หม 30
30
ลอง ดาง ฆูง เฆฌู ดี เฌาพรา
อาดาวีด แฮะ แดม โหมว นี. เฆ ต็อห โหมว นี ดอ โบง เฆ บลอย ม็องการา โฮว เฌาพรา.
1อึย แม เฌาพรา, โอว ดี อืบ แม เฌา. แม เฌา แฮะ คยอด โอว. แม เฌา ตู แตห เฆ รันซู โอว ปึอน ดี โคย โกบ โอว.
2แม เฌาพรา, แม บอ มูห เฌาพรา ปี กรึบ โอว. ดอ หมาณ โอว แตห แม เฌา จอย โอว, แม มืร แฮะ แตห โอว แกน.
3แม เฌาพรา ตู แตห โอว ยัม. แม เฌา บอ แตห โอว ฆยามซา, ตู แตห โอว กอย แคง บาเรว.
4อึย เบ ดูอี อี ร็อก เฌาพรา, แตห เบ ต็อห โหมว อี อืบ เฌาพรา. แตห เบ ดาง ฆูง เฆฌู ดี อัน เฌา อี บอด กาเซา.
5โคว, เฌาพรา ดี บอ รู จาว อู กาจัน. อัน ยี ดี ดัว เฆฌู ดี เอ บอ โจว อาซาก เอ. เอ ปี บอ ยาม แคง หมึร, ฮี ฌัม ซีณวัห, แฮะ วี ดาคึย.
6ดอ กอย ดาคึย โอว, โอว บอ ต็อห, “โอว อาว ฮู นับ ดี ชึม ดอ เหมา.”
7อึย แม เฌาพรา, อึณ มูห เฆฌู ปี ดัว แม ดี โอว, แตห โอว กอย มัน ซีคยา. ปัน ตี แม เฌา ยี ตู วี ยอด โอว, แตห อึณ บอ หณาบ กาฟัร กาเฟียน แคง น็อห โอว.
8โอว บอ ซาคึร ดี แม เฌาพรา. โอว บอ หมาณ ต็อห,
9“เซ โอว ฮี ยัม, อึณ ตู แบน อาฆยึร ดี แม เฌา. กาปูห ตู นับ ดี อืบ แม เฌา, ตู นับ ดี กาลาง ลอง นา มูห นา หมาน ปี โบง แม เฌา.
10อึย แม เฌาพรา, โอว หมาณ, แตห แม เฌา กาเว บอ โทม โฆรห โอว, แตห แม เฌา จอย โอว.”
11ปัน ตี อี ดูก อี หณาบ ดี น็อห โอว, แม เฌาพรา แฮะ วี โบง แตห อึณ วี แบน น็อห โคย, น็อห กรึอม. อึณ บอ ปี แม เฌา แฮะ บูต แวน ครึง จาน ปี ชึบ โอว, วี แตห นา โบยว ดาคึย กอ โรบ โอว.
12โคว อัน ตี โอว มืร ตู กอย ดีโลย ดีลาย, โอว ดี ต็อห โหมว อี อืบ อาพูง ดังโคว แม. อึย แม เฌาพรา, แม มูห เฌาพรา ปี กรึบ โอว. โอว ดี ดาง ฆูง เฆฌู ดี แม เซเซ.
© 2021, Wycliffe Bible Translator, Inc. All rights reserved.