อาเยเรมี 41
41
1ดอ ฌัม มาเฆียน อึณบู อาซามาน อี มูห ฆอน อาเนทานี บอ หลาน อาเอลีซามา อี มูห อาโมยว เฆ คูนดีคัม ตาง, อัน แฮะ แดะ ดูอี ฆึร วี ตัห โดบ อัน. อัน บอ มูห อามู อามาด คูนดีคัม อี ตาง. อัน แตห เฆ ฮาว โดง กอย อาเกตาลี ดี มืง มีฌาพา ตึอน. ดอ โฮม รึม เฆ โบม ดี มืง มีฌาพา ตี, 2อาซามาน บอ เฆ ดูอี ฆึร วี อี โดบ อัน, เฆ บอ ยีต ดึห มาปัวะ ลาง เฆ, ง็อห ยัม อาเกตาลี อี มูห ฆอน อาฮีกัม บอ หลาน อาซาพาน อี มูห วี แปะ แฮะ ดาง คูนดีคัม แคง มืง บาแบ, แตห อัน แบน ดา กาณา อี อึบ มืง ยูดา. 3อาซามาน บอ ง็อห แวน โตต ดูอี อายูดา อี กอย รึม โดบ อาเกตาลี ดี มืง มีฌาพา ตึอน. อัน ง็อห แวน บอ เฆ ดา ซึก ดูอี บาแบ อี กอย รึม โดบ อาเกตาลี.
4ซีแง วาย แฮะ ฮอต ง็อห ยัม เฆ อาเกตาลี, ดอ หณัม มึห อาเซ อี นับ ลอง อัน ตี, 5อึณ มึห เฆ ดา ฆึร วี อี แฮะ เลห ตัห แคง มืง เซเคม บอ แคง มืง ซีโลว บอ มืง ซามารี. เฆ แฮะ ฆาะ แวน บอ ดีโมห ดี กูงกาบ เฆ, แฮะ ชึบ ครึง บรีม บอ ครึง กาปยาต. โดว โบ็ง เฆ มืร, เฆ แฮะ โบง แตห อึณ เฆลียด, แตห อึณ ฆลาะ. เฆ แฮะ โฆ็ง บอ ปี ดี หลู โหงว ดีฆาว บอ ซีนัม อูห หงูน, ต็อห ดี หลู ดี โฮว เฌาพรา. 6อาซามาน อี มูห ฆอน อาเนทานี บอ เลห ดี มืง มีฌาพา ตึอน, วี ฮาว รวห เฆ บอ ยาม ฮาว โดบ อึณเตณ. อัน บอ กาตูณ เฆ บอ กาลาง ดี เฆ ต็อห, “แตห เบ ตัห โดง กอย อาเกตาลี อี มูห ฆอน อาฮีกัม ตึอน.” 7เฆ แฮะ ฮอต ตัห ฌัม แคง มืง, อาซามาน อี มูห ฆอน อาเนทานี บอ เฆ ดูอี อี โดบ อัน, เฆ บอ กาโพรม ดี ง็อห ดูอี เฆ ตึอน. แฮะ ฮอต เฆ บอ วี ฮาว บยัว แวน ดูอี ปี ง็อห เฆ ตี แคง อึม คึม. 8กานัร ดูอี เฆ ตึอน, อึณ บอ มึห อาดา ฆึร วี, เฆ บอ กาลาง ดี อาซามาน ต็อห, “เย หมาณ, แกวะ แตห แม ง็อห ยัม เย. เย มึห ดี เครียง เคาคยูง เฆ ซีโฆ็งรา บอ นามัน เฆ งาม มาเพียน แคง โดง นา.” ปาย ตี อัน อาว ฮู ง็อห ยัม ดูอี เฆ ตี โดบ อี เฮา. 9อึม คึม ปี บยัว โลง อาซามาน ดี ดูอี ยัม เฆ ตึอน, อึณ บอ มูห อึม คึม ปี โบง อูน คูนดีคัม อาซา, แตห อึณ ฆ็อง แร อาเพ อาเร ดี คูนดีคัม อาบาซา อี อึบ มืง ดูอี อีซาเรลัะ. แคง กาเดา ตี, อาซามาน บอ บยัว โลง ดูอี ยัม กอ โนะ นา แคง.
