กลึร 3
3
ลอง ดัม หมาบ บอ กาปลูะ น็อห
1โอว มูห วี อี แฮะ นับ ลอง ดูก โกบ แฮะ รู เฌาพรา. อึณ ปี อัน แฮะ ดึห อึณเพียะ, มัห โอว.
2อัน เฌา แฮะ ตึย โอว ฮาว แคง อับ ว็อง, โดง ตู มึห บลาง.
3แฮะ หมาน, อัน เฌา บอ มัห โอว ดอง วัน ดอง คืน.
4อึณ ปี อัน เฌา แฮะ โบง แตห ฮูน โอว เฆ ยัง โอว เฮียะ กาฮ็อห โตต, วี กาบัก บอ กาอาง โอว.
5อัน เฌา แฮะ บัร โรบ โอว บอ คร็อง อูน โอว. โอว มืร แฮะ คัม ดูก, อี ซ็อง ตืก ดี น็อห โอว.
6อัน เฌา แฮะ แตห โอว กอย แคง อับ ว็อง. อึณ บอ ปี โอว แฮะ กอย แคง กาเดา บาเรว ปี ดูอี อี แฮะ ยัม เหลณ กาเซา.
7อึณ บอ ปี อัน เฌา แฮะ โล็ง โรบ โอว, แกวะ แตห โอว ปึอน ดี เลห. อึณ ปี อัน เฌา แฮะ วี ดึห วัน ฮีน อี จัน กาเซา, ปัก อูน โอว.
8โอว ปี บอ แดะ แตห อี ตัห จอย โอว มืร, เฌาพรา ยี แวน ตู โทม โฆรห ปี ซาคึร โอว.
9อึณ ปี อัน เฌา แฮะ ดึห มาว แปะ แฮะ ด็อห อี, กาบีด อึณเตณ โดง ดี โลว ฮาว โอว. อัน วี โบง แตห อึณเตณ โดง ดี ว็อะ โอว วี โฆะ แฆะ.
10อัน เฌา บอ ปี มาเฆรห อี บัร ดี ยอด นา ดี ว็อะ โอว. อัน บอ ปี มาครังซี อี บัร ดี แดน ปัะ ดี โอว.
11อึณ ปี อัน เฌา แฮะ ณอน เลห โอว เรต อึณเตณ บอ ปยาต โอว, วี แวน โอว, แกวะ แตห อึณ มึห อี จอย โอว.
12อึณ ปี อัน เฌา บอ วีต อัะ อัน, บัณ โอว, โบง แตห โอว แบน ปี หมาย โดง ดี เทว อัน ซีโนห.
13อัน เฌา บอ บัณ โอว, แตห บลา อัะ อัน กอ ลึบ ลึก แคง โดว แคง น็อห โอว.
14เฆ ดูอี กืน บอ กาโพรม ดี กาณัห โอว บอ ดอง วัน. โอว บอ แบน โหมว ปี ต็อห เฆ อี หมึอม กาณัห อี หมึอม ซาย.
15อึณ ปี อัน เฌา แฮะ โบง แตห โอว โฮม เดา อี ซ็อง กอ แพ บอ เดียง อึม ซ็อง กอ ปึร.
16อึณ ปี อัน เฌา แฮะ แณต โอว กอย แคง กาปูห. วี ดึห มาว ดอย กาบัก หราง โอว.
17อึณ ปี อัน เฌา แฮะ ดึห แวน อี ดาคึย ฆยามซา ดี น็อห พึอม โอว. อึณ แตห โอว กอ วี ปีว โตต นา บอด นา หมึอม.
18โกบ ปาย ตี โอว บอ วี กาพา แคง น็อห โอว ต็อห, “ลอง ปี ดี ปาย ดี หน็อะ อึณด็อะ เฌาพรา แฮะ ฮอต ลึร. อาพูง ดังโคว โอว แฮะ ฮอต หราย.”
19เซ โอว วี กาพา โหลห ดูก แปะ แฮะ แตห อัน เฌา โอว คัม บอ แปะ แฮะ แตห อัน เฌา โอว โลว ฮาว วีว ฮาว เวณ, อึณ บอ ซ็อง กาเซา ดี น็อห โอว.
20โอว วี โหลห ลอง อัน ตี, อึณ บอ แบน น็อห ลึร น็อห ดีแตด ดี โอว.
