หม 26
26
ปี ซาคึร ดูอี อี มึห น็อห ซืร
อาดาวีด แฮะ แดม โหมว นี.
1อึย แม เฌาพรา, เซเซ โอว แฮะ โบง, แกวะ แตห อึณ มึห มาเซ ปี ปึอน กาลาง อี เฮา ลอง โอว. โคว, โอว หมาณ, แตห แม แตห อี เฮา นับ ลอง อัน ตี. โอว แฮะ บึง แม เฌาพรา เซเซ, ตู แตห น็อห โอว บยอง.
2แตห แม เฌาพรา เทว ดี ยอด น็อห โอว, แตห อึณ ลึห ปี ปาย น็อห โอว, แตห แม นับ ปี ปาย อากยาม อางยาน โอว.
3โคว, โอว บอ โหลห เซเซ แคะ ร็อก แม เฌา ดี โอว. โอว บอ โบง นา หมึอม นา หมาน ปี อึง แม เฌาพรา เซเซ.
4โอว มืร ตู กอย รึม โดบ เฆ อี ซีมา กาโลว. โอว มืร ตู โดบ พึง เฆ อี นับ ดี ณึงราง บอด.
5โอว บอ ฌ็อง เฆ อี โบง นา ตู หมึอม. โอว มืร ตู กอย รึม โดบ เฆ ดูอี มืก, ดูอี ฮาย.
6แม เฌาพรา, โอว แฮะ บาย แด โอว, แตห อี นับ, น็อห โอว แฮะ ลูย. โคว, โอว บอ ปึอน ดี ฮาว ดี กาโช็ง หลู แม.
7โอว บอ ต็อห โหมว อี อืบ ฆูง เฆฌู แม เฌา. โอว ดี กาลาง บอ อี หมึอม อาม แปะ แฮะ โบง แม เฌา ดอน โมยว.
8โอว บอ ร็อก โฮว อี มูห โดง กอย แม เฌา. โอว บอ อึง ดี กอย โดง ลึห อาพูง ดังโคว แม เฌาพรา.
9โอว หมาณ, แกวะ แตห แม แวน โอว โดบ เฆ อี มึห หมาบ. แกวะ แตห อาซาก โอว ชึม ปี เฆ อี แฮะ ง็อห ยัม ดูอี.
10ดูอี ฌึร ตี, เฆ บอ นับ ดี โบง มี อี ตู หมึอม. เฆ บอ นับ ดี หมาณ รึอน ดี อี เซเซ.
11อี มูห โอว, โอว โบง แกวะ แตห อึณ มึห มาเซ ปี ปึอน กาลาง อี เฮา ลอง โอว. โอว หมาณ, แตห แม เฌา คยอด โอว บอ กาเว โอว.
12อึณ บอ ปี โอว แฮะ ปึอน ดี ฮาว โดง ฆลัง ซีคยา. โอว ดี วี อืบ แม เฌาพรา กาแต เฆ ดูอี กืน.
© 2021, Wycliffe Bible Translator, Inc. All rights reserved.