อาโยวซูอา 3
3
ลอง เฆ ดูอี อีซาเรลัะ กาโลห อึม แบลง ยอดาน
1ปา แคหณา ซีณวัห เจว, อาโยวซูอา บอ เฆ ดูอี อีซาเรลัะ บอกาเฆลียด บอ ยีต, วี เลห โดง คยัะ เฆ ดี มืง ซีดีม ตึอน, วี ฮาว คยัะ ดี โคบ แบลง อึม ยอดาน อาต ปึอน เฆ ดี กาโลห อึม ตี. 2วาย แฮะ โนะ โอย ซีแง, เฆ ดา ตาง บอ ฮาว ลึบ แคง โดง คยัะ เฆ ดอน โปละ. 3บอ กาลาง ดี ดูอี กืน ต็อห, “เซ เบ ฮี ยึร เฆ ดา อี หลู ดี เฌาพรา อี มูห ดูอี อาเลวี, เซ เฆ แฮะ กาฆอด ฮาว ฌีดืก เฌาพรา ปี กรึบ เบ, แตห เบ บอกาเฆลียด ยีต เลห โดง กอย เบ บอ ฮาว โดบ เฆ. 4ปาย ตี เบ ดี นับ อึณเตณ โดง โลว ฮาว เบ. โคว, เบ หณัม ดึอม ฌัม ดี ตี ดอ เหมา. เบ ยี ตู ปึอน ฮาว กาตัด ฌีดืก เฌาพรา, แตห เบ กอย ยาน, แตห อึณ โต็ง อา แหรณ กานีห.”
5อาโยวซูอา ปี วี กาลาง ดี เฆ ดูอี อีซาเรลัะ ต็อห, “แตห เบ โบง แตห โดว เบ ซีงา. โคว, แคหณา เฌาพรา ดี โบง อี หมึอม อาม กาเซา กาแต เบ.”
6วาย ตี, อาโยวซูอา ปี วี กาลาง ดี เฆ ดา อี หลู ดี เฌาพรา ต็อห, “แตห เบ กาฆอด ฮาว ฌีดืก เฌาพรา บอ แยต ฮาว บอ เฆ ดูอี บอกาเฆลียด.” อัน แฮะ ฮอต ต็อห ปาย ตี เฆ มืร โบง โดบ ปี ต็อห อัน ตี.
7เฌาพรา วี กาลาง ดี อาโยวซูอา ต็อห, “อาตึร นี โอว ดี จูห ดี โจะ มยูก แม ดี อาต เฆ ดูอี อีซาเรลัะ, แตห เฆ นับ, โอว แฮะ กอย รึม โดบ แม, แตห อึณ ปี โอว แฮะ กอย รึม โดบ อาโมวแซ อาต นี. 8แตห แม กาลาง ดี เฆ ดา อี หลู ดี เฌาพรา อี กาฆอด ฌีดืก เฌาพรา ตึอน ต็อห, ‘เซ เบ ฮี ตัห ฌัม โคบ แบลง อึม ยอดาน ตี, แตห เบ ลึบ จ็อง ฆืด แคง อึม ตี.’”
9ปาย ตี อาโยวซูอา บอ วี กาลาง ดี เฆ ดูอี กืน ต็อห, “แตห เบ ตัห ดี นี, โทม โฆรห เฌาพรา ปี กรึบ เบ. 10เฌาพรา ดี แตห เบ นับ, อัน มึห อาซาก บอ มูห เฌาพรา อี อีม. อัน บอ กอย กาแต เบ, ตู แตห เบ ชึม. โคว, อัน เฌา ดี โฮว เตา เฆ ดูอี กานัณ, ดูอี เฮทีด, ดูอี ฮีวีด, ดูอี เพเรซีด, ดูอี ฆีฆาซีด, ดูอี อาโมวรีด บอ ดูอี เยบูซีด แตห เฆ เลห เตา ดี อาต เบ อาคาคัร. 11บัร เบ ยอด, ฌีดืก เฌาพรา อี มูห เฌาพรา อี อึบ โตต แดง กาดาย นี, อึณ ดี แยต เบ กาโลห อึม แบลง ยอดาน. 12ปาย ตี แตห เบ ร็อห ดูอี ฆึร ดี อา วี กาแต เบ ดูอี อีซาเรลัะ ฆึร ดี อา ครึร, อู ครึร อู วี. 13เซ เฆ ดา อี หลู ดี เฌาพรา แฮะ กาฆอด ฌีดืก เฌาพรา อี มูห เฌาพรา อี อึบ โตต แดง กาดาย, เซ เฆ ฌาบ ฮาว แคง อึม ยอดาน ตี, อึม ตี ดี บอ ฆืด อู เฌณ, อาว ฮู แหล. อึม อี แหล ตัห นา โตห อัน มืร, อึณ ดี บอ กาฌูะ อึณปึม อู โปละ.”
14อัน แฮะ ฮอต กาลาง ปาย ตี เฆ ดูอี กืน บอ เลห แคง โดง คยัะ เฆ, ฮาว กาโลห อึม แบลง ยอดาน. เฆ ดา อี หลู ดี เฌาพรา มืร กาฆอด ฌีดืก เฌาพรา แยต ดี อาต เฆ. 15ดอ อัน ตี อึณ มูห อาคราว โซะ อี ดี โหงว. อึม แบลง ยอดาน ปี บอ แฮะ ตาง กอ โนะ ลูต มืร, เฆ ดา อี หลู ดี เฌาพรา อี กาฆอด ฌีดืก เฌาพรา, ดอ แณต ฮาว เฆ แคง อึม ตี, 16อึม อี แหล ตัห ตึอน, อึณ บอ ฆืด อู เฌณ. อึม อี แหล ตัห นา โตห อัน มืร, อึณ บอ นับ ดี วี ซูด วีว นา ปัน กอ โต็ง กาเซา, กอ วี ฌัม ดี มืง อาทัม อี กอย โคบ มืง จาตานัะ. อึม อี แหล ฮาว นา อาต อี โลง ดี อึม ดึง ซัยะ ซ็อง มืร, อึณ บอ ฮีด โตต ดอน โปละ. ดูอี เฆ ตึอน บอ กาโลห ฮาว ฌัม บลาก นา กอย มืง เยรีโคว. 17ดอ กาโลห ฮาว เฆ ดูอี กืน ดี กาดาย เฮณ ตึอน, เฆ ดา อี หลู ดี เฌาพรา อี กาฆอด ฌีดืก เฌาพรา ตึอน, เฆ มืร จ็อง กาแต แบลง ยอดาน แดง กาดาย เฮณ, แตห ดูอี เฆ ตึอน กอ กาโลห โตต, ฌัม บลาก นา ดอย.
Currently Selected:
อาโยวซูอา 3: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
