มก 2

ลอง เฌา เยซู แตห ดูอี มึห เปลา ยัม วี แกน

1วาย อัน ตี พวน พัน ซีแง, เฌา เยซู วี เวณ มืง กาเปนารึม. เฆ ดูอี บอ นับ, อัน แฮะ ตัห ฌัม แคง มืง, กอย แคง กาง อัน. 2เฆ กืน วี ตัห กาฌูะ แคง กาง ตึอน. บอ นา เรต กาง ดูอี แฮะ โนะ. อาว ฮู ปึอน ลึบ ดี มาโลห. เฌา เยซู ยี กาลาง โฆรห เฌาพรา ดี เฆ, แตห เฆ โทม. 3อึณ ยี มึห ดูอี มัง อี ตัห ตึย ดูอี เซา อู วี. แด เฆ เปลา อัน แฮะ ฮอต ยัม. เฆ พวน วี กาฆอด อัน ตัห. 4โกบ กืน ดูอี, เฆ ตู ปึอน ฮาว ฌัม โดง กอย เฌา เยซู. ปัน ตี เฆ วี โฮะ แดง กาตูะ กาง, วี ปยาต, แตห อึณ แบน กาเดา นา แดง โดง กอย เฌา เยซู.#2:4 ยอด อามาแท 24:17 แฮะ ฮอต, เฆ วี บยัว โลง ดูอี เซา ตึอน แดง กาแบห อัน, แตห อัน ฌัม ดี อาต เฌา เยซู.

5เฌา เยซู ยี ยึร เฆ หณึม อัน, อัน วี กาลาง ดี ดูอี เซา ตี. อัน ต็อห, “อึย วา โอว, โอว แฮะ ฮอต บลัวะ แวน หมาบ แม.”

6อึณ ยี มึห เฆ ดา ซารา อี มาโนว ดารา ยูดา มัง อี, เฆ กาพา แคง น็อห เฆ ต็อห, 7“เหมา อึณ ปาย ปี กาลาง อัน โฆรห ตี? อึณ มูห โฆรห อี กาแคณ ดี เฌาพรา. อาว มึห อาเซ แป ดี ฆ็อห แวน หมาบ อี. อึณ มึห มี เฌาพรา อี ปึอน ฆ็อห แวน หมาบ อี.”

8เฌา เยซู มืร นับ อู เฌณ แคง น็อห อัน ปี เฌณฌา เฆ แคง น็อห เฆ. อัน วี ต็อห ดี เฆ, “เหมา อึณ ปาย ปี ทาง เบ ปาย ตี? 9เซ โอว ต็อห ดี ดูอี ตี, ‘โอว ฆ็อห แวน หมาบ แม,’ เบ ทาง อึณ แฮะ หงึย กาลาง โกบ ตู ปึอน ยึร เบ, โยว หมาบ ซี มึห, ตู มึห. เซ โอว ยี ต็อห, ‘แตห แม ยีต, โฆ็ง กาแบห แม, เวณ,’ เบ ทาง อึณ หณาบ กาลาง โกบ ปึอน ยึร เบ, โยว อัน ยีต, ตู ยีต. 10โอว ยี แตห เบ นับ, โอว อี แฮะ แบน ฆอน ดูอี, โอว แฮะ มึห ปวน แดง กาดาย, แตห โอว แป ดี บลัวะ แวน หมาบ อี.” อัน แฮะ ฮอต กาลาง ปาย ตี, อัน วี ต็อห ดี ดูอี เซา ตึอน, 11“โอว ต็อห ดี แม, ยีต, แตห แม ดึห โฆ็ง กาแบห แม, เวณ แคง กาง แม.” 12ปัน ตี อัน บอ ยีต อู เฌณ, ดึห โฆ็ง กาแบห อัน, ฮาว เลห โดง กอย เฌา เยซู, แตห ดอน อี ปึอน ดี ยึร. เฆ ดอน อี กอ อาม กาเซา. เฆ บอ อืบ เฌาพรา ต็อห, “เอ ตู ดึอม ยึร ฌึร ตี ดอ เหมา.”

