อง 11
11
1เฌาพรา ฌ็อง เฆ อี ตา ณอย บา อี ตู หมาน. อึณ ยี ล็อะ น็อห อัน เซ อี ตา เบล ซัะ อี หมึอม อี หมาน.
2เฆ อี ปีคึก น็อห เฆ, เฆ ดี วี โลว ซาย อี. เฆ อี มึห น็อห เตียม, เฆ ยี มึห อางยาน.
3อาเซ มึห น็อห บอด น็อห หมึอม, น็อห อัน ตี ดี แยต ดี ตึย อัน. อาเซ ยี ตู โบง นา หมาน นา หมึอม, นา โฆะ นา จีจีว ดี บอ ปยาต อัน.
4เซ เฌาพรา ดัม หมาบ ดี อี, โกรวกราม อัน ตู ปึอน จอย, แตห อัน ลอด. อาเซ ยี มึห น็อห ซืร น็อห หมาน, น็อห อัน ตี ดี แตห อัน ลอด.
5นา ซืร นา หมาน ปี โบง ดูอี อี บอด อี หมึอม, อึณ ดี ตึย อัน ฮาว โดบ อึณเตณ ซืร. เฆ ดูอี ฮาย, เฆ ดี ชึม โกบ ฮาย เฆ ตี.
6นา มูห นา หมาน ปี โบง เฆ ดูอี อี บอด อี หมึอม, อึณ ดี บอ คยอด เฆ. เฆ ดูอี ฮาย, เฆ ยี โดบ น็อห ลอพัะ เฆ, แตห อึณ ปี เฆ เคร แคง ยอต.
7เซ เฆ ดูอี ฮาย ฮี ยัม, ปี หน็อะ อึณด็อะ เฆ มืร ดี ยัม โดบ เฆ. แคะ ปี หณึม บึง เฆ, อาว แบน อาฆยึร มาเซ.
8เฆ อี น็อห ซืร น็อห หมาน, เฆ ดี บอ ลอด อาเพ อาเร. อาเพ อาเร ตี ดี วี ตา ดึร เฆ อี ตู หมึอม.
9เฆ อี ตู นับ เฌาพรา, เฆ บอ กาลาง โฆรห ตู หมึอม, แตห ฆึก เฆ ชึม. อึณ ยี มูห อางยาน เฆ ดูอี อี มึห น็อห ซืร น็อห หมาน อี นับ ดี คยอด เฆ.
10เซ ดูอี อี มึห น็อห ซืร น็อห หมาน ดี ปึอน แบน โมยว แบน โมยว, อึณ แตห ดูอี ดอน อี ดาคึย บอ มืง. เซ ดูอี อี ตู หมึอม ฮี ยัม, เฆ ดี บอ โคย ซีนัน ซีนืง.
11โกบ ม็องการา ดัว เฌาพรา ดี เฆ อี มึห น็อห บอด น็อห หมึอม, มืง บอ มืง บอ ดาคึย มึห เฌะฌูง. โกบ โฆรห ปี กาลาง เฆ ดูอี ฮาย, มืง ยี ลึร ยี ชึม.
12ดูอี อี กาลาง โฆรห หมึอม กาอีห ดี ฆึก อัน, อัน ตู นับ ดี กาย็อห อี หมึอม อี ตู หมึอม. ดูอี อี หล็อก, อัน ยี กอย หนีม หนีม.
13อาเซ ออน ดี แค อาฆยาง อี, อัน บอ นับ ดี กาลาง ปี เครียง อี ดี กาลาง. เซ อึณ ยี มูห ดูอี อี ปึอน บึง, อัน ดี บอ นับ ดี เครียง อูน ปี กาลาง อี ดี อัน.
14เซ อาว มึห อี ดัว อากยาม อางยาน, ดูอี บอ เรา บอ มืง ดี บอ ชึม บอ ลึร. เซ อึณ ยี มึห ดูอี กืน ดัว อากยาม อางยาน, อึณ ดี แตห ดอน อี กอย ดาคึย, กอย ซีคยา.
15เซ แม กาแซณ ดี กีคัม ดาง ดูอี เฮา, อึณ ดี แบน ดูก กาเซา ดี น็อห แม. เซ แม ยี ฌ็อง ลอง กีคัม ดาง อี เฮา, แม ดี ลอด แหม ดี น็อห.