21มาแล, โอว ยี โหลห อู โมยว อี แตห น็อห โอว หน็อะ อึณด็อะ.
22น็อห ร็อก กาเว เฌาพรา ตู นับ ดี โตต ดอ เหมา. โคว, เย ตู ชึม โตต.
23น็อห เฌาพรา ตี อึณ กามาย ดอน ซีณวัห. นา ซืร นา หมาน อัน เฌา มืร, แฮะ บอด แฮะ มยาด กาเซา.
24แคง น็อห โอว โอว วี ต็อห, “เฌาพรา อี ดี จอย โอว. โคว, โอว วี บึง อัน. อึณ บอ วี แตห โอว มึห ปี หน็อะ อึณด็อะ.”
25เฌาพรา บอ เฆฌู เฆ อี บึง อัน เฌา. อัน เฆฌู บอ เฆ อี เหรต อัน เฌา.
26ปาย ตี เซ เอ กอย หนีม หนีม, หน็อะ อึณด็อะ อัน เฌา ดี คยอด เอ, อึณ ดี บอ แบน นา หมึอม ดี เอ.
27เซ ดูอี ฆอด แอะเมา ซีณ ดอ ซี หนึม อัน ดอ ซี ดีแตด อัน, อึณ แบน นา หมึอม ดี อัน.
28แตห อัน ตูต ซีคยา ซีคยา บอ กอย หนีม หนีม ดอ ดี ดาง อัน เฌา มัง ฆอด แดง ยัะ อัน.
29แตห บอ น็อห อัน คัม ดี มูด ดี โฆม, แตห อัน ซอ วี มึห ปี หน็อะ อึณด็อะ.
30แตห อัน คัม ดี มางัห ณืร บอ ดี ดูอี อี มัห อัน บอ คัม ปี แนนัะ อี เฮา.
31เฌาพรา มูห อี นับ ดี ร็อก กาเว. อัน ตู แวน อี เซเซ.
32อัน เฌา ปี บอ แฮะ นับ ดี แตห อึณ ดูก กาเซา ดี น็อห เอ มืร, น็อห ร็อก กาเว อัน เฌา ดี เอ ยี แฮะ ตาง แฮะ กืน กาเซา.
33อัน เฌา ตู มึห น็อห ซี แตห ดูอี คัม ดูก, แตห อึณ กอ ซ็อง ดี น็อห เฆ.
34เฆ อี แยต ดูอี ปี อึบ อัน เฌา อี แณต ดูอี แตห เฆ ฌัม ดูก.
35เฆ ปยาต ดารา แปะ แฮะ ดัว เฌาพรา อี อึบ โตต ดอน โมยว บอ กาบัห ดี เฌาพรา.
36บอ ดอ ซูงพยาด เฆ ดารา, เฆ วี กาเบลียะ ดารา แปะ แฮะ ดัว เฌาพรา. อึณ ปี เฆ ทาง เฌาพรา ตู ยึร.
37อึณ ยี ตู มึห มาเซ อี โบว แบน เซ เฌาพรา ตู ควาง อึณ แบน.
38นา หมึอม บอ นา ตู หมึอม บอ ตัห โตต ดี ปี กาลาง อัน เฌา อี อึบ โตต ดอน โมยว.
39เซ เฌาพรา ดัม หมาบ ดี ดูอี อู วี. วี ตี อาว กาอาบ ปึณ.
40แตห เอ วี กาพา แปะ แฮะ โบง เอ, วี ตัห หณึม บึง เฌาพรา.
41แตห น็อห พึอม เอ วี กาลาง ดี เฌาพรา อี กอย แคง ฆางหราว, บอ ซาคึร ดี อัน ต็อห,
42“เย แฮะ ฮอต กาลึบ, เย แฮะ แตห แม เฌา รู ดี เย. เย มืร แฮะ กาบัห ดี แม, แม เฌาพรา มืร หณัม ฆ็อห แวน หมาบ ตี ดี เย.”
43อึณ ปี น็อห รู แม เฌา แฮะ ฮอต วี ซีบลึก โตต น็อห ร็อก กาเว แม ดี เย. แม เฌา แฮะ วี คูงครัห โดบ ดี ง็อห ยัม เย ปี แม ตู มึห น็อห กาเว.
44น็อห รู แม เฌา ตี, อึณ แฮะ ปี อึณอูะ อี แฮะ เฮต กาเซา. อึณ ตู แตห ปี ซาคึร เย ฌัม ดี แม เฌา.
