อาโยวบา 4
4
ลอง โฆรห ปี กาลาง อาเอลีพาด
1ดอ อัน ตี อาเอลีพาด อี มูห ดูอี อี กอย แคง มืง เทมาน, อัน วี เวียะ โฆรห อาโยวบา ตี.
2อัน ต็อห, “อึย อาโยวบา, เซ อู วี กาลาง โฆรห ดี แม, แม ดี คัม ดี โทม? เซ โอว ยี ตู กาลาง, โอว อาว ฮู แป คัม ดี ยืน.
3แม แฮะ นับ ดี มาโนว ดูอี กืน. แม แฮะ ดึอม ดัว โปลม ดัว แฮณ ดี เฆ อี แฮะ ดีหลัห อึณจัม.
4โฆรห ปี กาลาง แม แฮะ จอย เฆ อี แฮะ ดึอม กาลึบ, ดึอม ดีปลาด. อึณ บอ แบน โปลม แบน แฮณ ดี เฆ อี แฮะ มึห น็อห ลึร น็อห เตียะ.
5ดอ ตี นี อาเพ อาเร ยี แฮะ วี ตัห ฌัม ดี โดว แม, อึณ แฮะ แตห แม วี แบน น็อห ลึร น็อห เตียะ. แม แฮะ วี คัม อาเพ อาเร ตี, อึณ แฮะ แตห แม แบน รึร แบน ฆว็อง.
6โกบ โรวเซ แม เฌาพรา, อึณ ซอ นับ ดี วี แบน น็อห กรึอม น็อห ตาง ดี แม. โกบ โบง โดบ แม ดารา, อึณ ซอ นับ ดี วี แตห แม หณึม บึง เฌาพรา.
7แตห แม วี กาดัวะ กาพา, ดูอี อี ตู โบง หมาบ, วี เหมา แฮะ ดึอม ลึร ชึม? ดูอี น็อห ซืร น็อห หมาน, วี เหมา แฮะ ดึอม ฌัม ดูก ตาง?
8แคะ ปี ดึอม ยึร โอว, ดูอี อี ออน ดี โบง หมาบ เซเซ ปี ดูอี อี แท โดง นา. เฆ ปี บอ ดูอี อี บรัด ซีมา โหงว, อี วี ปึอน ดี โซะ ปี บรัด เฆ อี ตู หมึอม ตี.
9เซ อึณ ปี เฌาพรา ฮึห พึอม ดี เฆ, อึณ ดี แตห เฆ ลึร ชึม. เซ อึณ ปี เฌาพรา บูด เฆ, อึณ ดี แตห เฆ หราย โตต.
10ฮัม มาครังซี ปี บอ แฮะ ตาง กาเซา, อึณ ดี วี เยน วี ง็อง. มาครังซี หนึม ปี บอ แฮะ ปึอน ก็อะ ยัม โดว ซัดดาวา, หราง อัน ยี นับ ดี วี กาบัก.
11มาครังซี ตี ดี บอ ยัม โกบ เอต ตู มึห ปี ดี โฮม. ฆอน มาครังซี เฆ ตี ดี บอ กาย็อห ฮาว ดอน บลาก.
12อึณ มึห อาดา อู เฌณ, โฆรห ปี กาลาง อี เฮา แฮะ ลึห ดี โหยะ โอว. โอว บอ ยึร โฆรห ปี พูพาบ เฆ ตี.
13แคง หมึร ดอ อีด ซีคยา อี เฮา, โอว บอ อึณบาว จีจีว จีจีว ดอ แฮะ งยา อีด โอว.
14โอว บอ กาจัว บอ โยว ดียูห ดีเยณ, แตห โอว กอ อึณจัม บอ โดว.
15อึณ บอ มึห คูน เฆียด ตัห บูด นา โอว, แตห อึณ บอ แบน ฮึก กาบรัห, แบน บอ กาดัวะ ยัง เอียน เลห ดี โอว.
16โอว บอ ยึร อู โมยว แฮะ จ็อง โคบ โอว. โอว ยี ตู นับ ตู ปึอน กาลาง อึณ มูห มาเซ. ดอ อัน ตี ยี เยน ยี ง็อง กาเซา. โอว ยี ยึร โฆรห ดีแตด.
17อึณ ต็อห, ‘เซ อึณ มูห ดูอี อี นับ ดี ยัม, อัน ตู มึห น็อห ซืร น็อห หมาน อี บอด หลึอม เฌาพรา. อาโมยว ดูอี ตู มึห น็อห ซีงา บอด หลึอม ดา กาณา อี แฮะ พาน เบลห เฆ.’
18เฌาพรา มืร ตู บึง เฆ อี โบง ฆาน อัน. อัน บอ นับ ดี ต็อห ลอง เฆ อามู อามาด อัน, เฆ ตู เฌะฌูง.
19แดง ตี, อัน เฌา มืร ตู บึง ดูอี อี กอย แคง กาง กาดาย บอ แฮะ ดึอม เลห แคง กาปูห. เฆ แฮะ หงึย ยัม หลึอม มาวัะ ดีแตด ปี บลาต แวน อี.
20จูห ซีณ เจว หณา กอ ฌัม บา ดี อับ, เฆ บอ กาดูห ดี คัม อี ปยาต เฆ. อาว มึห อี โหลห เฆ ดี ลึร ชึม ปาย ตี ดอ เหมา.
21โกรวกราม เฆ มืร แฮะ ฮอต โบยห หราย โตต. เฆ ยี ตู มึห อางยาน มาเซ บอ ยัม หราย ปาย ตี.”
© 2021, Wycliffe Bible Translator, Inc. All rights reserved.