ลอง เฌา เยซู แดะ อาเลวี โดบ อัน

13ปอ อู เฌณ เฌา เยซู ฮาว ฌัม บาง อึม ดึง. บอ เฆ ดูอี กืน วี ตัห โดบ อัน. อัน วี จูห ดี มาโนว เฆ. 14ดอ ฮาว อัน โดบ อึณเตณ, อัน ยึร อาเลวี, อี มูห ฆอน อาลาแพ. อัน กอย โดง แฆบ รึอน จึง. เฌา เยซู ต็อห ดี อาเลวี ตึอน, “แม ตัห โดบ โอว.” แฮะ ฮอต อัน วี ยีต, ฮาว โดบ เฌา เยซู.

15วาย อัน ตี เฌา เยซู เฆ ดีแบ อัน วี ฮาว โฮม โบม แคง กาง อาเลวี. อึณ มึห บอ เฆ ดูอี แฆบ รึอน จึง บอ เฆ ดูอี อี โบง หมาบ แบน โมยว แบน โมยว, เฆ กืน กอย รึม, โฮม รึม. อึณ มึห ดูอี ฌึร ตี, เฆ กืน โดบ เฌา เยซู. 16อึณ มึห เฆ ดา ซารา อี มาโนว ดารา ยูดา มัง อี. เฆ มูห ดูอี พึง พารีแซ, เฆ บอ ยึร เฌา เยซู บอ เฆ ดูอี อี โบง หมาบ แบน โมยว แบน โมยว บอ เฆ ดูอี แฆบ รึอน จึง,#2:16 เฆ ดูอี แฆบ รึอน จึง, เฆ นับ ดี โปห อี บอ ปีหล็อก ดี อี. โคว, ดอน อี ต็อห, เฆ มึห หมาบ กืน. กอย รึม, โฮม รึม. เฆ วี ตัห ดีหมอด ดี ดีแบ เฌา เยซู. เฆ ต็อห, “เหมา อึณ ปาย ปี กอย ดา ซารา เบ, โฮม รึม โดบ เฆ ดูอี อี แฆบ รึอน จึง บอ เฆ ดูอี อี โบง หมาบ ดอน โมยว?”

17บอ เฌา เยซู แฮะ ยึร โฆรห เฆ. อัน วี ต็อห ดี เฆ, “อาเซ แฮะ โปลม คัะ, อาว โลว ซาราโวน. อาเซ มึห เซา รอฆา, อัน แฮะ โลว ซาราโวน. โคว, โอว มืร ตู ตัห แตห โอว แดะ ดูอี หมึอม ตัห โดบ โอว. โอว แฮะ ตัห แตห โอว แดะ เฆ ดูอี มึห หมาบ ตัห โดบ โอว.”

ลอง เฆ ดูอี ยืน ปี ดี โฮม

18อึณ มึห เฆ ดีแบ ดา ซารา อายอฮาน ตึอน, บอ เฆ ดูอี พึง พารีแซ, เฆ บอกาเฆลียด คัม ดี ยืน ปี ดี โฮม. อึณ ยี มึห มัง อี, เฆ ตัห ฌัม โดง กอย เฌา เยซู, วี ดีหมอด อัน. เฆ ต็อห, “เฆ ดีแบ อายอฮาน บอ เฆ ดีแบ แคง พึง พารีแซ, เฆ ยืน ปี ดี โฮม เฆ. เหมา อึณ ปาย ปี ตู ยืน ดีแบ แม ปี ดี โฮม เฆ?”#2:18 เฌาพรา แฮะ จัร เฆ ดูอี อีซาเรลัะ ยืน ปี ดี โฮม อู ซีนัม อู เฌณ ดอ มูห ซีแง อี แตห เฆ วี กาล็อะ ดี เฌาพรา. เฆ ดา ตาง ยี มาโนว, โลว ยืน ปี ดี โฮม แบน เฌณ แบน เฌณ. เฌา เยซู ยี ตู โดบ ปี มาโนว เฆ ตี.

