แปร กาฮ็อห 34
34
ลอง กาอูน กาดาย เฆ ดูอี อีซาเรลัะ แคง มืง กานัณ
1เฌาพรา วี จัร อาโมวแซ, 2แตห อัน วี กาลาง ดี เฆ ดูอี อีซาเรลัะ ต็อห, “เซ เบ ฮี ฮาว ฌัม แคง มืง กานัณ ตึอน, กาอูน กาดาย มืง แปะ แฮะ ปึอน เบ ตี, อึณ ปาย นี.
3บลาก นา เตต, อึณ ดี มึห แปร กาฮ็อห อี จืร จีนา. กาอูน มืง เบ บอ โดบ กาอูน มืง เอโดม. บลาก นา เลห ซีแง กาอูน มืง เบ ตี ดี โดบ นา เตต อึม ดึง ซัยะ ซ็อง. 4แฮะ ฮอต, อึณ ดี ฮาว โดบ อึณเตณ อาราบีม, วี ฮาว บอ แคง แปร กาฮ็อห จีนา ตึอน, แตห อึณ วี ฌัม นา เตต กาเดบานา, ปี วี วีต วีว บลาก นา เฆต ซีแง, วี ฮาว ดี โดง จืร ฮาจาอาดารา. แฮะ ฮอต, ปี วี ฮาว ดี โดง จืร อาจาโมน. 5จูห ดี ตี, อึณ ปี วี วีต ฮาว ดี ดีลัยะ อี จืร ดีลัยะ แอฆึบ บอ ฮาว ซืด ดี อึม นัมมูกซารา.
6อี มูห กาอูน มืง เบ อี กอย นา เฆต ซีแง, อึณ ดี โดบ บาง อึม นัมมูกซารา.
7อี มูห กาอูน นา กัว, อึณ จูห ดี อึม นัมมูกซารา, ฮาว ซืร ดี นอน โฮวรา, 8ปี วี ฮาว ฌัม โดบ อึณเตณ เลโบวฮามาด, ปี วี ฮาว ซืร ดี โดง จืร เจตาด, 9ปี วี ฮาว ดี โดง จืร จีโบรน, บอ ฮาว ซืด ดี โดง จืร ฮาจาเร อี มูห กาอูน บลาก นา กัว.
10อี มูห กาอูน บลาก นา เลห ซีแง, มืง เบ ดี จูห ดี โดง จืร ฮาจาเร ตี, ฮาว ฌัม โดง จืร ซาพาน. 11แฮะ ฮอต, กาอูน มืง เบ ตี ดี ฮาว ดี มืง รีบาลา อี กอย นา เลห ซีแง มืง อาอีน. อึณ บอ ฮาว โดบ ซัน นอน นา เลห ซีแง อึม ดึง กีนาเรด ตึอน.#34:11 บาน ดอ ตี นี เฆ ต็อห อึม ดึง ฆาลีเล. 12อึณ บอ ฮาว นา เตต แบลง อึม ยอดาน, ฮาว ซืด ดี อึม ดึง ซัยะ ซ็อง ตึอน. อาตี อึณ มูห กาอูน กาดาย อี โรบ มืง เบ บอ พวน บลาก.”
13แฮะ ฮอต ปาย ตี อาโมวแซ ปี วี กาลาง ดี เฆ ดูอี อีซาเรลัะ ต็อห, “อานี มูห มืง ปี โลว เบ กาตาม, โลว ลาย กาซาง. อึณ มูห มืง ปี ดี อาบ ดัว เฌาพรา ดี ดูอี อีซาเรลัะ อี มูห ดีม ครึร ดี อู กาแต ตึอน. 14โคว, เฆ ดูอี ครึร อามานาเซ อาดา อู กาแต บอ ดูอี ครึร อารูเบน บอ ดูอี ครึร อาฆัด, เฆ แฮะ ฮอต ปึอน มืง เฆ. เฆ แฮะ ฮอต ลาย กาซาง กาดาย ดี เฆ, แตห อึณ แบน คาฆูน เฆ ครึร เหมา ครึร อัน. 15เฆ แฮะ ปึอน กาดาย อี กอย นา เลห ซีแง แบลง ยอดาน อี วี ลาย กาซืร ดี มืง เยรีโคว ตึอน.”
16วาย อัน ตี เฌาพรา ปี วี ต็อห ดี อาโมวแซ, 17“อาเลอาซา อี มูห ดา อี หลู ดี เฌาพรา บอ อาโยวซูอา อี มูห ฆอน อานูน ตึอน, ฆาย อี ดี กาซาง กาดาย แคง มืง ตี ดี เฆ ดูอี กืน. 18แดง ตี, แม โลว วี ร็อห ดูอี อาดา อู ครึร อู วี, แตห เฆ แบน ดา อี จอย ฆาย ดอ กาซาง ฆาย กาดาย แคง มืง บอ มืง.
19อานี อึณ บอ มูห จืร เฆ ดูอี ปี ร็อห เฆ ตี. แคง ครึร อายูดา อึณ บอ มูห อาฆาลีบ อี มูห ฆอน อาเยโพวนา.
20แคง ครึร อาซีเมโอน อึณ บอ มูห อาเซมูเอลัะ อี มูห ฆอน อามีฮูด.
21แคง ครึร อาเบนยาม อึณ บอ มูห อาเอลีตัด อี มูห ฆอน อาคีโลน.
22แคง ครึร อาดาน อึณ บอ มูห อาบูกี อี มูห ฆอน อายอกาลี.
23แคง ครึร อามานาเซ อี มูห ฆอน อาโยว อึณ บอ มูห อาฮาเยลา อี มูห ฆอน อาเอโฟด.
24แคง ครึร อาเอพารีม อึณ บอ มูห อาเกมูเอน อี มูห ฆอน อาซีพาดาน.
25แคง ครึร อาเฌบูโลน อึณ บอ มูห อาเอลีฌาพาน อี มูห ฆอน อาพานาก.
26แคง ครึร อาอีซาคา อึณ บอ มูห อาบาลาเดจัะ อี มูห ฆอน อาฌัน.
27แคง ครึร อาเซน อึณ บอ มูห อาฮีฮูด อี มูห ฆอน อาซาลอมี.
28แคง ครึร อานาบทาลี, อึณ บอ มูห อาเบดาเฮลัะ อี มูห ฆอน อามีฮูด.”
29ดูอี เฆ ตี, เฆ มูห ดูอี ปี จัร เฌาพรา, แตห เฆ จอย กาซาง กาดาย แคง มืง กานัณ ตึอน, ดัว ดี เฆ ดูอี อีซาเรลัะ.
Currently Selected:
แปร กาฮ็อห 34: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
