อาเยเรมี 22
22
ลอง เฌาพรา ดัม หมาบ ดี คูนดีคัม อี ฮาย อี มืก
1เฌาพรา ปี วี กาลาง ดี อาเยเรมี ต็อห, “แตห แม วี โลง โดง กอย โฮว คูนดีคัม ยูดา บอ กาลาง โฆรห ปี ดัม อูน โอว ดี อัน. 2แตห แม ต็อห, ‘อึย แม คูนดีคัม อี อึบ มืง ยูดา อี มูห มืง แปะ แฮะ ดึอม อึบ คูนดีคัม อาดาวีด, บอ แม บอ เฆ แดเจณ แม บอ เฆ ดูอี แคง มืง แม อี ลึบ ดี มาโลห มืง นี, แตห เบ โทม โฆรห เฌาพรา. 3เฌาพรา วี กาลาง ดี เบ, แตห เบ โบง โดบ ดารา. แตห เบ จอย แตห ดูอี ลอด ดี ดูอี อี คาหนาบ เฆ. แกวะ แตห เบ โบง อี ตู โดบ ดารา. แกวะ คาหนาบ เฆ อี มูห แคต บอ ฆอน ซีปรัห เฆ ยา ซีปรัห. แคง มืง โดง กอย เบ นี แกวะ แตห เบ ง็อห ยัม ดูอี อี ตู มึห หมาบ. 4โคว, เซ เบ บอ โบง โดบ ดารา, คูนดีคัม อี อึบ มืง แปะ แฮะ ดึอม อึบ คูนดีคัม อาดาวีด, เฆ บอ ดี ตัห ลึบ ดี มาโลห อี จืร มาโลห คูนดีคัม. บอ เฆ บอ แดเจณ เฆ บอ ดูอี แคง มาน มืง เฆ, เฆ บอกาเฆลียด ดี บอ โดบ คูนดีคัม เฆ อี ป็อะ ลักเลา อึณปร็อง, ป็อะ บอ อึณปร็อง, วี ตัห ลึบ แคง มืง นี. 5เซ เบ ยี ตู โบง โดบ โฆรห เฌาพรา นี, โอว เฌาพรา ดี วี ดืง, แตห บอ โดว บรีม โอว วี ซีโพว. โอว ดี ต็อห, โฮว คูนดีคัม ตี ดี กาปยาต ลึร โตต.’”
6โคว, เฌาพรา แฮะ ฮอต กาลาง ลอง โฮว คูนดีคัม อี อึบ มืง ยูดา. อัน ต็อห, “แม ปี บอ แฮะ ปี มืง ฆีเลอาด บอ กาแดะ นอน เลบานูน อาดา โอว. โอว ยี ดี วี โบง, แตห แม ปี แปร กาฮ็อห โดง ตู ดึอม มึห ตู ดึอม กอย ดูอี.
7โอว ดี โบง แตห อี เฮา ตัห ปยาต แม, แตห ดอน อี โฆ็ง ครึง กาโฆห เฆ. เฆ ดี ฆัร เฮ อารีด กาดัง อี แฮะ หมึอม กาเซา บอ วี กาโนม โดะ แคง เงา.
8เฆ ดูอี กืน อี ตัห กาโลห มืง ตี เฆ ดี บอ ลาย กามวน ต็อห, ‘โกบ มาเซ เฌาพรา ปี ซอ โบง ปาย นี ดี มืง ตาง นี?’ 9แฮะ ฮอต, เฆ ปี ดี วี เวียะ ต็อห, ‘อึณ บอ มูห โกบ แฮะ แวน เฆ ปี กาแซณ เฆ ดี เฌาพรา ปี กรึบ เฆ. เฆ แฮะ วี โดบ ดี กรึบ เฌา ปี กรึบ อี เฮา.’”
