มท 10

ลอง เฌา เยซู ร็อห ดีแบ อัน บอ จัร เฆ ฮาว แบน โปละ แบน โปละ

1-4เฌา เยซู แฮะ ฮอต กาลาง โฆรห ตี, อัน วี จูห ดี แดะ ดีแบ อัน ฆึร ดี อา วี, แตห เฆ โดบ อัน เซเซ. อึณ บอ มูห อาซีโมน อี จืร บอ อาเปตารู บอ วา อัน อี จืร อาอันดารู บอ อายาโกบ อี มูห ฆอน อาเฌเบเด บอ วา อัน อี จืร อายอฮาน บอ อาพีลีบ ฆาย อาบาโทวโลวโมว, อาโทวมาด บอ อามาแท อี มูห ดูอี แฆบ รึอน จึง บอ อายาโกบ อี มูห ฆอน อาลาแพ บอ อาทาเด บอ อาซีโมน อี แฮะ ดึอม แบน ดา โฌน บอ อายูดัด อี จืร บอ อาซาคารีโอด, อี อาบ เฌา เยซู ดี รันซู อัน. ดูอี เฆ ตี แฮะ แบน ดีแบ เฌา เยซู ฆึร ดี อา วี. เฌา เยซู บอ ดัว ปวน อัน ดี เฆ, แตห เฆ ซูต กานัม เลห แคง โดว โบ็ง อี บอ แตห เฆ ปีแกน เซา ดูอี แบน โมยว แบน โมยว.

5-6เฌา เยซู บอ จัร เฆ ดีแบ อัน ฆึร ดี อา วี ตี. อัน ต็อห, “แตห เบ ฮาว โดง กอย เฆ ดูอี อีซาเรลัะ. ดูอี เฆ ตี, เฆ ปี มาบู อี ตู มึห ดา อี เฮียง. แกวะ ฮาว โดง กอย เฆ ดูอี อาโมยว เฮา. แกวะ ฮาว ลึบ มืง เฆ ดูอี ซามารี. 7เบ โลว ฮาว กาลาง ดี อี, ‘อาคราว ดี อึบ เฌาพรา กาดาย แฮะ กาตัด ดี ตัห.’ 8เบ โลว ปีแกน ดูอี เซา, วี โบง แตห ดูอี ยัม วี ยีต วี อีม. โบง แตห เฆ ดูอี อี มึห เซา ดูะ#10:8 ยอด อามาแท 8:2 วี แกน, ซูต เฆ กานัม เลห ตัะ โดว โบ็ง อี. ปวน ปี ดัว โอว ดี เบ อี แตห เบ โบง ฌึร ตี แบน โมยว แบน โมยว, โอว แฮะ ดัว ดีโลย ดี เบ, อาว โลว ดัว รึอน. โคว, บอ เบ โลว ดัว ดีโลย ดี อี, แกวะ หมาณ รึอน. 9แกวะ ฮับ รึอน แคง แซะ เบ. 10แกวะ โฆ็ง ฮู ดอ ฮาว เบ โดบ อึณเตณ. แกวะ โฆ็ง ซีโตว กาปลูะ. แกวะ ดึห คูดีณ เฆ อึณกรวน. โคว, อาเซ โบง ฆาน, อัน บอ กาอาบ ปึอน รูห อัน.

11เบ บอ ฮาว นา เหมา, เซ เบ ฌัม อู โปละ, แตห เบ เหรต ดูอี หมึอม, อี แตห เบ กอย แคง กาง อัน. แฮะ ฮอต, เบ โลว กอย แคง กาง ตี, แตห กอ ฌัม อาคราว ดี วี เวณ เบ. 12เซ เบ ลึบ แคง กาง ดูอี ฌึร ตี, เบ โลว ม็องการา แตห ดี เฆ อี กอย แคง กาง ตี, แตห เฆ มึห น็อห เฆียด. 13เซ ดูอี แคง กาง ตี ซี ปึอน ปี ม็องการา แตห เบ ดี เฆ, เบ โลว แตห ปี ม็องการา เบ ตี กอย ดี เฆ. เซ เฆ ยี ตู โลว ปี ม็องการา แตห เบ ดี เฆ, เบ โลว วี ดึห ปี ม็องการา เบ ตี, แกวะ แตห อึณ แบน น็อห เฆียด ดี เฆ. 14เซ ดูอี ตู รวห เบ, เซ เฆ ตู ซี โทม โฆรห เบ, เบ โลว เลห โดง กอย เฆ บอ ดียึห รัห กาปูห ดี เปลา เบ, แตห อึณ บยัะ ดี เฆ ลอง ปี ตู โทม เฆ, อึณ ตู หมึอม. 15โอว ยี ต็อห อาคัร ดี เบ. เซ เฌาพรา ดี ซูงพยาด ดารา ดี ดูอี บอกาเฆลียด, เฆ ดูอี อี ดึอม กอย แคง มืง โซวโดม ฆาย มืง โฆวโมวรา ตึอน, เฆ โลว คัม หมาบ กืน. มาแล, เฆ ยี ตู โลว คัม แคะ ปี โลว คัม เฆ ดูอี อี ตู โทม โฆรห เบ. 16โอว มืร จัร เบ ฮาว กาลาง ดี อี ลอง โอว, แตห เบ ปี มาบู อี ฮาว โดง มึห มาโซว แปร, อี ซี ก็อะ มาบู. โคว, เบ โลว หล็อก ปี มาฮัณ. เบ ยี โลว เบลห น็อห, แตห อึณ ปี มาโบลย, แกวะ แตห เบ โบง นา ตู หมึอม.