45แม เฌา แฮะ โบง แตห เย ปี กาอัห กาโอบ อี หมึอม กาอีห กาเซา, ปี บีห แวน เฆ ดูอี ดอน โมยว.
46รันซู เย บอกาเฆลียด แฮะ วี กาโพรม ดี กาชัวะ เย บอ แนนัะ เย.
47เย แฮะ คัม อี หมึอม โยว อี ดัว เย เคร ยอต บอ อี นับ ดี แตห อึณ กาปยาต ลึร โตต, แตห อึณ ราม โตต.
48อึม งาย แฮะ แหล ดี งาย โอว ปี อึม แบลง โกบ แฮะ ลึร ชึม กาเซา เฆ ดูอี อาโมยว โอว.
49อึม งาย โอว มืร แฮะ เลห แหล กอ ปี อึม แบลง อี ตู ฮีด ดอ เหมา.
50ปาย ตี แตห กอ ฌัม ปัน ดี วี ยอด เฌาพรา อี กอย แคง ฆางหราว, แตห อัน จอย โอว.
51น็อห โอว บอ กาฮัวะ แหม กาเซา โกบ แฮะ ยึร โอว อี แฮะ โบว แบน ดี เฆ อีบึณ อี กอย แคง มืง ตาง โดง กอย โอว.
52เฆ รันซู โอว ยี ฌ็อง โอว ปีเยณ. เฆ บอ คูงครัห ดี เหมต โอว กอ ปี อี คูงครัห ดี เหมต มาซีม.
53เฆ บอ ดึห โอว, บยัว แคง กาเดา, ปี วี ดึห มาว, วึณ ดี โอว.
54อึม มืร แฮะ อึณปูน ฆีณ โอว. โอว บอ ทาง, โอว อาว ฮู ลอด ยัม.
55อึย แม เฌาพรา, อึณ ปี โอว แฮะ กอย แคง กาเดา อี แฮะ ลึก กาเซา. โอว บอ วี แดะ แม, วี ฆาว ปวน แม เฌา.
56ปาย ตี ดอ วี หมาณ โอว, แตห แม เฌา กาเว โอว, แม เฌา บอ วี ยึร ดี โทม โฆรห ปี ซาคึร โอว ตี.
57แม เฌา มืร ตัห กาตัด โอว, วี เวียะ โฆรห โอว ต็อห, “แกวะ แตห แม โยว.”
58อึย แม เฌาพรา, แม แฮะ ยอด อามู โอว, แม แฮะ ตัห คยอด ตัห ทูด เลห อาซาก โอว.
59อึย แม เฌาพรา, แม มืร แฮะ ฮอต ยึร แคะ ปี คาหนาบ เฆ รันซู ดี โอว. โอว หมาณ, แตห แม ซูงพยาด ดารา บลาก โอว.
60แม เฌา มืร แฮะ ฮอต ยึร แคะ ฌ็อง เฆ ดี โอว บอ แปะ แฮะ คราม เฆ ดี โบง นา ตู หมึอม ดี โอว.
61แม เฌาพรา, แม มืร แฮะ ฮอต โทม โฆรห ปี แนนัะ เฆ ดี โอว บอ แปะ แฮะ คราม เฆ ดี โบง นา ตู หมึอม ดี โอว.
62แม มืร แฮะ โทม ปี กาลาง เฆ นา ตู หมึอม ลอง โอว, วี แค อี ตู บอด อี ตู หมึอม ลอง โอว ดอง วัน ดอง วัน.
63แม เฌา ยอด, เฆ บอ จ็อง อาว ต็อห, เฆ บอ ตูต อาว ต็อห, เฆ แตห อึณ แบน โหมว ปี ต็อห เลน เฆ ลอง โอว.
64อึย แม เฌาพรา, โอว หมาณ, แตห แม เฌา วี ดัม หมาบ ดี เฆ แคะ กาดาน ปี ดึอม โบง เฆ ตี.
65แตห อึณ แบน น็อห กาฟัร กาเฟียน ดี เฆ. แตห เฆ วี คัม ปี ดืง แม เฌา ดี เฆ.
66อึย แม เฌาพรา, โอว หมาณ, แตห น็อห รู แม เฌา โบง แตห เฆ ลึร ชึม โตต แดง กาดาย ครึม เบลณ นี.
Currently Selected:
กลึร 3: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