10แกวะ แตห เบ ยาม โกบ คูนดีคัม อี แฮะ ยัม. แตห เบ ยี ยาม โกบ คูนดีคัม แปะ แฮะ เหมต ฮาว รันซู เบ. โคว, อัน อาว ฮู ปึอน ดี วี ตัห ยึร มืง บรีม อัน.
11แฮะ ฮอต, เฌาพรา ปี วี กาลาง ลอง อาซาโลม อี มูห ฆอน คูนดีคัม อาโยวซียา อี อึบ มืง ยูดา. อาซาโลม แฮะ วี ปลูะ ฆูณ อัน บอ โลว วี เลห เตา ตัะ มืง อัน. โคว, เฌาพรา ต็อห, “คูนดีคัม ตี ตู ปึอน ดี วี ตัห แคง มืง นี. 12อัน ดี บอ ฮาว ยัม แคง มืง โดง แฮะ เหมต ฮาว อี ดี อัน. อัน มืร อาว ฮู ปึอน ดี ตัห ยึร มืง บรีม อัน.”
13ดูอี อี ซัม กาง ยี ตู โบง โดบ ดารา, อัน โลว คัม โวด. เซ อัน โบง โฮง อีด อัน คร็อง แดง, ยี ตู โบง นา ซืร นา หมาน, อัน ตู ปึอน ม็องการา. อัน บอ นับ ดี คาหนาบ อี เฮา โบง ฆาน อัน, ยี ตู ดัว รูห อัน.
14อัน ต็อห, “โอว ดี ซัม กาง แตห อึณ ตาง. โอว ดี โบง โฮง ดี คร็อง แดง, แตห อึณ ว็อห.” ปาย ตี อัน บอ โบง กาเดา ปาแตง อี กาว็อห บอ ดึห เฮ อารีด ดึก ดี แรง. แฮะ ฮอต, อัน บอ วี พ็อห อี เรณ.
15เฌาพรา ปี วี ต็อห ดี อาซาโลม, “แม ทาง เซ แม แฮะ มึห เฮ อารีด กืน, อึณ ดี แตห แม แบน คูนดีคัม? ฆูณ แม ปึอน ดี โฮม แพ เดียง แพ โกบ โบง โดบ อัน ดารา. ปาย ตี อัน มืร ปึอน บอ นา บอด นา หมึอม.
16อัน บอ ยอด แมน เฆ ดูอี ดูก ดูอี ฆีน บอ เฆ อี ฌูด ลูด, ตู มึห มาเซ. อัน บอ ซูงพยาด โดบ ดารา. อัน มืร ปึอน นา บอด นา หมึอม. เซ ดูอี ต็อห, อัน แฮะ นับ เฌาพรา, อัน แฮะ กาอาบ โบง ปาย ตี.” เฌาพรา แฮะ กาลาง ปาย ตี.
17อัน วี ต็อห, “อี มูห แม, งาย แม บอ แตห แม มึห มี น็อห ลอพัะ, แตห แม ออน ดี ง็อห ยัม ดูอี อี ตู มึห หมาบ บอ คาหนาบ บอ พาด ดึห โกรวกราม อี เฮา.”
18โกบ อึณ ปาย ตี เฌาพรา ปี วี กาลาง ลอง อายอยาคีม อี มูห ฆอน คูนดีคัม อาโยวซียา อี อึบ เฆ ดูอี อายูดา. เฌาพรา ต็อห, “ดอ ยัม อัน อาว มึห อี ต็อห, ‘อึย อีกัด โอว, อึย วา โอว.’ อาว มึห อี กลึร อี เหงา ต็อห, ‘อึย ดา กาณา โอว, อาพูง ดังโคว แม แฮะ หราย.’
19เฆ ดี บอ ลาก เลห คูนดีคัม ตี นา เรต มืง เยรูซาแลม. เฆ ดี บอ ดีบ โดว ยัม อัน ปี อี ดีบ มาลา.”
