อง 16
16
1ดูอี นับ ดี กาดัวะ กาพา แคง น็อห อัน. ปี ดี เวียะ ปี ดี กาลาง อัน ดี อี, อึณ ยี มูห เฌาพรา อี ดัว.
2ดูอี ทาง แปะ แฮะ โบง อัน แฮะ มูห แฮะ หมาน. มาแล, เฌาพรา ดี ยอด ปี ปาย น็อห อัน.
3ฆาน ปี โบง แม ดอน โมยว, แตห แม แตห เฌาพรา อึบ. เซ แม โบง ปาย ตี, ปี คราม แม ดี โบง, อึณ ดี ออง.
4แคะ ปี โบง เฌาพรา ดอน โมยว, อึณ แฮะ มึห ดีโคว. อัน ยี โบง แตห เฆ ดูอี ฮาย ชึม.
5เฌาพรา ฌ็อง เฆ อี ปีคึก ดอน อี. เบ มืร โลว นับ ซีคยา, อัน ตู แตห เฆ ลอด ดอ ดัม อัน หมาบ ดี เฆ.
6น็อห ร็อก น็อห หมาน แตห เฌาพรา ฆ็อห แวน หมาบ. เซ ดูอี โรวเซ เฌาพรา, อาเพ อี ตู หมึอม มืร ตู ฌัม ดี อัน.
7เซ ปี โบง แม ล็อะ น็อห เฌาพรา, อัน เฌา ดี โบง แตห รันซู แม วี แบน ฆึก แม.
8เซ แม โบง นา ซืร นา หมาน, ยี ปึอน โกรวกราม อี แจก, อึณ หมึอม หลึอม เฆ อี แฮะ ปึอน โกรวกราม กืน, โกบ โบง เฆ นา ตู หมึอม.
9ดูอี บอ ปึอน คราม ปี ซี โบง อัน. มาแล, อึณ มูห เฌาพรา อี ดี แตห อัน นับ ปี ดี ปาย ดี โบง.
10โฆรห ปี ซูงพยาด เฌาพรา, อึณ บอ เลห แคง โมต คูนดีคัม. เซ คูนดีคัม ซูงพยาด ดารา, อัน ตู นับ ดี กาลึบ.
11เฌาพรา ซี แตห ดูอี ตา ณอย เฆ เบล ซัะ อี หมาน. อี บอ ซัะ มาเซ, เฌาพรา แฮะ แตห อึณ กาฌี, แตห อึณ หมาน.
12คูนดีคัม บอ กาอีห บอ ฌ็อง อี ตู หมึอม. โคว, อัน นับ เซ ฮี ซูงพยาด โดบ ดารา, อึณ ดี แตห อัน อึบ ซีคยา, อึบ เหลณ.
13คูนดีคัม บอ ซี โทม โฆรห อี มูห อี หมาน. เฆ อี กาลาง โฆรห ฌึร ตี, อึณ บอ ล็อะ น็อห อัน.
14เซ คูนดีคัม มึห น็อห รู, อึณ บอ ปี ดาลาม อัน ดี ตัห ต็อห ดี ง็อห อี. เซ อึณ ยี มึห ดูอี อี มึห อางยาน, อัน บอ นับ ดี วี เหลา น็อห คูนดีคัม.
15เซ นา คูนดีคัม ฮี ดาคึย, อึณ ดี แบน ฆยามซา ดี อี. เฆฌู อัน บอ ปี อึณอูะ อี แตห ฆลาย โจห ดอ อาคราว ดียาง.
16เซ เอ มึห อางยาน, อึณ หมึอม หลึอม มึห เอ ครีว. เซ เอ นับ ปี ปาย แบน โมยว แบน โมยว, อึณ หมึอม หลึอม มึห เอ รึอน.
17เฆ อี บอด อี หมึอม, เฆ แฮะ วัห อึณเตณ อี ตู หมึอม. เซ เฆ ซาดีก อึณเตณ ปี ว็อะ เฆ, อึณ ดี คยอด อาซาก เฆ.
18น็อห ปีคึก อึณ ดี แยต แตห อี ชึม. น็อห ปีจา โดว บรีม, อึณ ดี โบง แตห อี วี โจห เตียม.
19เซ แม มึห น็อห เตียม บอ กอย รึม โดบ ดูอี ฆีน, อึณ หมึอม หลึอม กอย แม โดบ ดูอี อี ปีคึก, อี กาซาง โกรว ปี พาด ดึห เฆ ดี อี เฮา.
20เซ แม ซาดีก โดบ แปะ แฮะ เฮน แม, แม ดี ออง. เซ แม หณึม บึง เฌาพรา, แม ดี โบยว ดาคึย.
21เซ ดูอี มึห อางยาน, อี เฮา ดี บอ ต็อห, อัน นับ แบน โมยว แบน โมยว. เซ อัน กาลาง โฆรห ดาคึย โฆรห งาม, อึณ ดี แตห อัน แว นับ ดี มาโนว อี.
22อางยาน บอ ปี อึม อี ดัว อาซาก ดี เฆ อี มึห อางยาน. ดูอี รึร, ยี โลว คัม อาฆยึร รึร อัน.
23ดูอี อี มึห อางยาน, อัน บอ นับ แคง น็อห อัน แคะ ปี โลว กาลาง อัน. ปาย ตี อัน บอ แว นับ ดี มาโนว อี.
24โฆรห อี ดาคึย, อึณ ปี งาม มาเพียน. อึณ บอ ดาคึย ดี น็อห ดี พึอม. อึณ บอ แบน โปลม แบน แฮณ ดี โดว โบ็ง อี.
25เซ แม โดบ อึณเตณ ปี ทาง แม แฮะ หมาน, อึณ ดี แตห แม ยัม.
26ปี ดี โลว ดูอี, อึณ แตห อัน โบง ฆาน. ปี กาปราณ อัน บอ แตห อัน แว ออน ดี โบง.
27ดูอี ฮาย, อัน บอ คราม ดี โบง มี นา จีจีว ดี อี. โฆรห ปี กาลาง อัน บอ ปี เงา อี กาซึม.
28เฆ ดูอี น็อห โฆะ แฆะ, เฆ นับ ดี กาย็อง อี เฮา. เฆ อี กาลาง โฆรห พูพาบ, เฆ นับ ดี โบง แตห อู ฆึก ลาย กาย็อห.
29ดูอี มืก, อัน นับ ดี เกา ฆึก อัน. แฮะ ฮอต, อัน บอ แยต ฆึก อัน ฮาว โบง นา ตู หมึอม.
30ดูอี อี นับ ดี กายับ งาย ดี แม, อัน คราม ดี โบง นา ตู หมึอม. เซ ดูอี ดีมัม ดี แม, อัน ซี โบง นา จีจีว.
31เซ ฮึก ฆีณ ดูอี แฮะ ลูย, อัน บอ มึห ซาเร. อึณ ปี อัน ชึบ มังฆึม. อึณ บอ ลึห ปี โบง อัน แฮะ ซืร แฮะ หมาน เซเซ.
32เซ ดูอี คัม ดี ยืน, อึณ บอ หมึอม หลึอม ดูอี อี มึห โปลม ตาง. เซ อัน แป ดี โอด น็อห, อึณ บอ หมึอม หลึอม ดูอี อี อึบ มืง บอ มืง.
33ดูอี บอ นับ ดี กาตาม, แตห เฆ นับ ปี โลว เฌาพรา. มาแล, เฌาพรา อี ซูงพยาด โตต ดอน โมยว.
© 2021, Wycliffe Bible Translator, Inc. All rights reserved.