราย โตต?”
6ดอ ตัห จัร เฆ ดี โอว, เฆ ณึงราง ปี กาล็อะ ดี โอว. เฆ บอ เหรต ดี ยอด อี ตู หมึอม ลอง โอว. แฮะ ฮอต, เฆ บอ วี เลห ฮาว, วี กาลาง แตห ดอน อี นับ.
7แคะ กอย เฆ อี ฌ็อง โอว, เฆ บอ ปรา ดี ลาย พูพาบ, ลาย ซังคยาง ดี โบง นา ตู หมึอม ดี โอว.
8เฆ ต็อห, “อัน แฮะ ด็อะ เซา กาเซา. อัน ฮู นับ ดี ปึอน ดี วี ยีต โดง อีด อัน ดอ เหมา.”
9บอ ฆึก ปี หณึม โอว อี ดึอม โฮม โบม โดบ โอว, อัน แฮะ วี แบน รันซู โอว.
10อึย แม เฌาพรา, โอว หมาณ, แตห แม เฌา กาเว โอว, แตห โอว ปึอน ดี วี โบง เวียะ หมาบ แปะ แฮะ โบง เฆ ตี ดี โอว.
11โอว แฮะ นับ, แม เฌาพรา แฮะ อึง โอว. แม เฌา มืร ตู แตห เฆ รันซู โอว แป โอว.
12แม เฌาพรา แฮะ จอย โอว โกบ โบง โอว นา ซืร นา หมาน. แม เฌา บอ แตห โอว กอย ซีคยา, แตห โอว กอย โดบ แม เซเซ.
13แตห เอ อืบ เฌาพรา, อี มูห เฌาพรา ปี กรึบ เฆ ดูอี อีซาเรลัะ. แตห ดูอี ดอน ฌาด ดอน โจว อืบ เฌาพรา. แตห อึณ มูห, แตห อึณ หมาน ซาตู ซาตู.
บับ ฮาอา
© 2021, Wycliffe Bible Translator, Inc. All rights reserved.