อง 22
22
1เซ แม มึห ซาเร, อึณ หมึอม หลึอม มึห แม โกรวกราม กืน. เซ ดูอี โรวเซ แม, อึณ หมึอม หลึอม รึอน เฆ ครีว.
2ดูอี ครัม บอ ดูอี ฆีน, เฆ มูห อู โมยว. เฌาพรา แฮะ พาน เบลห เฆ บอกาเฆลียด.
3ดูอี อี มึห อางยาน, อัน นับ ปัน ดี มึห อาเพ อาเร. อัน บอ นับ ดี วัห. อี มูห ดูอี รึร, อัน ยี ตู กาพา บอ ฮาว แตห อัน กอ ฌัม แคง ดูก.
4เซ แม โรวเซ เฌาพรา บอ มึห น็อห โฆม, อึณ แตห แม มึห ซาเร, มึห บอ โกรวกราม. อาซาก แม มืร ดี บอ โต็ง.
5ดูอี ฮาย ดี กาดูห ดูก ปี อี ลึบ แคง ยอต แคง มาอาต. เซ ดูอี ยี ร็อก อาซาก อัน, อัน นับ ดี วัห, ตู ฮาว กาตัด โดง ตี.
6เซ แม มาโนว ฆอน ปี กาอาบ อัน โบง, อัน ดี บอ โหลห บอ โดบ บอ โจว อาซาก อัน.
7ดูอี ฆีน ดี โลว แบน หมาย ดูอี ครัม. เซ แม การ็อห ดี อี, แม ดี โลว แบน หมาย ดูอี อี ดัว ดี แม.
8เซ แม โบง ตู กาซืร, อึณ ปี แม บรัด โหงว. แม ดี ดูก ปัน ดี โซะ แม. บอ แปะ แฮะ หมาณ คาหนาบ แม ดี อี เฮา, อึณ ตู แบน อาฆยึร มาเซ, อึณ ดี บอ โตต ดอน โมยว.
9อาเซ มึห น็อห ดีฮาง, อัน ดี บอ โบยว ดาคึย โกบ ดึห อัน ปี ดี โฮม, กาซาง เฮียง เฆ ดูอี ฆีน.
10แตห แม ณอน เตา เฆ ดูอี อี กาณัห บอ พยาก อี เฮา. เซ แม โบง ปาย ตี, ดูอี อี ลาย กาลูต, ลาย กาแทณ, ลาย กาเอห, อาว ฮู มึห. อึณ ดี เยน ดาคึย.
11เซ แม อึง, แม โวว น็อห ลูย ซีงา บอ กาลาง โฆรห อึณจูะ อึณจัม, แม ดี บอ ปึอน ดี แบน ฆึก คูนดีคัม.
12เฌาพรา ดี ยอด แมน แบน โมยว แบน โมยว อี กาหลูห ดี น็อห อี. ปี กาลาง เฆ ดูอี อี โบง นา ตู หมาน, เฌาพรา ยี ตู แตห อึณ ออง.
13ดูอี กราน ดี บอ ต็อห, “มาครังซี กอย นา เรต กาง.” อัน นับ บอ ดี ต็อห, “เซ โอว ฮี เลห ฮาว, อี เฮา ดี ง็อห ยัม โอว.”
14โฆรห ปี กาลาง ยา มาลัม, อึณ ปี กาเดา ฮูเลา, ปี บอ ยอต. เฆ ดูอี ปี กาอีห เฌาพรา, เฆ ดี โจห นา แคง.
15รึร บอ อี ตู หมึอม กอย แคง น็อห ฆอน ดอน อี. อึณเพียะ ยี มาโนว แตห รึร อัน เลห.
16เซ แม ดัว ลักซอง ดี ดูอี ครัม, บอ คาหนาบ ดูอี ฆีน, แตห อึณ แตห แม ครัม, บอ แม ดี วี แบน ดูอี ฆีน ดูอี พลาน.
ลอง โฆรห อางยาน โอย ฆึร แด
17โอว ดี กาลาง แตห แม โทม โฆรห ปี กาลาง เฆ ดูอี อี มึห อางยาน. แตห แม โทม ซีคยา บอ โบง โดบ อากยาม อางยาน ปี มาโนว โอว.
18เซ แม โหลห, ตู ปีว โฆรห ฌึร ตี, อึณ ดี แตห แม กอย ดาคึย บอ แตห แม นับ ดี กาลาง ลอง อัน เซเซ.
19โอว ซี แตห แม หณึม บึง เฌาพรา. โคว, โอว มาโนว โฆรห นี อาตึร นี, แตห บอ แม ปึอน ดี โทม.
20โอว แฮะ แดม โฆรห โอย ฆึร แด ดัว ดี แม, อึณ บอ มูห ลอง ดัว ซาดีก, บอ อากยาม อางยาน อี แตห แม นับ แบน โมยว แบน โมยว.
21แตห แม นับ อา เหมา อี มูห, อา เหมา อี หมาน. แตห แม วี นับ บอ ดี กาลาง ดี เฆ อี จัร แม ตัห.
22แม แกวะ วีน ดี คาหนาบ ดูอี ฆีน โกบ ฆีน อัน. เซ ดูอี แฮะ ฌัม ดูก, แกวะ โบง แตห อัน ชึม ดอ ซูงพยาด เบ อามู อัน.
23โคว, เฌาพรา ดี วี โพรม บลาก เฆ. อาเซ โบง แตห อี เฮา ชึม, เฌาพรา ดี วี แตห บอ ดูอี วี ตี ชึม.
24แม แกวะ ลาย กาฆึก ดี ดูอี กาฮ็อห. แม แกวะ กาโดบ ดี ดูอี อี มึห น็อห ฮาย อี หงึย รู.
25โยว แม เฮน อาฆยาง เฆ, โยว อึณ ปี แม ลึบ แคง ยอต, ตู วี ปึอน ดี เลห.
26แม แกวะ กาแซณ ดี เวียะ นี ดาง อี เฮา. แม แกวะ กีคัม ดาง อี เฮา.
27เซ แม ฮี ตู มึห ดี ดัว, เฆ ดี บอ ดึห บอ ดีหน็อง โดง อีด แม.
28แกวะ แตห แม รึต กาโทะ หล็อก กาอูน กาดาย อี มูห ปี ซัม อูน ดา ดา แม.
29เซ แม ยึร ดูอี อี กยัะ, อี แหลว ดี โบง ฆาน อัน, แม นับ ดูอี ตี ดี โบง ฆาน ปี จัร คูนดีคัม. อัน ตู โบง ฆาน เฆ ดูอี เรา ดูอี กาง.
© 2021, Wycliffe Bible Translator, Inc. All rights reserved.