อาเอเซเคน 1
1
ลอง อาพูง ดังโคว เฌาพรา
1ดอ มูห ซีนัม โอย ฆึร, มาเฆียน อึณพวน, ซีแง อึณพัน โอว แฮะ กอย โคบ แบลง อึม เคบา โดบ เฆ ดูอี อายูดา แปะ แฮะ เหมต ฮาว เฆ ตึอน. ดอ อัน ตี ฆางหราว บอ อึณ วึห. โอว บอ ยึร ปี บยัะ เฌาพรา ดี โอว.
2ดอ โบว แบน ลอง อัน ตี, อึณ บอ มูห วาย ตัห เหมต เฆ คูนดีคัม อายอยาคีม อาดา พัน ซีนัม. 3ดอ กอย โอว ดี โคบ แบลง อึม เคบา แคง มืง บาแบ, เฌาพรา บอ กาลาง โฆรห ดี โอว. เฌาพรา มืร แฮะ อึบ โอว อี มูห ดา อี หลู ดี เฌาพรา อี จืร อาเอเซเคน อี มูห ฆอน อาบูจีมี.
4โอว บอ ยึร คูน ตาง แฮะ ตัห บลาก นา กัว. อึณ บอ มึห บอ อึณอูะ อี ตาง กาเซา บอ ฮัม กานัม บอ ปลัะ อึณเปลต. อึณ บอ มึห บอ กาตาน เงา กูห บลีว บลีว, อาว กาดัด ดอ เหมา. นา กาแต เงา ตี ปี วี มึห อู โมยว อี ปี บ็อง เดณ. 5แคง กาตาน เงา ตี อึณ ปี วี มึห โดว อี มึห อาซาก พวน โดว อี กาปลูห ตัห. อารึบ เฆ บอ ปี อารึบ ดูอี. 6โดว เฆ ตี, อู โดว มึห นา พวน นา, มึห เพียง พวน โบ็ง. 7เปลา เฆ มืร ซืร. ฆีบ เปลา เฆ บอ ปี ฆีบ เปลา ฆอน มัก อี แฮะ กาลัะ มาบรีว ปี บ็อง เดณ แปะ แฮะ พัะ กามาย. 8แดง มึห เฆ นา พวน บลาก บอ เพียง พวน โบ็ง, เฆ ปี วี มึห บอ แด อี ปี แด ดูอี ปอ พวน โบ็ง, วี เลห ครึม เพียง เฆ. 9เฆ ดอน โดว แฮะ บลัห เพียง เฆ อาดา อา โบ็ง. กาแดะ เพียง เฆ บอ ดอน โดว, อึณ บอ ลาย กาฌาบ ลาย ทีบ. ปาย ตี ดอ บึณ ฮาว เฆ ตึอน, เฆ มืร ตู วี มางัห ยอด, เฆ บอ บึณ ฮาว ซืร นา อาต.
10โดว เฆ ตี บอ ดอน โดว มึห นา พวน นา อี ลาย คาแหนน. นา เฆ นา อาต, อึณ ปี นา ดูอี. นา อาอัห, อึณ บอ ปี นา มาครังซี. นา อาฆัะ บอ ปี นา มามัก. นา ปัน บอ ปี นา มาฆลาง. 11โดว เฆ ตี บอ ดอน โดว, เฆ บอ บลัห เพียง เฆ อาดา อา โบ็ง, แตห กาแดะ เพียง เฆ วี ลาย ทีบ ลาย กาฌาบ ดี ดอน โดว. เพียง เฆ อาดา อา โบ็ง บอ ซีบลึก โดว เฆ. 12ดอน โดว มืร ฮาว ซืร นา อาต. น็อห พึอม เฌาพรา ฮาว นา เหมา, เฆ มืร ฮาว นา ตี. เฆ มืร ตู กาบัด ดอ เหมา, ยี ปึอน ฮาว ดอน บลาก. 13อารึบ โดว ตี บอ ปี อึณกึร เงา. เฆ บอ มึห อาโรง อัน ปี เงา กาฟาง. เงา ตี บอ แล วีว แล เวณ กาแต โดว เฆ ตึอน. เงา ตี บอ กูห ตาง. อึณ บอ มึห ปลัะ อึณเปลต วี เลห แคง เงา ตี. 14โดว เฆ ตี บอ กาแบลบ วีว กาแบลบ เวณ. เฆ บอ ครัน ปี ปลัะ อึณเปลต.