16อีบึณ อี นับ ดี เฆฌู อี, อัน ดี มึห ซาเร. อีมาย อี มึห น็อห จา, อัน ยี ปึอน มี โกรวกราม.
17อาเซ เฆฌู อี, อึณ ปี อัน โบง แตห อึณ แบน อาฆยึร ดี อัน. อาเซ มึห น็อห ฮาย, อึณ ปี อัน โบง แตห อึณ แบน ดูก ดี โดว บรีม อัน.
18อาฆยึร ปี ปึอน ดูอี ฮาย, อาว ปึอน บึง. อาฆยึร ปี โบง ดูอี อี มึห น็อห ซืร น็อห หมาน, อึณ ยี หมาน อาคาคัร.
19อาเซ เบลห น็อห ดี โบง นา ซืร นา หมาน เซเซ, อัน ดี ปึอน อาซาก กามาย. เซ อึณ ยี มึห ดูอี อี ดืน ดี โบง นา ตู หมึอม, อัน ดี บอ ยัม อาคาคัร.
20เฌาพรา ฌ็อง เฆ อี มึห น็อห โฆะ แฆะ. เฆ อี มึห น็อห บอด น็อห หมึอม ยี ล็อะ น็อห อัน.
21แตห แม นับ ซีคยา, เฆ อี ตู หมึอม, เฆ ดี โลว คัม หมาบ เฆ. เฆ อี มึห น็อห ซืร, เฆ ดี บอ ลอด คัม.
22อีบึณ อี ชีด ยี ตู นับ ดี ซาดีก โดว, อึณ บอ ปี มากาแวะ ครีว อี ฮอย ดี ฆูงมูห มาเลต.
23ปี ซี ปึอน เฆ ดูอี อี มึห น็อห ซืร น็อห หมาน, อึณ บอ แบน โตต นา บอด นา หมึอม เซเซ. ปี หน็อะ อึณด็อะ ดูอี ฮาย, อึณ ยี แตห เฌาพรา รู ดี เฆ.
24ดูอี มัง อี, เฆ ปี บอ กาซาง ดัว ดี อี เฮา, โกรวกราม เฆ บอ แว มึห กืน กาปัว. ดูอี มัง อี, เฆ ตู มึห น็อห ซี หลู ซี ดัว ดี อี, เฆ ยี แว ฆีน, แว เอต.
25เฆ อี มึห น็อห ฮาง น็อห ซาทา, เฆ ดี บอ โฮม ลึง ตา ลึง. เฆ อี จอย อี เฮา, เฆ ดี วี ปึอน ปี จอย อี ดี เฆ.
26อาเซ แฆบ อูน โหงว บัร แตห อึณ ง็อห, อัน ดี คัม ปี ดืง ปี เอห อี เฮา. เซ อัน ยี ย็อง ดัว ดี อี เฮา, เฆ ดี อืบ มยูก อัน.
27เซ ดูอี ออน ดี โบง นา บอด นา หมึอม เซเซ, เฌาพรา ดี อึง อัน. เซ อัน ยี อึง ดี โบง แตห อี เฮา ลึร, บอ อัน ดี วี ลึร.
28อาเซ ต็อห ดี บึง โกรวกราม อัน, อัน ดี บอ ชึม ปี หลา เฮ อี ซีฆลูห โจห อาคราว ซอดาด. อี มูห เฆ อี มึห น็อห ซืร น็อห หมาน, เฆ ดี บอ แว มึห ปี หลา เฮ อี อึณโลห อาคราว ฆลาย.
29เซ แม โบง แตห อึณ แบน ดูก ดี อึณโฮม แม, แม ตู ปึอน คาฆูน มาเซ. ดูอี รึร ดี โลว แบน หมาย ดูอี หล็อก.
30อาฆยึร ปี โบง ดูอี หมึอม, อึณ แบน อาซาก กามาย ดี อี. อาเซ ยี โบง นา จีจีว, อัน โบง แตห อาซาก อี ชึม.#11:30 แคง โฆรห แฮแบร อึณ ตู ลึห ซีคยา
31เฆ อี มึห น็อห ซืร น็อห หมาน, เฆ ดี ปึอน อาฆยึร ปี โบง เฆ ดอ มูห ฌาด นี. ปาย ตี บอ เฆ ดูอี ฮาย ดูอี มืก, เฆ ดี โลว คัม กืน แคะ กาดาน หมาบ เฆ.
© 2021, Wycliffe Bible Translator, Inc. All rights reserved.