อง 4
4
1อึย เบ ฆอน กาโณม, โทม ปี มาโนว ฆูณ เบ. แตห เบ โทม ซีคยา, แตห อึณ แตห เบ มึห อางยาน.
2ปี มาโนว โอว แฮะ บอด แฮะ หมึอม. แกวะ แวน โฆรห ตี.
3ดอ ซี มูห โอว ฆอน, ดอ ซี กอย รึม โอว โดบ ฆูณ โอว, ดอ ซี ดีแตด โอว, ดอ มึห ฆูณ มา โอว โอว อู วี,
4ฆูณ แฮะ มาโนว โอว ต็อห, “แตห แม ซาดีก โฆรห ปี มาโนว นี, ฮับ อูน แคง น็อห แม. อึณ ดี แตห แม อีม, ตู แตห แม ยัม.
5แตห แม มึห อางยาน, นับ ปี ปาย แบน โมยว แบน โมยว. แกวะ แตห แม ปีว, แกวะ บลืง โฆรห ปี กาลาง โอว นี.
6แกวะ เบลห แกวะ แวน อางยาน ตี. อัน ดี ฆ็อง ดี แร แม. แตห แม ร็อก อางยาน, อัน ดี บัร รีด อาซาก แม.
7อางยาน แฮะ หมึอม หลึอม โตต โมยว เฮา. โคว, แม โลว ดึห อูน อางยาน. แคะ ตาง ง็อห อัน, อาว โลว โยว. แม ปี บอ โลว ดัว โตต แคะ มึห แม, แตห แม ดัว, แตห แม ปึอน.
8เซ แม นับ อางยาน ตี แฮะ ปี โกรว อี ง็อห ตาง กาเซา. อึณ ดี วี แตห อี เฮา โรวเซ แม. เซ แม บอ โบยว ดี โดบ เซเซ, อึณ ดี แตห แม มึห ซาเร.
9อาเซ แฮะ มึห อางยาน ตี, อึณ ปี, อัน แฮะ บร็อะ กาแมะ กามาย บอ ชึบ มังฆึม อี ชีด กาเซา.”
10อึย ฆอน กาโณม โอว, แตห แม โทม โฆรห โอว. เซ แม โบง ปาย ตี, อาซาก แม ดี โต็ง.
11โอว แฮะ มาโนว แม, เหมา ดี ปาย ดี โบง, แตห อึณ โดบ อางยาน. โอว แฮะ บยัะ ดี แม, แตห แม โดบ นา มูห นา หมาน.
12เซ แม บอ ฮาว นา เหมา, แม มืร ตู กาดูห ดูก. เซ แม บอ กาแบลบ, แม มืร ตู กาฟัห, ตู เกห.
13แกวะ ปีว ปี มาโนว โอว นี. แกวะ แวน อัน. แตห แม โหลห ซีคยา. โคว, อึณ แตห อาซาก ดี แม.
14แกวะ ฮาว โดบ เฆ อี ตู หมึอม. แกวะ โดบ เฆ ดูอี ฮาย ดูอี มืก.
15แตห แม วัห อึณเตณ ตี, แกวะ ฮาว โดบ เฆ. แม ฮี ฮอต วัห, แม ยี ฮาว โดบ อึณเตณ แม.
16เฆ ดูอี มืก, เซ เฆ ตู ปึอน ดี โบง มืก, เฆ ตู ปึอน กอย หนีม. เซ เฆ ตู ปึอน ดี โบง แตห อี ชึม เฆ ตู ปึอน ดี อีด.
17เฆ โบง นา มืก นา ฮาย ปี เฆ โฮม โบม. เฆ บอ ลาย กามัห กาโฆห ปี เฆ เดียง อึม.
18ปี โบง เฆ อี น็อห ซืร น็อห หมาน, อึณ ปี กาตาน บลาง ซีแง อี แกร ดี บลาง ตาง กอ ฌัม เลห ซีแง.
19ปี โบง เฆ ดูอี มืก ยี อับ ว็อง กาเซา. เฆ ตู นับ อี ดี แตห เฆ เกห.
20อึย ฆอน กาโณม โอว, แตห แม โทม ซีคยา โฆรห ปี กาลาง โอว.
21แตห แม โหลห เซเซ, แกวะ แตห แม ปีว.
22โคว, โฆรห ตี แตห อาซาก ดี เฆ อี แฮะ ยึร อัน. อึณ บอ แตห บอ โดว บอ น็อห ดาคึย.
23แตห แม บัร ซีคยา น็อห แม, แตห อึณ หลึอม แม บัร โมยว เฮา ดอน โมยว. โคว, ปี โบง แม ดอน โมยว, อึณ เลห แคง น็อห แม ตี.
24แกวะ กาลาง โฆรห โฆะ แฆะ บอ โฆรห กาโลว ดอ เหมา.
25แตห แม ยอด ซืร นา อาต แม, แกวะ ปีหลีน งาย แม. แตห แม ยอด ฮาว ซืร ซืร.
26แม โลว ซาดีก ซีคยา อึณเตณ โดง ดี ฮาว แม, แตห แม ปึอน ดี ฮาว ดาคึย.
27แม แกวะ วัห นา ฆัะ นา อัห. แตห แม ยี วัห อี ตู หมึอม.
© 2021, Wycliffe Bible Translator, Inc. All rights reserved.