15ดอ ซีงยา ยอด โอว โดว อี มึห อาซาก เฆ ตี, โอว วี ยึร กาเลณ อู โบ็ง อี กอย แดง กาดาย โคบ ดอน โดว. 16กาเลณ เฆ ตี บอ พวน โบ็ง, อารึบ เฆ มูห อู โมยว. ดอน โบ็ง ปี วี มึห อาโรง มาบรีว ปี อาโรง แซณ เงียน ว็อง อี ง็อห ตาง กาเซา. ดี กาเลณ เฆ ตี บอ ดอน โบ็ง ปี วี มึห กาเลณ อัน ปอ โบ็ง. 17โกบ อึณ ปาย ตี กาเลณ เฆ ตึอน บอ ปึอน กาหลอย ฮาว บอ พวน บลาก พวน นา, ตู โลว กาบัด วีว กาบัด เวณ. โดว เฆ ตึอน ฮาว นา เหมา, กาเลณ บอ ฮาว นา ตี. 18โคบ บาง กาเลณ เฆ ตี อึณ บอ จา บอ หมึอม โยว กาเซา. โคว, โรบ บาง กาเลณ เฆ ตี แฮะ มูห โตต งาย ดีโลย.
19ดอ ฮาว โดว เฆ ตึอน, กาเลณ เฆ ตึอน มืร ฮาว โดบ. ดอ อึณ โจะ โฮะ โดว เฆ ตึอน แดง กาดาย, กาเลณ เฆ ตึอน มืร โจะ โฮะ โดบ เฆ. 20น็อห พึอม โดว เฆ ตี ฮาว ดี เหมา, กาเลณ เฆ ตึอน มืร ฮาว โดบ โดว เฆ ตี อี แฮะ อึบ กาเลณ เฆ ตี. 21เซ โดว เฆ ตึอน ฮาว, กาเลณ เฆ ตี มืร ฮาว โดบ. เซ โดว เฆ ตึอน ฮี ฆืด, กาเลณ เฆ ตี มืร ฆืด. เซ โดว เฆ ตึอน โฮะ แคง เบลณ, กาเลณ เฆ มืร โฮะ โดบ. โคว, น็อห พึอม โดว เฆ ตึอน แฮะ กอย แคง กาเลณ เฆ ตี.
22แดง ฆีณ โดว เฆ ตึอน อึณ ปี วี มึห อาดา อู โมยว, อารึบ อัน ปี เบลณ. อึณ บอ มาบรีว ปี มาว มังโป็ง. อึณ บอ หมึอม อาม บอ หมึอม โยว. 23นา ครึม อี ปี เบลณ ตี, โดว เฆ ตึอน บอ บลัห เพียง เฆ, แตห อึณ ลาย กาฌาบ ดี ดอน โดว. วี มึห เพียง ปอ อา โดว อี ซีบลึก โดว เฆ. 24ดอ ฮาว โดว เฆ ตี, โอว วี ยึร ฮัม ดี เพียง เฆ ซีนัน ซีนืง อาฮืน ปี ฮัม อึม นัมมูกซารา. อึณ ปี บอ โฆรห ซีนัน เฆ ดา ซึก, ปี บอ โฆรห เฌาพรา อี อึบ โตต ดอน โมยว. เซ เฆ ฮี ฆืด, เฆ มืร วี เบลห โลง เพียง เฆ.
25แฮะ ฮอต ปาย ตี อึณ บอ วี มึห โฆรห เลห แคง เบลณ อี กอย แดง ฆีณ โดว เฆ ตึอน. 26แคง เบลณ อี กอย แดง ฆีณ โดว เฆ ตี, อึณ วี มึห อาดา อู โมยว อี ปี อารึบ มาลาง แปะ แฮะ โบง อี ตา แซณ เงียน เบลณ. นา แดง มาลาง ตี อึณ ปี วี มึห อี ปี อารึบ ดูอี. 27ปี ปาย อารึบ ตี, จูห ดี ณอย โฮะ นา แดง, อึณ บอ กาลัะ มาบรีว ปี บ็อง เดณ อี ซี กอย แคง เงา. จูห ดี ณอย โลง นา ครึม, อาโรง อัน ตี, อึณ บอ ปี เงา อี ทอง ฮาว ดอน นา ดอน บลาก. 28ปี ปาย อาโรง อัน ดี บลาง, อึณ บอ ปี อาโรง คูนมาแยง วาย โจห ฆลาย.
อาตี มูห อาโรง อาพูง ดังโคว เฌาพรา. ดอ ยึร โอว ปี บยัะ เฌาพรา ตี, โอว บอ มูด ฆึบ บอ วี ยึร อี กาลาง โฆรห.
Currently Selected:
อาเอเซเคน 1: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
