อง 6
6
โฆรห อี ดัม ซาดีก ดี ดูอี ตู หล็อก
1อึย ฆอน กาโณม โอว, เซ แม แฮะ ต็อห ดี เวียะ นี ดาง อี เฮา, เซ แม แฮะ โพรม ดี โบง ดาง อัน,
2เซ โฆรห ปี ดึอม กาลาง แม แฮะ วี แบน ยอต อี วี เหมต แม,
3เซ อี เฮา ดี วี อึบ แม โกบ โบง แม ปาย ตี, แตห แม โบง ปี ต็อห โอว ดี แม, แตห แม ลอด. แม โลว ปี เตียม น็อห แม, ฮาว โดง กอย ดูอี ตี, วี ดองบาน อัน, แตห อัน ควาง ดี แม.
4แกวะ แตห แม ดีเหลา, แกวะ แตห แม อีด.
5แตห แม โฆยวฆยา แตห แม ลอด แคง ยอต ตี. แตห อึณ ปี มาฌัะ แฮะ ลอด ดี ดูอี แล แปร, แตห อึณ บอ ปี มาซีม แฮะ ลอด ดี คืม.
6อึย แม ดูอี กราน, แตห แม ฮาว ยอด มาปรูณ. แตห แม เฮน ปี โบง ปี รัณ มาปรูณ ตี, แตห แม ปึอน อางยาน.
7เฆ ตู มึห ซารา, ตู มึห ดา ตาง, ตู มึห คูน เรา.
8เฆ ยี นับ ดี โตว ตัห ปี ดี โฮม เฆ ดอ อาคราว โซะ. เฆ บอ นับ ดี โตว กาฌูะ อูน ปี ดี โฮม, ปี ดี ตา เฆ ดอ อาคราว มัห.
9อึย แม ดูอี กราน, แม ดี อีด เหลณ แคะ เหมา? ปัน เหมา แม ดี ยีต?
10เซ แม ต็อห, “โอว ดี อีด ปอ อู กาจัน. โอว ดี อีด ดีเหลา ปอ อี แจก,”
11อาคราว ดอ อีด แม ตี, พลาน เฆ เอต ดี ตัห ปยาต แม ปี ดา โฌน. ฆีน ดี บอ ตัห ดี แม ปี ดา อี โฆ็ง ครึง กาโฆห แฮะ ตัห.
12ดูอี ฮาย อี ตู มึห ดีโคว, อัน บอ นับ ดี วีน ดีแล กาลาง โฆรห โฆะ แฆะ,
13บอ นับ ดี กายับ งาย, บอ นับ ดี แหน ตา เปลา อัน, ซีกู ตา กานู อัน.
14อัน คราม ดี โบง มี นา ตู หมึอม, โบง แตห อี กาลูต เซเซ.
15โคว อัน ตี อัน ดี บอ กาดูห อาเพ อาเร อู เฌณ. อึณ ปี อัน ดี กาบัก ลึร, แกวะ แตห อึณ ซี ปึอน ซีนัม. อัน ดี บอ โลว คัม ปาย ตี.
16ปี ฌ็อง เฌาพรา, อึณ มึห เดา โมยว. ปี กราน อัน ดี ยึร, อึณ มึห บู โมยว.
17เฆ อี มึห น็อห ปีคึก, เฆ อี ซีมา กาโลว, อี ง็อห ยัม ดูอี ตู มึห หมาบ,
18เฆ อี คราม ดี โบง มี นา จีจีว, เฆ อี ออน ดี โบง หมาบ,
19เฆ อี แบน ซักเซ, กาลาง นา ตู หมาน บอ เฆ อี นับ ดี โบง แตห อู วอแว ลาย ฌ็อง, เฌาพรา ฌ็อง ฌึร ตี โตต ดอน โมยว.
โฆรห อี ดัม ซาดีก ลอง ลูต เรา
20อึย ฆอน กาโณม โอว, แตห แม โบง โดบ ปี กาลาง ฆูณ แม, แกวะ แตห แม ปีว ปี มาโนว มา แม.
21แตห แม ดึห โฆรห ตี อูน แคง น็อห แม, แตห แม โนว เซเซ, แตห อึณ ปี มากาแวะ อี ฮอย ดี แมง แม.
22โฆรห ฌึร ตี, อึณ ดี แยต ดี ตึย แม ดอ ฮาว แม โดบ อึณเตณ. ดอ อีด แม แคง หมึร, อึณ ดี บอ แร บอ ฆ็อง แม. ดอ อึณซึห แม, อึณ ดี แตห แม เฌณฌา ลอง อัน ตี.
23ดารา ตี, อึณ บอ ปี บลาง. บอ ปี มาโนว ฆูณ มา แม แฮะ ปี เงา ออม ตาง. ปี ดัม ดารา ตี, อึณ บอ มาโนว แตห แม นับ ปี ดี ปาย ดี โบง.
24อึณ ดี บอ จอย บอ แคร แม ดี อีบึณ ฮาย, อี นับ ดี เกา ว็อกแวณ แม, บอ อีบึณ อี เฮา อี แดะ แม.
25แกวะ แตห น็อห แม ดึก โกบ ชีด อัน. แกวะ แตห แม ฮ็อะ โกบ กาแหล งาย อัน.
26โคว, ง็อห ยา มาลัม ตี ดาน คามูน อู โบ็ง. อาเซ ยี ลูต อีบึณ อี, อัน บอ นับ ดี ชึม อาซาก อัน.
27อีมาย อี โบง ปาย ตี, อึณ ปี อัน โฆรบ เงา เบลห แดง บาง น็อห อัน. อาว ปึอน โบง, แกวะ แตห ครึง อัน กาซึม.
28อึณ บอ ปี อัน แณต ฮาว แดง อึณกึร เงา. อาว ปึอน โบง, แกวะ แตห เปลา อัน บลูห.
29เซ ดูอี อู วี ลูต อีบึณ อี, อึณ บอ ปาย ตี. ดูอี อี โบง ปาย ตี, อัน ตู ลอด คัม หมาบ อัน.
30เซ อึณ มึห ดูอี อู วี อี แฮะ กาปราณ โบม, เซ อัน บอ ปรา ปี ดี โฮม โกบ เอต อัน, ดอน อี นับ ดี กาเว อัน.
31มาแล, เซ อี ฮี ยึร ดอ ปรา อัน, อัน ดี โลว เซ โลว เยา วีว ดี อี บู บูน. แคะ กอย โกรวกราม แคง กาง อัน, อัน ดี กาดูห ดี ดัว โตต ดี อี.
32ดูอี อี ลูต อีบึณ อี เฮา, อัน ตู มึห อางยาน. อัน โบง แตห อาซาก อัน ชึม.
33อัน ดี กาดูห ดี คัม อี มัห อัน บอ ชึม ซาเร. อัน ดี บอ โลว ซาย อี เซเซ.
34อีมาย บรีม อีบึณ ตี, อัน ดี บอ นับ ดี รู กาเซา, ตู คัม อี เฮา ลาย อีบึณ อัน. โคว, ดอ วี โบง เวียะ อัน นา ตู หมึอม ดี อีมาย ปอ อู วี, อัน ตู มึห น็อห กาเว.
35อัน มืร ตู ดึห ปี ซี ดัว อีมาย ปอ อู วี ตึอน, อึณ ปี บอ กืน แคะ เหมา, อึณ ตู เบระ ดี น็อห อัน.
© 2021, Wycliffe Bible Translator, Inc. All rights reserved.