19เฌา เยซู วี ต็อห, “เซ อึณ มึห บลอย คัด, เฆ แคต อี ตัห ลึบ บลอย ตี, เฆ ตู ปึอน ยืน ปี ดี โฮม ดอ กอย รึม กาโณม โดบ เฆ. เฆ โลว โฮม บลอย คัด, ดอ กอย รึม กาโณม โดบ เฆ. 20อึณ ยี ดี ฌัม อู ซีแง, เฆ ดี ดึห แวน กาโณม ตึอน. ดอ อัน ตี เฆ ดูอี อี ลึบ บลอย ตี, เฆ ดี ยืน ปี ดี โฮม เฆ.

21อึณ มืร ตู มึห ดูอี, อี ดึห โดณ กามาย วี กาปาง ซีโตว บรีม. เซ อัน บอ โบง ปาย ตี, โดณ กามาย แตห ซีโตว บรีม วี กาปยาต กาปัว, แตห หลูห อัน วี ตาง หลึอม คา อาต. 22อึณ มืร ตู มึห อาเซ อี ฮับ อึม มางูน กามาย แคง กาเปา เบล อี บรีม. เซ อัน โบง ปาย ตี, อึม มางูน กามาย ดี ซีนัม แคง กาเปา บรีม ตึอน, แตห กาเปา กาลาต, แตห บอ กาเปา บอ อึม มางูน กอ ชึม. โคว, ดูอี ดี ฮับ อึม มางูน กามาย แคง กาเปา กามาย, แกวะ แตห อึณ ลึร.”

ปี มาโนว เฌา เยซู ลอง ซีแง ดีเหลา

23อึณ วี ฌัม อู ซีแง อี มูห ซีแง ดีเหลา. ซีแง อัน ตี, เฌา เยซู เฆ ดีแบ อัน วี ฮาว โดบ แฆรง แคง มาน เคาคยูง. เฆ ดีแบ อัน, ดอ ฮาว เฆ โดบ แฆรง ตี, เฆ วี จูห ดี ซีกัด กาโย็ง อัน. 24เฆ ดูอี พึง พารีแซ มัง อี, เฆ วี ต็อห ดี เฌา เยซู, “แม ยอด ดีแบ แม, เหมา อึณ ปาย ปี โบง เฆ ปี ตู แตห ดารา เอ โบง ดอ มูห ซีแง ดีเหลา?”

25เฌา เยซู วี ต็อห ดี เฆ, “เบ ตู ดึอม ตีห แคง บับ เฌาพรา ลอง แปะ แฮะ โบง อาดาวีด ตึอน? บอ อัน บอ ดูอี อี โดบ อัน ตู มึห ปี ดี โฮม, ยี กาปราณ กาเซา ปี ดี โฮม. ดอ อัน ตี อัน ลึบ แคง กาง โดง กรึบ เฆ เฌาพรา, ดึห โฮม คามูน ปี เบลห อี ดี อาต เฌาพรา. อัน แฮะ ฮอต ดึห โฮม, อัน บอ ดัว แตห บอ เฆ ดูอี อี โดบ อัน โฮม. 26อัน โบง ปาย ตี, ดอ กอย อาบาทา ตึอน, อี มูห ดา ตาง อี อึบ โตต ดูอี อี หลู ดี เฌาพรา. ดารา ตู แตห ดอน อี โฮม คามูน ตี. อึณ มึห มี เฆ ดูอี อี หลู ดี เฌาพรา, อี ปึอน โฮม อาตี.”

27เฌา เยซู แฮะ ฮอต กาลาง โฆรห ตี, อัน วี ต็อห ดี เฆ, “เฌาพรา โบง ซีแง ดีเหลา, แตห อึณ จอย ดูอี. อัน ตู โบง ซีแง ดีเหลา แตห อึณ หณาบ ดี ดูอี. 28โคว, อึณ มูห โอว, อี แฮะ แบน ฆอน ดูอี, โอว มูห ดา กาณา อี อึบ ซีแง ดีเหลา.”

Currently Selected:

มก 2: pce

Highlight

Copy