20แตห แม โฮะ แดง นอน เลบานูน บอ แดะ ดี กาลาง. แตห แม ดัด แดะ ดี กาลาง บอ แคง มืง บาซัน. แตห แม กอย โดง จืร อาบารีม บอ ดัด เรียง. โคว, เฆ ฆึก แม อี แฮะ ดึอม จอย แม, เฆ แฮะ ฮอต ลึร ชึม โตต.
21ดอ แฮะ กอย ดาคึย แม, โอว แฮะ ฮอต ดัม ซาดีก ดี แม. แม วี ต็อห, “โอว ตู โลว, โอว ตู โทม. แม มืร ตู โทม โฆรห ปี มาโนว โอว ซีณ ดอ ดีแตด แม. แม มืร แฮะ โบง ปาย ตี เซเซ.”
22คูน ดี ตัห บูด แวน ดูอี แม อี แยต อี เฮา อี ปี ดา อี เฮียง มาบู. อี เฮา ดี บอ เหมต ฮาว ดูอี อี แฮะ ดึอม จอย แม. ปัน อัน ตี แม ดี วี ซาย อี บอ ชึม ซาเร โกบ อี ฮาย อี มืก ปี โบง แม.
23“แม อี กอย แคง โฮว แม อี จืร ‘เลบานูน.’ แม บอ นับ ดี วี ปีชีด แม บอ กอย ซีคยา แคง กาง เฮ อารีด. เซ ฮี ฌัม ปัน ดี วี คัม แม ดูก ตาง, อึณ ดี บอ ปี อีบึณ เซา ดี มึห ฆอน.”
24เฌาพรา ปี วี ต็อห, “โอว ต็อห อาคัร ดี แม อาเยคอนี อี มูห ฆอน คูนดีคัม อายอยาคีม อี แฮะ แบน คูนดีคัม เฆ ดูอี อายูดา, แม ปี บอ แฮะ ปี ซีกานู แปะ แฮะ ชึบ โอว ดี กานู โอว บลาก อาอัห มืร, โอว ยี ดี บูต แวน แม. 25โอว ดี วี อาบ แม ดี วี อี แฮะ เหรต ดี ง็อห ยัม แม, อี มูห วี ปี โยว กาเซา แม. โอว ดี อาบ แม ดี คูนดีคัม อาเนบูคัดเนจา อี อึบ มืง บาแบ บอ ดี เฆ ดูอี อัน. 26โอว ดี โฮว เตา แม บอ มา แม, แตห บาย วี ฮาว กอย แคง มืง อี ตู มูห มืง โดง ฆึอด บาย. บาย ดี บอ ยัม โดง ตี. 27บาย มืร ตู ปึอน ดี วี ตัห แคง มืง บรีม บาย โดง ซี วี ตัห บาย.”
28แฮะ หมาน, อาเยคอนี ตี แฮะ ปี กาโละ กาดาย อี แฮะ กาลาต แปะ แฮะ แวน อี. อัน แฮะ แบน ปี ตู อึง ปี ตู โวว อี. อี เฮา ดี โฮว เตา บอ อัน บอ ฆอน อัน, แตห เฆ วี ฮาว กอย แคง มืง ปี ตู นับ เฆ.
29อึย เบ ดูอี อี กอย แคง มืง บอ มืง, แตห เบ โทม โฆรห เฌาพรา.
30อัน แฮะ ต็อห, “แตห เบ แดม อูน แคง ฌาราง ลอง ดูอี วี ตี, อัน ตู มึห ฆอน คอ อู วี. อัน มืร ตู มึห ดอ ดาคึย ดอ ฆยามซา บอ โจว อาซาก อัน. เฆ หลูกหลาน อัน มืร ตู ออง, ตู ปึอน ดี อึบ มืง แปะ แฮะ ดึอม อึบ คูนดีคัม อาดาวีด.”
Currently Selected:
อาเยเรมี 22: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