10อาซามาน บอ เหมต เฆ ดูอี อี ซี ฆีด ซี กอย แคง มืง มีฌาพา. อึณ บอ มูห ฆอน ดีบยา คูนดีคัม บอ เฆ อี ซี กอย แคง มืง มีฌาพา บอ เฆ ดา ตาง อี อึบ ดา ซึก อี บัร โฮว คูนดีคัม แปะ แฮะ อาบ อาเนบูซารัะดาน ดี อาเกตาลี อี มูห ฆอน อาฮีกัม ตึอน. อาซามาน บอ เหมต ฮาว เฆ โดง กอย ดูอี อัมโมน.
11อึณ บอ มูห อายอฮานัน อี มูห ฆอน อากาเรอา บอ เฆ ดา โบว ตาง อี อึบ ดา ซึก อี กอย รึม โดบ อัน, ดอ วี ยึร เฆ ลอง นา ฮาย นา จีจีว แปะ แฮะ โบง อาซามาน ตี, 12เฆ บอ แดะ แคะ กอย ดูอี บอกาเฆลียด, แตห เฆ ฮาว กาโฆห ดี อาซามาน อี มูห ฆอน อาเนทานี ตึอน. เฆ บอ ฮาว กาตูณ อัน ดี โคบ อึม ดึง ตาง อี กอย แคง มืง กีปอง ตึอน. 13ดอ วี ยึร เฆ ดูอี อี โดบ อาซามาน ดี อายอฮานัน บอ เฆ ดา โบว ตาง อี โดบ อัน, เฆ บอ โคย กาเซา. 14ปาย ตี แคะ กอย เฆ ดูอี ปี เหมต อาซามาน ดี มืง มีฌาพา ตึอน, เฆ บอ เตา เลห ดี อัน, วี ฮาว โดง กอย อายอฮานัน อี มูห ฆอน อากาเรอา ตึอน. 15มาแล, อี มูห อาซามาน บอ เฆ ดูอี อี โดบ อัน เฆ ดา วี บอ ลอด ดี อายอฮานัน, วี เตา ฮาว โดง กอย ดูอี อัมโมน.
16ปาย ตี อายอฮานัน อี มูห ฆอน อากาเรอา บอ เฆ ดา โบว ตาง อี โดบ อัน, เฆ บอ วี ดึห ดูอี อี ซี ฆีด ซี กอย แปะ แฮะ เหมต อาซามาน ดี มืง มีฌาพา วาย แฮะ ง็อห ยัม อัน อาเกตาลี ตึอน. เฆ บอกาเฆลียด วี ฮาว ดี มืง กีปอง. ดูอี ปี ดึห ฮาว อายอฮานัน บอ เฆ ดา โบว อัน, อึณ บอ มูห เฆ ดา ซึก บอ อีบึณ เฆ ฆอน ดีรอย, บอ เฆ ดูอี อี อึบ ฌืง นาง. 17เฆ บอ เลห ฮาว โดบ อึณเตณ อี ฮาว ดี มืง แอฆึบ. เฆ บอ วี ฮาว ฆืด ดี เรา อี จืร คีมาฮาม อี กอย กาตัด มืง เบดแลม, เฆ เตา ฮาว แตห อึณ กาโต็ง ดี ดูอี บาแบ ตึอน. เฆ ต็อห ดี ฮาว ดี มืง แอฆึบ. 18โคว, เฆ โยว ดูอี มืง บาแบ โกบ แฮะ ง็อห ยัม อาซามาน ดี อาเกตาลี อี มูห ฆอน อาฮีกัม อี มูห ดูอี แปะ แฮะ ดาง คูนดีคัม แคง มืง บาแบ, แตห อัน แบน ดา กาณา อี อึบ ดูอี แคง มืง ตี.
Currently Selected:
อาเยเรมี 41: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
