อง 8
8
ลอง อืบ มยูก อางยาน
1แตห เบ โทม, อึณ ปี อางยาน แฮะ ดัด ตาง. อางยาน ตี บอ ปี อีบึณ อี นับ โตต ดอน โมยว, อี กาลาง โฆรห.
2อัน กอย ดี มึอบ อึณเตณ แตห อี ปึอน ดี ยึร อัน. อัน กอย บอ ดี กาย็อห อึณเตณ,
3บอ ดี บาง มาโลห มืง, โดง ดี ลึบ ดูอี แคง มืง.
4อัน ดัด ตาง ต็อห, “อึย เบ ดูอี แดง กาดาย ดอน อี, โอว ดี แค ดี กาลาง ดี เบ.
5เบ ดูอี อี ซี หนึม, แตห เบ นับ ดี กาย็อห อี หมึอม อี ตู หมึอม. แตห เบ นับ ดี กาพา.
6แตห เบ โทม โฆรห โอว อี มูห อี หมึอม. แคะ กอย โฆรห ปี กาลาง โอว, อึณ บอ มูห โตต โฆรห ซืร, โฆรห หมาน.
7โฆรห ปี กาลาง โอว, อึณ บอ มูห โฆรห อี มูห อี หมาน. โฆรห กาโลว, โอว บอ กาอีห กาเซา.
8โฆรห ปี กาลาง โอว นี, อึณ บอ หมาน อาคาคัร. อาว มูห โฆรห โฆะ แฆะ, อาว มูห โฆรห กาลึบ.
9เฆ อี มึห อางยาน, เฆ นับ, โฆรห โอว แฮะ หมาน. อึณ บอ ลึห ซีคยา ดี เฆ อี นับ แบน โมยว แบน โมยว.
10แตห เบ ดึห ปี มาโนว โอว นี, อาต ดึห เบ รึอน. แตห เบ ดึห อางยาน โอว นี, อาต ดึห เบ ครีว.
11โคว, อางยาน แฮะ บอด หลึอม แซณ เรณ อี ง็อห ตาง. แคะ ปี ซี ปึอน แม ดอน โมยว, อาว มึห อี ปึอน กาเฆา ดี อางยาน.
12โอว อี มูห อางยาน, โอว บอ กอย รึม โดบ เฆ อี นับ ดี กาพา. โอว บอ นับ แบน โมยว แบน โมยว บอ นับ ดี กาย็อห อี หมึอม อี ตู หมึอม.
13อาเซ โรวเซ เฌาพรา, อัน ดี บอ ฌ็อง นา ตู หมึอม. โอว มืร ฌ็อง อี ปีคึก, ฌ็อง บอ เฆ อี นับ ดี แนนัะ ตู โรวเซ อี เฮา, บอ เฆ อี กาลาง โฆรห ตู มูห ตู หมาน.
14โอว บอ มึห อากยาม อางยาน, บอ จอย แตห อี โบง นา หมึอม. โอว บอ นับ ปี ปาย แบน โมยว แบน โมยว บอ มึห ปวน.
15โอว แฮะ จอย เฆ คูนดีคัม, แตห เฆ นับ ดี อึบ มืง เฆ. โอว แฮะ จอย เฆ ดา กาณา อึบ มืง, แตห เฆ นับ ดี เบลห อูน ดารา อี โดบ นา มูห นา หมาน.
16โกบ แฮะ จอย โอว ดี เฆ, เฆ ดา กาณา แฮะ ปึอน ดี อึบ มืง. บอ เฆ ดา ตาง นับ ดี ซูงพยาด อามู อี.
17โอว มืร ร็อก เฆ อี ร็อก โอว. เฆ อี โฆยวฆยา ดี เหรต โอว, เฆ ดี กาตูณ โอว.
18อึณ ยี มูห โอว, อี มึห โกรวกราม บอ ซาเร. บอ อี โบยว อี ครัม, อี ตู นับ ดี หราย มืร, โอว ดี ดัว.
19แคะ ปี ปึอน แม ดี โอว, อึณ หมึอม หลึอม ครีว แฌด. อาฆยึร อัน แฮะ หมึอม หลึอม รึอน.
20โอว ฮาว โดบ อึณเตณ ซืร, บอ ฮาว โดบ ดารา หมาน.
21โอว แตห โกรวกราม ดี เฆ อี ร็อก โอว, แตห เฆ มึห ดี อูน คาฆูน กืน.
22อาต โบง เฌาพรา ดอน โมยว, อัน แฮะ พาน เบลห โอว. อู ซีณ ดอ โฆว อัน, อัน เฌา แฮะ โบง ปาย ตี.
23อาต มึห อาโมยว เฮา โอว แฮะ กอย เซเซ. ซีณ อาต มึห กาดาย เฆ เบลณ, โอว แฮะ มึห.
24โอว แฮะ ฮอต ฆึอด อาต มึห นัมมูกซารา. อาต โตห อึม แดง กาดาย นี, โอว แฮะ กอย.
25โอว แฮะ ฆึอด ซีณ อาต มึห นอน อี กูก ยีต ดอน โปละ,
26อาต พาน เบลห เฌาพรา กาดาย บอ โดง ฆลัง ดอน โปละ, อาต มึห กาปูห แดง กาดาย, โอว แฮะ กอย.
27โอว แฮะ กอย ดอ โบง เฌาพรา ฆางหราว, ดอ ซีห อัน โดง ซืด เบลณ อี กอย แดง อึม นัมมูกซารา,
28ดอ แตห เฌาพรา อึณอูะ กอย แคง เบลณ, ดอ โบง อัน แตห อึม โตห แคง กาเดา โดง ลึก.
29โอว มืร แฮะ กอย ดอ กาลาง เฌาพรา ดี อึม นัมมูกซารา ต็อห, ‘แม ตู ปึอน อึณปูน โคบ ปี กาลาง อูน โอว ดี แม นี.’ ซีณ เบลห อัน เฌา ดัง กาดาย นี, โอว แฮะ กอย.
30ดอ อัน ตี โอว แฮะ กอย โคบ อัน เฌา ปี ดา ซารา อี นับ ดี โบง ดอน โมยว. ปาย ตี, อัน เฌา บอ ดาคึย ดอน ซีแง. โอว มืร โคย เซเซ โดบ อัน เฌา.
31โอว แฮะ ดาคึย โกบ มึห กาดาย นี. โอว บอ โบยว บอ โคย โกบ กอย เฆ ดูอี ดอน โมยว.
32ดอ ตี นี, แตห เบ ฆอน กาโณม โอว โทม โฆรห โอว, โบง โดบ แคะ ปี กาลาง โอว ดี เบ. เซ เบ โบง ปาย ตี, เบ ดี โบยว ดาคึย.
33แตห เบ โทม แปะ แฮะ ฮอต เบ เฮน ตี. แตห เบ มึห อางยาน. เบ แกวะ เบลห, แกวะ แวน อัน.
34อาเซ โทม โฆรห โอว, บอ กอย บาง มาโลห กาง โอว ดอน ซีแง, บอ หน็อะ ดี โทม บาง มาโลห โอว, อัน ดี โบยว ดาคึย.
35อาเซ กาตูณ โอว, อัน ดี ปึอน อาซาก กามาย. อัน ดี บอ ปึอน ปี เฆฌู เฌาพรา ดี อัน.
36อาเซ ยี กาฆ็อห ดี โอว, อัน โลว คัม ปี โบง อัน. เฆ ดอน อี อี ฌ็อง โอว, เฆ ร็อก มืง มารานัะ.”
© 2021, Wycliffe Bible Translator, Inc. All rights reserved.