17เบ โลว ซาดีก เฆ ดูอี. เซ เฆ ตู อึง ดี โทม โฆรห เบ, เฆ ดี อาบ เบ ดี ดา ตาง แคง มืง เฆ. เฆ ดี บอ แดะ เบ ตัห แคง โฌง เฆ, แตห เฆ มัห เบ. 18เฆ ดี บอ ตึย เบ ฮาว ดี อาต เฆ ดา กาณา อี อึบ มืง บอ คูนดีคัม อี อึบ มืง อี เฮา, แตห เบ กาลาง ลอง โอว ดี ดูอี ฌึร ตี บอ ดี เฆ ดูอี อาโมยว เฮา, อี ตู นับ เฌาพรา. 19เซ เฆ ดี บอ เหมต เบ, ต็อห ดี คร็อง เบ แคง กาปึม, แกวะ แตห น็อห เบ กาฮัวะ, แกวะ เฌณฌา ดี อาต, มาเซ ปี ดี กาลาง เบ ดี เฆ, เหมา เบ ดี ปาย ดี กาลาง โฆรห ดี เฆ. ฮี ฌัม อาคราว ดี โลว เบ กาลาง, เฌาพรา ดี แตห เบ นับ ซีคยา โฆรห ปี ดี โลว เบ กาลาง. 20มาแล, โฆรห อี เลห แคง โมต เบ อาว มูห โฆรห เบ. เฌาพรา อี ปี ฆูณ เบ, อัน ดี แตห น็อห พึอม เฌาพรา กาลาง แคง โมต เบ.

21อึณ ดี มึห อูกัด อูวา, เฆ ดี ลาย อาบ ดี ดา ตาง, แตห เฆ ยัม. ปาย ตี, อึณ ดี มึห บอ ฆูณ อี นับ ดี อาบ ฆอน อัน, แตห อัน ยัม. บอ ฆอน ดี รู ดี ฆูณ มา อัน, แตห ฆาย ยัม. 22เฆ ดูอี เฮา ดี บอ ฌ็อง เบ โกบ หณึม เบ ดี โอว. อาเซ ยี คัม ดูก ฌึร ตี ดอน โมยว, อาเซ ตู แวน โอว แตห กอ ฌัม ปัน โตต อาซาก อัน, เฌาพรา ดี คยอด ดูอี ฌึร ตี. 23เซ เฆ ดูอี ดัว ดูก ดี เบ ดอ กอย เบ อู โปละ, เบ โลว วี เตา ฮาว ปอ อู โปละ. โอว ต็อห อาคัร ดี เบ. อึณ มูห โอว, อี แฮะ แบน ฆอน ดูอี, โอว ดี วี ตัห ฌัม แดง กาดาย นี. อาต ตัห ฌัม โอว, เบ ตู แป ดี ฮาว ดอน นา ดอน โปละ แคง มืง อีซาเรลัะ, วี โฮว ดารา ลอง โอว, แตห เฆ ดอน อี กอ นับ. โอว ดี ตัห อาต โบง ฮอต เบ ฆาน ตี.

24เซ อึณ มูห ดีแบ อี, อัน ตู ตาง หลึอม ดา ซารา อัน. บอ หมาย อี, อัน ตู ตาง หลึอม ดา กาณา อัน. 25เซ ดีแบ แป ปี แบน ปี ดา ซารา อัน, อึณ แฮะ จู แคะ ตี. บอ หมาย อี, เซ อัน แฮะ แบน ปี ดา กาณา อัน, อัน ตู โลว ปอ อึณ ปัว. อึณ บอ ปาย ตี ลอง โอว. โอว ปี ฆีณ อึณโฮม. เซ เฆ ต็อห ดี ฆีณ อึณโฮม ตี, อัน มูห กานัม อี จืร เบเซบู,#10:25 เบเซบู บอ โบว กานัม อี จืร ซาตาน แฮะ มูห อู โมยว. เฆ ดี บอ ต็อห ปาย ตี ดี เฆ ดูอี อี กอย แคง กาง อัน.

