กลึร 5
5
ลอง ปี ซาคึร แตห เฌาพรา กาเว
1อึย แม เฌาพรา, เย หมาณ, แตห แม เฌา วี โหลห ลอง แปะ แฮะ กาดูห ตัห เย. เย หมาณ, แตห แม เฌา ยอด บอ ลอง อี แฮะ แตห เย ชึม ซาเร.
2กาดาย อี มูห คาฆูน เย ตึอน แฮะ ฮอต วี โจห ดี ดูอี อาโมยว เฮา. กาง เย มืร แฮะ วี โจห ดี ดูอี ปอ อู มืง.
3เย แฮะ ปี ฆอน ซีปรัห, ฆูณ อี แฮะ ยัม. มา เย มืร แฮะ ปี ยา ซีปรัห.
4อึม ปี ดี เดียง เย มืร โลว จึห ดัว รึอน. เฮ มืร โลว จึห กอ ปึอน ดี โดะ.
5อึณ ปี ดูอี อี คาหนาบ เย แฮะ เบลห แอะเมา ดี แมง เย. เย ปี บอ แฮะ ดีหลัห มืร, อาว ปึอน ดีเหลา.
6เย มืร แฮะ กาดูห ดี โฆม ดี ดูอี แอฆึบ บอ ดี เฆ ดูอี แคง มืง อาซูรียา, แตห เฆ ดัว ปี ดี โฮม ดี เย.
7เฆ ฆูณ ดัง เย แฮะ โบง หมาบ. เฆ มืร แฮะ ฮอต ยัม โตต. เย มืร วี โลว คัม หมาบ เฆ ตี.
8เฆ อี มูห หมาย แฮะ วี อึบ เย. อึณ ยี ตู มึห อาเซ อี ดี จอย ดี คยอด, แตห เย ลอด ดี ดูอี เฆ ตี.
9อึณ ปี เย โลว ดึห อาซาก เย, การ็อห ปี ดี โฮม. โคว, รันซู อี ซี ง็อห เย แฮะ กอย แคง แปร กาฮ็อห.
10โดว โบ็ง เย แฮะ ดาด กอ แหนน เงา โกบ เย กาปราณ กาเซา ปี ดี โฮม.
11เฆ มืร แฮะ โบง นา จีจีว ดี อีบึณ แคง มืง ฌีโอน บอ ดี เฆ ฆอน ดีบยา แคง มาน มืง ยูดา.
12ดา กาณา อี อึบ มืง แฮะ วี กาดูห อี ปัก ฮอย แด เฆ. อึณ มืร ตู มึห อี โรวเซ อี รีมาด เฆ ดา ตาง.
13เฆ บอ คาหนาบ ดูอี หนึม แตห เฆ กรีด โหงว, แตห แบน กาแปะ. เฆ บอ จัร ฆอน ดีรอย แตห เฆ ฮาว ปัห เฮ อี จัน กาเซา.
14เฆ ดูอี กัด ดูอี แฆ, เฆ บอ หราย โดง ตัห กามวน เฆ ดี บาง มาโลห มืง. เฆ ดูอี หนึม บอ โบยห บอ หราย แคง บาง บลอย โดง ต็อห เฆ โหมว.
15โมยว อี ดี แตห น็อห เย โบยว ดาคึย, อึณ แฮะ ฮอต หราย เยน โตต. น็อห เย อี ซี ฆา ซี เกยา แฮะ วี แบน โตต อี กลึร อี หงูน ดีโลย.
16ลอง ปี ซี ปีพูง เย, อาว ฮู ฆีด มาเซ. เย แฮะ กาดูห อี ตู หมึอม โกบ หมาบ ปี โบง เย.
17โกบ อึณ ปาย ตี น็อห เย มืร แฮะ ลึร. โกบ อึณ ปาย ตี งาย เย มืร แฮะ โมว.
18โกบ อึณ ปาย ตี นอน ฌีโอน แฮะ วี แบน โดง เยน โดง ง็อง ดูอี. เฆ มาโซว แปร แฮะ วี ฮาว วีว ฮาว เวณ โดง ตี.
19ปี บอ แฮะ ปาย ตี มืร, แม เฌาพรา, แม ยี อึบ เซเซ. อาพูง ดังโคว แม เฌา ยี อึบ มืง โดง กอย แม เฌา ดอน โจว ดอน ฌาด.
20แม เฌา, เหมา อึณ ปาย ปี ปีว แม ดี เย เซเซ? โกบ มาเซ แม ซอ แวน เหลณ เย ปาย ตี?
21อึย แม เฌาพรา, เย หมาณ, แตห เย ปึอน ดี วี แบน ดูอี ปี ลึมลา แม. เย หมาณ, แตห แม เฌา วี อึณปราย วี โบง, แตห เย วี ปี บรีม ปี อาต นี.
22เซ อาว ปาย ตี อึณ ปี แม เฌาพรา แฮะ แวน เย อาคาคัร. อึณ ปี แม เฌาพรา แฮะ รู ดี เย บอ ตู บยอง น็อห ดอ เหมา.
Currently Selected:
กลึร 5: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
