หม 32
32
ลอง กาลาง หมาบ, แตห เฌาพรา บลัวะ แวน
อาดาวีด แฮะ แดม โหมว อี โดบ แมง มาซาคี.
1เซ เฌาพรา แฮะ ฆ็อห แวน หมาบ ดูอี วี เหมา, ดูอี ตี ดี มึห น็อห ดาคึย โกบ แฮะ ฮอต หราย หมาบ อัน ตี.
2เซ เฌาพรา ต็อห ลอง ดูอี อู วี, อัน ตู มึห หมาบ, เซ ดูอี ตี บอ มึห น็อห ซืร, น็อห ตู กาโลว, อัน ดี โบยว ดาคึย.
3ดอ ตู กาลาง โอว หมาบ แปะ แฮะ โบง โอว, โอว กลึร บอ ยาม ดอง วัน ดอง คืน. โอว แฮะ ดีหลัห อึณจัม บอ โดว.
4แม เฌาพรา แฮะ แตห โอว โหลห หมาบ โอว ดอง วัน ดอง คืน, แตห อึณ ดูก ดี น็อห โอว. โอว ดีหลัห ปี หลา เฮ ดีหลัห ดอ แฮะ ซอดาด กาเซา.
5วาย อัน ตี โอว บอ กาลาง หมาบ โอว ดี แม เฌาพรา. โอว มืร ตู เครียง หมาบ โอว. โอว ต็อห, “โอว กาลาง โตต หมาบ โอว ดี เฌาพรา.” แฮะ ฮอต, แม เฌาพรา แฮะ ฆ็อห แวน หมาบ แปะ แฮะ โบง โอว ตี.
6โคว, เฆ อี ร็อก แม เฌา, แตห เฆ ดอน อี ซาคึร, หมาณ ดี แม เฌา ดอ ฌัม เฆ ดูก. เซ อึณ บอ มึห ดูก อี ปี อึม ตาง อี ตัห อู เฌณ, อึณ ยี ตู ตัห ฌัม เฆ.
7โอว บอ บึง แม เฌา. แม เฌา ดี จอย แร อี ตู หมึอม ดี โอว. แม เฌา ดี คยอด โอว. โคว อัน ตี เฆ อี กอย โดบ โอว, เฆ ต็อห โหมว ลอง แม แฮะ คยอด โอว.
8เฌาพรา บอ ต็อห, โอว ดี แยต แม บอ มาโนว แม, แตห แม นับ อึณเตณ อี กาอาบ ฮาว. โอว ดี ยอด แม, แกวะ แตห แม กาลึบ.
9แกวะ แตห แม ดืร ปี มังปร็อง เฆ มาโลว, อี ตู มึห อางยาน. เซ ดา กาณา อัน ตู ฮับ ก็อะ เฆ วัน ตึณ อัน, อัน มืร ตู ฮาว โดบ ดา กาณา อัน.
10เฆ อี ตู หมึอม, เฆ ดี ฌัม ดูก แบน โมยว แบน โมยว. เซ อี ยี บึง ซีคยา เฌาพรา, เฌาพรา ดี ร็อก กาเว เฆ เซเซ.
11อึย เบ ดูอี อี มึห น็อห ซืร, แตห เบ โบยว ดาคึย, อืบ เฌาพรา. เบ อี มึห น็อห หมึอม, แตห เบ ต็อห โหมว ดาคึย โกบ แปะ แฮะ โบง เฌาพรา ดี เบ.
© 2021, Wycliffe Bible Translator, Inc. All rights reserved.