26เบ ยี ตู โลว โยว เฆ ดูอี อี ฌ็อง เบ. ดูอี ตู ปึอน เครียง มาเซ. แคะ ปี ซี เครียง เฆ, อึณ ดี วี ลึห ซีคยา ดี อี. แคะ ปี กาบีด อี แกวะ แตห อี ยึร, อึณ ดี วี ลึห ซีคยา, วี แตห ดอน อี ปึอน ดี ยึร. 27ปี ต็อห โอว ดี เบ แคง หมึร, แตห เบ วี กาลาง ดอ กาแต ซีแง. ปี พูพาบ อี แคง โหยะ เบ, เบ โลว วี ดัด ตาง แดง ฆรัห, แตห ดอน อี กอ นับ. 28เบ แกวะ โยว เฆ ดูอี อี นับ ดี ง็อห ยัม โดว โบ็ง เบ, ยี ตู ปึอน แตห เบ โจห กาโละ งาราย. เบ ยี โลว โยว เฌาพรา อี แป ดี แวน บอ โดว บอ น็อห, แตห เบ ชึม โตต, โจห แคง กาโละ งาราย. 29เซ อึณ มูห มาซีม มาซีล็อห, เฆ ดูอี ย็อง อา โดว อู บยา. เซ เฌาพรา ตู ซี แตห เฆ ยัม, อู โดว มืร ตู ยัม. บอ เบ มืร ปาย ตี. 30เฌาพรา แฮะ นับ โตต ดอน โมยว ลอง เบ. อึณ ปี อัน แฮะ ตีห ฮึก ฆีณ เบ ดอน ณ็อง. 31เซ อึณ ปาย ตี, เบ ตู โลว โยว มาเซ. ง็อห เบ แฮะ ตาง หลึอม ง็อห เฆ มาซีล็อห อี กืน กาเซา.

32เซ ดูอี อู วี กาลาง ดี อี เฮา ลอง หณึม อัน ดี โอว, โอว มืร ดี วี กาลาง ลอง อัน ดี ฆูณ โอว, อี กอย ฆางหราว. 33เซ ดูอี ยี ต็อห ดี อี เฮา, อัน ตู นับ โอว, โอว มืร ดี ต็อห ดี ฆูณ โอว ลอง ดูอี วี ตี, ‘โอว ตู นับ อัน.’

34เซ เบ ทาง, โอว ตัห แดง กาดาย นี, ดี แตห เฆ ดูอี กอย รึม, กอย ดาคึย, อึณ ตู หมาน. โกบ แฮะ ตัห โอว แดง กาดาย นี, เฆ ดูอี ดี ลาย กาโฆห, ลาย รู. 35โกบ ตัห โอว แดง กาดาย นี, อึณ ดี มึห อู ฆูณ อู ฆอน บอ อู ฆอน อู มา บอ อู ฆึณ อู เอา ดี ลาย กาย็อห. 36เฆ ดูอี อี กอย อู อึณโฮม, เฆ ดี บอ มึห รันซู กาแต เฆ.

37เซ ดูอี อู วี ยี ร็อก ฆูณ มา อัน หลึอม ร็อก อัน ดี โอว, อาว ปึอน แบน ดีแบ โอว. อาเซ บอ ร็อก ฆอน อัน หลึอม ร็อก อัน ดี โอว, อาว ปึอน แบน ดีแบ โอว. 38อาเซ ซี โดบ โอว โลว เบลห น็อห อัน ต็อห, ‘เซ โอว ดี บอ โลว ยัม, โอว ยี ดี โดบ เฌาพรา เซเซ.’ อาเซ ตู เบลห น็อห ปาย ตี, อาว กาอาบ โดบ โอว. 39อาเซ หลัยะ อาซาก อัน, อัน ดี ชึม. อาเซ ยี ตู โยว ดี ยัม โกบ โดบ อัน ดี โอว, อัน วี ปึอน อาซาก กามาย.

40อาเซ รวห เบ, อัน ดี บอ รวห บอ โอว. อาเซ ยี รวห โอว แตห โอว ลึบ แคง น็อห, อัน ดี บอ รวห บอ เฌาพรา อี ตึย โอว ตัห ฌัม ดี นี, แตห อัน เฌา ลึบ แคง น็อห อัน. 41อาเซ รวห ดูอี อี บยาน โฆรห เฌาพรา โกบ กาลาง อัน โฆรห เฌาพรา, อัน ดี วี ปึอน รูห ปี ปึอน ดูอี อี บยาน โฆรห เฌาพรา ตึอน. อาเซ บอ รวห ดูอี อี โบง นา หมาน เซเซ, อัน ดี บอ ปึอน รูห ปี ปึอน ดูอี ฌึร ตี. 42เซ ดูอี อู วี ดี ดัว อึม เฆียด ดี ดูอี ปี ร็อก โอว, แตห อัน เดียง, เซ อัน ดัว อึม ตี โกบ มูห ดูอี ตี ดีแบ โอว, โอว ดี วี ดัว รูห ดี อัน. อาตี โอว ต็อห อาคัร ดี เบ.”

Currently Selected:

มท 10: pce

Highlight

Copy